shadow
Diocese de Dili > NOTÍCIAS > LETURA DIÁRIA > Quinta Feira, XIX Semana Tempo Comum

Quinta Feira, XIX Semana Tempo Comum

Ano A

 

Primeira Leitura                                                          Jos 3, 7-10ª. 13-17   

Lia housi livro Josué

Iha loron hirak neba, Na’i lia tun ba Josué: “Ohin duni Ha’u hahu foti ó iha Israel tomak nia oin atu sira bele hatene katak Ha’u hela hamutuk ho ó, hanesan houri uluk Ha’u hela ho Moisés. Ó sei fo ordem ne’e ba na’ilulik sira nebe lori arca aliança nian: ‘Uainhira imi to’o mota Jordão nia ninin, imi sei para iha neba.” Josué dehan ba Israel oan sira: “Imi hakbesik mai hodi rona Na’i, imi nia Maromak Nia Liafuan”. Hafoin, nia dehan tan: “Ha’u dehan ba imi oinsa imi sei hare katak Maromak be moris horik iha imi leet;  Nia sei duni sai ema cananeu sira housi imi oin; imi sei hare arca aliança Na’i Nian, Maromak rai tomak nian liu mota Jordão housi imi oin.  Uainhira na’ilulik sira be lori Na’i Nia arca, Maromak rai tomak nian, tau ain iha ué mota Jordão, ué mota nian sei fahe-an tiha hanesan baki boot ida hari sa’e tiha”. Uainhira povo Israel sai housi sira nia tenda atu hakur mota Jordão, na’ilulik sira be lori arca aliança la’o uluk ona iha sira oin. Ema sira hotu to’o iha Jordão, na’ilulik sira nebe lori arca aliança, sira nia ain kona ué Jordão nian mota Jordão nia ué sai boot housi sorin mai to’o sorin ba iha tempo sohi nian ué nebe tun housi mota ulun mai para tiha kedas hodi nalihun hamutuk hanesan baki boot ida hari sa’e tiha, dook housi sira housi besik rai Adamá to’o besik cidade Sartã, maibe ué be suli ba Tasi Arabá, eh Tasi Masin nian, para tiha kedas. Povo hotu la’o liu kona housi rai Jericó nia oin. Na’ilulik sira nebe lori arca aliança Na’i nian, hamriik nafatin iha mota Jordão nia klaran ho ain maran, uainhira Israel oan sira hotu hakur liu mota ho ain maran.

Maromak Futar Lia.

 

Salmo Responsorial.                                                                                                                                                      Sal. 66, 1-3ª. 5.9. 16-17

Refrão : Aleluia! Repete-se

                  Uainhira Israel sai housi Egipto, Jacob nia oan sira hadook-an housi povo rai seluk,

                  Judá sai santuário Na’i nian, Israel sai Na’i nia reino. Refrão

 

                  Hare hetan Nia, tasi dada-an ba kotuk, ué Jordão nian suli ba kotuk;

                  foho sira, boot no ki’ik haksoit, hanesan balada sira iha rai luan boot. Refrão

 

                  Tasi, sa mak halo ó halai? Jordão, tansa ó fila ba kotuk? Foho sira, tansa imi haksoit hanesan balada sira?

                  Foho oan sira, tansa imi haksoit hanesan bibi oan sira? Refrão

 

                  Rai nakdedar iha Na’i futar oin, nakdedar iha Jocob nia Maromak oin.

                  Na’i be halo fatuk luan sai lagoa, no fatuk sira sai ué matan. Refrão

 

Aclamação :

Refrão : Aleluia, Aleluia … Repete-se

                 Hatudu Ita futar oin ba Ita atan, hanourin ha’u Ita ukunfuan. Refrão

 

Evangelho                                                                                                                                                                                   Mt. 18, 21-19:1

+  Na’i Jesus Cristo Nia Evangelho nu’udar São Mateus haktuir

Iha tempo neba, Pedro hakbesik ba Nia hodi dehan: “Na’i, ha’u nia maun eh alin sala hasouru ha’u karik, ha’u sei perdua nia dala hira? To’o dala hitu?” Jesus hatan ba nia: “Ha’u dehan ba ó:  la’os to’o dala hitu, maibe to’o hitu nulu dala hitu”. “Tan ne’e, reino lalehan nian hanesan liurai ida nebe hakarak sisi tusan ba nia atan sira. Uainhira nia hahu sisi, sira lori mai ema ida nebe iha tusan osan rihun sanulu. Tan nia la iha buat ida hodi selu, liurai haruka fa’an tiha nia ho nia feen, nia oan sira ho nia riku soi sira hotu atu selu tusan. Atan ne’e monu ain ba nia hodi dehan:  “Paciência uitoan ho ha’u, ha’u sei fo fali tusan hotu ba ó,’ Tan hanoin nia, atan ne’e nia na’i husik nia ba hodi kasu nia tusan. Uainhira atan ne’e sai housi neba, nia hetan nia maluk ida nebe debe nia osan oan atus ida. Kaer tiha maluk ne’e, nia buti metin nia kakorok dehan: ‘Selu ó nia tusan ba!’ Nia maluk monu ain ba nia hodi harohan: ‘Paciência uitoan ho ha’u, ha’u sei fo fali tusan hotu ba ó.’  Maibe nia lakohi sadia nia hodi haruka maluk ne’e ba dadur laran to’o  nia selu nia tusan hotu. Nia maluk atan sira seluk hare tiha buat ne’e, ho neon susar ba haktuir ba sira na’i buat hotu nebe mosu. Tuir mai sira nia na’i haruka bolu nia hodi dehan ba nia:  ‘Atan aat, ha’u kasu tiha ó nia tusan tomak tan ó husu ha’u; ó la bele hanoin ó nia maluk atan hanesan ha’u hanoin ó?”  Hafoin, hodi hirus, na’i fo nia ba dadur na’in sira to’o nia selu nia tusan hotu. Imi ida-idak la perdua ho laran imi nia maun alin karik, Ha’u Aman iha lalehan sei halo mos nune’e ba imi.”  Ko’alia hotu tiham Jesus husik Galileia hodi la’o ba rai Judeia, iha Jordão nia sorin balun ba.

Lia Maksoyn.

Leave a Reply

Your email address will not be published. Required fields are marked *