shadow
Diocese de Dili > NOTÍCIAS > LETURA DIÁRIA > Sabado XIX Semana Tempo Comum

Sabado XIX Semana Tempo Comum

Ano A

 

Primeira Leitura                                                                                   

Lia housi Livro Josué

Iha loron hirak neba, Josué hateten nune’e ba povo: “Imi hamta’uk Na’i ba, hodi serbi Nia ho laran tomak. Imi hadook Maromak falsu sira nebe imi bei-ala sira adora, iha mota Eufrates sorin ba no iha Egipto, hodi serbi de’it Na’i. Karik imi la haksolok serbi Na’i, imi bele hili ida nebe imi hakarak serbi: serbi ba Maromak nebe imi nia bei-ala sira serbi iha mota Eufrates sorin ba ka serbi ba Amorreus sira nia Maromak nebe oras ne’e imi tur iha sira rain; maibé, ha’u ho ha’u nia familia ami serbi de’it Na’i”. Povo hotu hatan, dehan: “Ami la hanoin atu husik Na’i, hodi serbi fali Maromak sira seluk. Na’i, ami nia Maromak, mak hasai ami ho ami aman sira housi rai Egipto, housi uma atan nian. Nia mak halo milagre oi-oin iha kedas ami nia oin, hodi tulun ami tuir dalan iha fatin sira nebe ami liu. Na’i mak duni sai housi ami oin, povo sira nebe hasoru ami, no Amorreus sira nebe houri uluk tur iha rai ne’e. Ami mos hakarak serbi de’it Na’i, basá, Nia de’it mak ami nia Maromak”.  Nune’e, Jousé dehan ba povo:  “Maibé, imi la bele serbi ba Na’i ho laran makerek: basá, Nia Maromak Santo, Maromak nebe sei la fo perdua ba imi nia laran makerek no ba imi nia salan sira. Karik imi fila kotuk ba Na’i, atu serbi fali Maromak selu-seluk, Nia sei fila oin hasoru imi, atu fo kastigu maka’as ba imi hodi harahun imi, wainhira Nia sai tiha nu’udar imi mahan”. Povo hotu hatan ba Josué: “Lae! Ami hakarak de’it serbi Na’i!”  Josué hateten fali ba povo: “Imi rasik sai sasin hasoru imi an, hodi fihir Na’i, atu serbi Nia!”  Sira hotu hatan: Ami sasin hasouru ami an rasik!” Josué hateten tan fali ba sira: “Ne’e sa houri ohin ba oin, imi hadook ona Maromak falsu sira nebe iha imi leet, hodi fila imi fuan ba Na’i, Israel nia Maromak”. Povo hotu hatan ba Josué:  “Ba Na’i, ami nia Maromak mak ami sei serbi, ba Nia Liafuan sira mak ami sei rona”. Iha loron neba, iha Siquém, Josué remata ho moruk ida ho povo hodi halo Lei ida atu sira tuir. Tuir mai, nia hakerek lia fuan hirak ne’e iha Livro Lei Na’i Nian. Nia hari iha fatin neba fatuk boot ida iha aas nu’udar sasin, iha ai carvalho nia okos, besik Na’i Nia Santuário. Josué dehan ba povo: “Imi hare ba fatuk ne’e nebe sei sai sasin ba imi, tan rona lia fuan sira hotu nebe Na’i hato’o ba imi. Nia sei sai sasin hasoru imi, karik ikus mai, imi fila kotuk ba Maromak”. Hateten tiha lia hirak ne’e, Josué fahe malu ho sira, ida-idak fila ba nia fatin. Hafoin, Josué, Num nia oan, atan Na’i Nian, mate ho tinan atus ida sanulu.

Maromak Futar Lia.

 

Salmo Responsorial.                                                                                             Sal. 16, 1-2ª. 5. 7. 8. 9. 10. 11

Refrão : Na’i, Ita Boot ha’u soin. Repete-se

  • Ha’u Maromak, rai ha’u, Ita ha’u subar fatin,

           Ha’u dehan ba Na’i: Ita mesak ha’u nia diak!

           Na’i, Ita ha’u nia liman rohan,

           Ha’u nia moris iha Ita liman. Refrão

 

  • Ha’u sei hahi Na’i, ha’u mahan no ha’u mestre;

           iha kalan Nia fanu ha’u fuan. Na’i iha nafatin ha’u oin,

            ho Nia iha ha’u sorin ha’u sei la hetan susar. Refrão

 

  • Nia sei la saran ha’u ba mate nia liman,

           sei la husik Nia atan hetan isin dodok.

            Nia sei hatudu dalan moris nian mai ha’u,

             iha Nia sorin ha’u sei moris iha ksolok boot. Refrão

 

Aclamação

Refrão : Aleluia, Aleluia… Repete-se

 

Evangelho                                                                                                                                             Mt. 19, 13-15

+  Na’i Jesus Cristo Nia Evangelho nu’udar São Mateus haktuir

Iha tempo neba, ema sira lori labarik oan sira mai Jesus, atu Nia tau liman ba sira, hodi harohan ba sira. Maibé, escolante sira haksiak sira. Nune’e, Jesus lia tun ba sira, dehan: “Husik labarik oan sira, imi keta hatau netik sira atu hakbesik mai Ha’u, basá, Reino Lalehan nian ba duni ema sira nebe hanesan sira ne’e.” Tuir mai, Jesus tau tiha liman ba sira, la’o daudaun tuir Nia dalan.

Lia Maksoyn.

Leave a Reply

Your email address will not be published. Required fields are marked *