shadow
Diocese de Dili > NOTÍCIAS > LETURA DIÁRIA > Terça Feira, XIX Semana Tempo Comum

Terça Feira, XIX Semana Tempo Comum

Ano A

 

Primeira Leitura

Lia housi Livro Deuteronómio

Iha loron hirak neba, Moisés hateten nune’e ba Israel tomak: “Ohin, ha’u iha ona tinan atus ida rua nulu, ha’u la bele ona la’o ba la’o mai. Na’i dehan tan mai ha’u: ‘Ó sei la hakat liu Jordão’.  Na’i, ó nia Maromak, mak sei dada dalan ba ó, Nia mak sei harahun povo sira nebe iha ó oin, atu ó bele hela ho sira nia rain hodi horik ba. Josué sei la’o iha ó nia oin, nu’udar Na’i dehan. Na’i sei hare povo hirak ne’e, hanesan nia hare Sícon no Og, Amorreu sira nia liurai, nune’e mos sira nia rain nebe Nia sobu hodi halo rahun. Na’i sei saran sira ba imi liman, imi sei halo ba sira buat hotu tuir ordem nebe ha’u fo sai ba imi. Imi sai maka’as no biit na’in, keta ta’uk sira no mos keta hatudu laran ta’uk ba sira, basá, Na’i, imi nia Maromak, sei la’o hamutuk ho imi, sei la husik imi mesak”. Hafoin, Moisés bolu Josué hodi dehan ba nia iha Israel tomak nia oin: “Buka sai maka’as no asu-wa’in, basá, ó mak sei tama ho povo ne’e iha rai nebe Na’i jura ba sira nia bei-ala sira atu fo; ó mak sei lori sira to’o sira simu rai ne’e.  Na’i sei la’o hamutuk nafatin ho ó iha ó nia oin; Nia sei la husik ó hela mesak, Nia sei hamutuk ho ó nafatin. Tan ne’e keta nakdedar, keta laran susar”.

Maromak Futar Lia.

 

Salmo Responsorial.

Refrão :   Na’i Nia lima-rohan mak Nia povo. Repete-se

  • Ha’u hahi Na’i Nia naran; fo gloria ba ita Maromak!

           Nia mak ita nia biit no ita nia tulun,

           Nia hahalok diak tebes, Nia dalan, dalan los. Refrão

 

  • Ó hanoin hikas loron sira houri uluk nian,

           hanoin buat nebe liu ona;

           husu ba ó aman, nia sei hanorin ba ó,

           husu ba ó nia avó sira, sira sei dehan ba ó. Refrão

 

  • wainhira Na’i fahe Nia riku-soin ba povo sira,

          wainhira halo namkari ema sira iha rai, tau metin rai ketan ba nasaun sira,

           tuir número oan sira nian. Refrão

 

  • Na’i Nia liman-rohan mak Ninia povo,

           Jacob mak parte ida housi Na’i lima-rohan;

           Na’i de’it mak hamutuk ho nia atu lori nia,

           biit seluk ida la hamutuk ho nia. Refrão

 

Aclamação

Refrão : Aleluia, Aleluia. Repete-se

                 Na’i dehan, imi tau Ha’u Nia todan iha imi nia kbás hodi halo tuir Ha’u,

                 tan Ha’u laran maus, Ha’u haraik-An. Refrão

 

Evangelho                                                                                                                                                                                Mt. 18:1-5, 10, 12-14

+ Na’i Jesus Cristo Nia Evangelho nu’udar São Mateus haktuir

Iha tempo neba, escolante sira hakbesik ba Jesus hodi husu ba Nia: “Se mak boot liu iha Reino Lalehan?” Jesus bolu labarik ida, tau nia iha sira klaran hodi dehan ba sira: “Tebes, Ha’u dehan ba imi: imi la hakribi imi nia sala, no sai hanesan labarik sira karik, imi sei la tama iha Reino Lalehan. Ne’e duni, ema nebe haraik an hanesan labarik ne’e, nia mak boot liu iha Reino Lalehan. Ema nebe simu labarik ida hanesan ne’e tan Ha’u Nia naran, nia simu Ha’u”. Keta hewai kiik oan sira ne’e ida, basá, Ha’u dehan ba imi katak sira nia anjo sira fihir nafatin Ha’u Aman Lalehan Nia Futar oin. “Imi hanoin oin sa? Ema ida iha karik bibi atus ida, sira ne’e ida lakon tiha, nia sei la husik sira sianulu resin sia iha foho hodi buka ida nebe lakon? Tebes, Ha’u dehan tebes ba imi katak hetan bibi ne’e, nia sei haksolok ho ida ne’e liu fali ho sira sia nulu resin sia nebe la lakon. Nune’e imi nia Aman iha Lalehan lakohi atu kiik oan sira ne’e ida lakon.”

Lia Maksoyn.

Leave a Reply

Your email address will not be published. Required fields are marked *