shadow
Diocese de Dili > NOTÍCIAS > LETURA DIÁRIA > Quarta Feira, XIX Semana Tempo Comum

Quarta Feira, XIX Semana Tempo Comum

Ano A

 

Primeira Leitura                                                   Dt. 34, 1-12

Lia housi livro Deuteronómio

Iha loron hirak neba, Moisés sai housi rai tetuk Moab nian ba to’o iha foho Nebo, iha Pisgá nia tutun, besik Jericó. Iha neba, Na’i hatudu rai tomak ba nia: housi Galaad to’o Dan, Neftali tomak, rai Efraim no Manassés nian, rai tomak Judá nian ba to’o tasi loro-monu, rai Negueb no rai tetuk Jericó, cidade palmeira sira nian to’o Soar. Na’i dehan ba nia: “Ne’e mak rai nebe Ha’u hakotu nanis lia ba Abraão, Isacc no Jacob, hodi dehan ba sira ida-idak ho juramento: ‘Ha’u sei fo rai ne’e ba ó nia bei-oan sira’. Ha’u hakarak ó atu hare ho ó nia matan rasik, maibé, ó sei la tama iha neba”. Moisés, Na’i nia atan mate iha neba, iha rai Moab, tuir Na’i Nia hakaran. Hakoi nia iha foho sira Moab nia leet ida, besik Bet-Peor; maibé, to’o ohin loron, ema ida seidauk hatene nia rate iha nebe. Moisés mate ho tinan atus ida ruanulu. Nia matan hare mos nafatin, nia biit mos iha nafatin. Israel nia oan sira tanis ba Moisés iha loron tolunulu nia laran, iha rai tetuk Moab nian. Liu tiha loron hirak ne’e, sira nia tanis lutu nian ba Moisés hotu iha neba. Iha oras neba, Josué, Nun nia oan, nakonu ho espirito matenek nian, tan Moisés haraik bensa ba nia. Israel oan sira halo tuir Josué nia ordem hodi moris tuir nu’udar Na’i hateten tiha ona ba Moisés. La mosu tan iha Israel profeta ida hanesan Moisés, ho ida nebe Na’i ko’alia oin ho oin; la iha tan ida hanesan nia kona ba sinal no milagre sira nebe Na’i haruka nia halo iha Egipto hasouru Faraó ho nia atan sira no povo tomak rai neba nian, no mos kona ba nia liman nia biit nebe Moisés halo iha Israel tomak nia oin.

Maromak Futar Lia. 

 

Salmo Responsorial.                                                                                                                                           Sal. 66, 1-3ª. 5. 9. 16-17

Refrão : Rahun diak ba Maromak be soi ha’u nia moris. Repete-se

                  Rai tomak hahi Na’i, hananu Nia naran nia gloria;

                  fo haksolok hodi hahi Nia, dehan ba Maromak:

                  “Ita Nia hahalok kmanek tebes!” Refrão

 

                  Mai hanoin ho neon buat nebe Na’i halo,

                  Nia hahalok kmanek tebes ba ema sira,

                  Nia mak hatau ita nia moris, no la husik ita nia ain la’o sala. Refrão

 

                  Mai hodi rona, imi sira be hamta’uk Maromak;

                  ha’u sei haktuir ba imi buat nebe Nia halo mai ha’u,

                  ha’u ibun harohan ba Nia, ha’u nia nanal hahi Nia. Refrão

 

Aclamação

Refrão : Aleluia, Aleluia. Repete-se

                 Housi Cristo, Maromak badame malu ho ita;

                 Nia haruka ita hala’o knaar badame malu nian. Refrão

 

Evangelho                                                                                                                                                                                                Mt. 18,15-20

+ Na’i Jesus Cristo Nia Evangelho nu’udar S. Mateus haktuir

Iha tempo neba, Jesus dehan ba escolante sira: “Ó maun eh alin sala karik hasouru  ó, ba ko’alia ho nia mesa-mesak hodi hatudu nia sala. Nia rona karik ó, ó manan ona ó nia maun eh alin ne’e. Nia la rona karik ó, ba lori tan ema ida ka rua atu lia hotu sai los hodi sasin na’in rua ka tolu nia liafuan. Nia lakohi rona karik ema sira ne’e, ba fo hatene ba Kreda. Maibe nia lakohi rona kreda karik, hare ona nia nu’udar ema gentio no ema publicano ida. Tebes, Ha’u dehan ba imi; Buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha lalehan.”  Ha’u dehan tan ba imi:  “Imi na’in rua iha rai ne’e lia tuir malu karik atu husu buat ida, Ha’u Aman iha lalehan sei fo duni ba imi. Basa iha fatin nebe ema na’in rua ka tolu halibur hamutuk hodi Ha’u nia naran, Ha’u mos iha sira nia leet.”

Lia Maksoyn.

Leave a Reply

Your email address will not be published. Required fields are marked *