shadow
Diocese de Dili > NOTÍCIAS > LETURA DIÁRIA > Sexta Feira, XIX Semana Tempo Comum

Sexta Feira, XIX Semana Tempo Comum

Ano A

 

Primeira Leitura                                                           Jos 24, 1-13   

Lia housi livro Josué

Iha loron hirak neba, Josué libur uma-kain sira hotu Israel nian iha Siquém. Hafoin, bolu katuas sira, ulun sira, juiz no boot sira seluk tan, ba Na’i nia oin. Nune’e, Josué dehan ba povo tomak:  “Na’i, Israel nia Maromak hateten nune’e:  “Imi nia bei-ala sira, to’o Terá, Abraão no Nacor nia aman, uluk tur iha mota Eufrates nia sorin ba no serbi Maromak falso sira. Ha’u hasai Abraão, imi aman housi mota Eufrates nia sorin ba, halo nia hakat liu mai iha sorin seluk ba rai sira hotu Canaã nian hodi haraik ba nia oan no bei-oan sira atu sai ua’in. Ha’u fo oan ida, Isaac, ba nia no ba Isacc, Ha’u fo Jacob ho Esau. Ha’u fo rai foho Seir nian ba Esau, maibe Jacob ho nia oan sira tun ba Egipto. Hafoin, Ha’u haruka Moisés ho Araão, hodi halo milagre ua’in, Ha’u fo castigo oi-oin ba Egipto, no hasai no imi housi neba. Ha’u hasai imi nia aman sira housi Egipto no imi to’o Tasi. Ema Egipto sira duni tuir imi aman sira ho kuda no kareta to’o tasi Mean. Hare hetan tiha funu baluk sira, sira hakilar ba Na’i. Na’i halo kalohan nakukun tun mai haketak imi housi ema Egipto sira, halo tasi mai hasouru sira hodi halo mouut sira hotu. Basa, imi hare rasik ho imi matan buat nebe Ha’u halo iha Egipto. Tuir mai, imi horik kleur iha rai fuik maran. Hafoin Ha’u lori imi ba amorreu sira rain nebe hela iha Jordão nia sorin ba. Sira mai funu hasouru imi, maibe, Ha’u saran sira ba imi liman atu imi bele horik iha sira rain, basa Ha’u halakon sira iha imi oin. Tuir fali, mosu Balac, Sipor nia oan no liurai Moab nian be hafunu hasouru Israel hodi haruka bolu Balaão, Beor nia oan atu fo malisan ba imi. Maibe, Ha’u lakohi rona Balaão no atu nia fo bensa ba imi. Tan ne’e mak Ha’u soi imi housi sira liman. Hafoin, imi hakur liu Jordão hodi ba to’o Jericó. Sira be horik iha cidade neba hafunu hasouru imi amorreu sira, perezeu sira, cananeu sira, hitita sira, girgasita sira, hevita sira no jebuseu sira maibe, Ha’u saran sira ba iha imi liman. Atu duni sai liurai na’in rua amorreu sira nian housi imi oin, Ha’u haruka dihi telok ua’in ba uluk imi oin. Buat ne’e hotu la mosu ho biit imi nia surik eh rama nian. Ha’u fo rai ida ba imi nebe imi la kole hadian, cidade sira nebe imi la kole no la gasta osan atu harii nebe oras ne’e imi horik ba, ai-uvas no ai-oliveira nebe imi la kuda, oras ne’e imi han nia fuan”.

Maromak Futar Lia.

 

Salmo Responsorial.                                                                                           Sal. 136, 1-3. 16-18. 21. 24

Refrão : Na’i Nia domin rohan laek. Repete-se

  • Agradece ba Na’i, tanba Nia diak tebes,

           Nia domin rohan laek. Agradece ba Na’i,

            Maromak hotu nia Maromak, Nia domin rohan laek.

            Agradece ba na’i hotu nia Na’i, Nia domin rohan laek. Refrão

 

  • Lori Nia povo housi rai fuik maran, Nia domin rohan laek.

            Nia harahun liurai boot sira, Nia domin rohan laek;

             Nia hakanek liurai biit na’in sira, Nia domin rohan laek. Refrão

 

  • Haraik rai ida ba Nia povo nu’udar liman rohan,

           Nia domin rohan laek; hanesan riku-soi ba Israel,

            Ninia povo, Nia domin rohan laek; soi ita housi ukun-na’in aat sira,

             Nia domin rohan laek. Refrão

 

Aclamação

Refrão : Aleluia, Aleluia.. Repete-se

                   Simu ba ho laran tomak lia meon nebe Na’i hato’o ba imi; la’os hanesan

                    ema nia liafuan, maibe, nu’udar Maromak futar liafuan. Refrão

 

Evangelho                                                                                                                                              Mt.19,3-12

+  Na’i Jesus Cristo Nia Evangelho nu’udar São Mateus haktuir

Iha tempo neba, ema fariseu balu hakbesik  ba Jesus atu koko Nia. Sira dehan ba Nia: “Ema ida bele husik nia feen tan buat nar-naran ida?” Jesus hatan ba sira: “Imi la lê katak houri uluk, Ida be halo ema mane no feto, Nia dehan: ‘Tan buat ne’e, mane sei husik nia aman no inan, ba hamutuk ho nia feen, sira rua sai isin ida de’it?’ Nune’e, sira la’os ona na’in rua, maibé, ida de’it. Ne’e duni, buat nebe Maromak tau hamutuk ona, ema ida la bele haketak”. Sira dehan hikas ba Nia: “Nune’e karik, tan sa Moisés haruka fo surat fahe-malu nian atu ema ida husik nia feen?”  Jesus hatan ba sira: “Tan imi nia fuan tos mak Moisés haruka imi atu fo surat molok husik imi nia feen. Maibé, houri uluk, la hanesan ne’e. Ha’u dehan ba imi: Se mak husik nia feen, la’os tan hahalok sala fo’er hodi kaben feto seluk, nia halo sala adultério.” Escolante sira dehan ba Nia: “Mane nia situasaun iha nia relasaun ho nia feen nune’e karik, diak liu lalika kabén!” Jesus hatan ba sira: “Laos ema hotu hatene tuir hanourin ida ne’e, maibé, ba de’it sira nebe Na’i hakotu ona lia. Los duni, iha nalin sira nebe ema sira mak halo, no iha mos ema sira nebe halo-an nalin ba an rasik tan reino Lalehan. Se mak bele rona, rona ba!”

Lia Maksoyn.

Leave a Reply

Your email address will not be published. Required fields are marked *