shadow
Diocese de Dili > NOTÍCIAS > LETURA DIÁRIA > Segunda feira, XX Semana Tempo Comum

Segunda feira, XX Semana Tempo Comum

Ano A

 

Primeira Leitura                                 Ez 2:11-19

Lia housi Livro Profeta Ezequial

Na’i lia tun mai ha’u, nune’e: “Emar nia oan, Ha’u ba hasai housi ó, hodi fo mate lalais, ba ida nebé ksolok ó nia matan nian. Maibé, ó sei la halerik, sei la tanis, no mos sei la husik suli ó mata uen;  dada íis nonok, la tau lutu, hanesan bai-bain lutu ba mate sira. Taka ulun nafatin, hatais ó nia sandális, maibé, keta taka ó hasan rahun, no mos keta han pão nebé ema seluk lori mai”. Iha dader, ha’u ko’alia ba povo, iha loro kraik ha’u nia feen mate. Iha dader tuir mai, ha’u halo tuir ordem nebé ha’u simu. Nune’e, povo husu mai ha’u: “Ó lakohi dehan mai ami, kona ba ó nia hahalok hirak ne’e katak sá mai ami?” Ha’u hatán ba sira: “Na’i lia tun mai ha’u, nune’e:  ‘Dehan ba Israel nia uma kain: Na’i ko’alia nune’e: Imi haré, Ha’u ba halo aat ba Ha’u Nia santuário, imi nia loko-an nia kbiit, ksolok imi nia matan nian, no hakaran aat imi klamar nian. Imi nia oan mane no feto sira nebé imi husik hela iha Jerusalém, ema sei óho sira hotu ho surik’.  Nune’e, Imi sei halo tuir buat nebé ha’u halo. Imi sei la taka imi hasan rahun, imi sei la han pão nebé ema seluk lori mai, imi sei taka imi ulun, sei hatais sandális. Maibé, imi la bele laran susar no mos la bele tanis. Imi sei halakon imi nia hahalok aat oi-oin hodi haktuir ba malu, imi nia halerik. Ezequiel ba imi nu’udar sinal ida:  Imi sei halo tuir buat hotu nebé nia halo. Uainhira buat hotu ne’e mosu tuir lolós, imi sei hatene katak Ha’u mak Na’i Maromak”.

Maromak Futar Lia.

 

Salmo Responsorial                                                                             Sal 106,34-35,36-37,39-40.34-44

Refrão :  Ó fila kotuk ba Maromak be halo ó moris. Repete-se

                   Ó hakribi fatuk inan be halo ó moris,

                   Ó haluha Maromak be fo moris ba ó;

                   Na’i  haré no Nia laran nakali,

                   no hakribi ó nia oan mane no oan feto sira. Refrão

 

                  Na’i dehan: “Ha’u sei subar Ha’u oin ba sira no

                  Ha’u sei hare oinsa sira nia loron aban-bainrua, basa,

                  sira otas laran aat nian ida,

                  oan sira be la hatene neon los. Refrão

 

                  Sira halo Ha’u hirus tan maromak faslo,

                  halo Ha’u laran nakali ho ilas folin laek.

                  Ha’u halo sira laran susar hodi sai povo falso,

                  halo sira sai povo ida beik.” Refrão

 

Aclamação

Refrão : Aleluia, Aleluia. Repete-se

                  Ksolok ba sira be kiak iha espirito basa reino Lalehan sira nian. Refrão

 

Evangelho                                                                                                                                          Mt. 19:16-22

+ Na’i Jesus Cristo Nia Evangelho nu’udar São Mateus haktuir

Iha tempo nebá, mane klosan ida hakbesik ba Jesus hodi husu ba Nia: “Mestre, ha’u sei halo sá diak atu bele hetan moris rohan láek?” Jesus husu ba nia: “Tansá  ó husu Ha’u kona ba buat nebe di’ak? Ida de’it mak diak.  Maibé, ó hakarak tama ba moris karik, halo tuir ukunfuan sira ba.”  Nia husu fali: “Ukunfuan nebe?” Jesus hatan: “Keta oho, keta sala ho ema nia kaben, keta na’uk, keta foti lia falso; hamta’uk ó nia aman ho inan, hadomi ó nia maluk hanesan ó an rasik.”  Klosan ne’e dehan ba Nia: “Ha’u halo tuir ona buat ne’e hotu:  ha’u sei halo tan saida?” Jesus dehan ba nia: “Ó hakarak sai ema di’ak lolos karik, ba fa’an tiha ó nia sasan hotu hodi fahe ba ema kiak sira, nune’e ó sei hetan rikusoi iha lalehan; hafoin mai tuir Ha’u”. Rona tiha lia hirak ne’e, mane klosan fila ho neon nakraik, basa nia iha rikusoi barak.

Lia Maksoyn.

Leave a Reply

Your email address will not be published. Required fields are marked *