shadow
Diocese de Dili > NOTÍCIAS > REFLEXÃO > Evangelho & Reflexão Domingo Comum XX, Ano A-2017

Evangelho & Reflexão Domingo Comum XX, Ano A-2017

Evangelho                                                                                                  (Mt 15,21-28)

Nai Jesus Cristo nia Evangelho nudar São Mateus haktuir.

Iha tempo neba, Jesus ba tiha Tiro ho Sidon. Feto Canã  nian ida, mai housi nebá, hahú hakilar nunee:”Nai, David nia oan, hanoin hau. Hau nia oan feto, diabo ida halo terus tebtebes”.  Maibé, Jesus la hatán ba nia. Nia escolante sira besik ba Jesus hodi husu:”Nai, hatán ba, tan nia hakilar tuir Ita nafatin!”. Jesus simu:”Hau mai tan deit bibi oan sira nebe lakon housi Israel nia uma laran”. Maibé, feto nee mai hakneak iha Jesus nia oin, hodi dehan:”Nai, tulun hau”. Jesus dehan tenik ba nia:”la bele kaer oan sira nia hahan atu soe ba asu oan sira”. Maibé, feto dehan:”Haraik mai, Nai, tan asu oan sira hili hahan mumun monu housi nain sira nia mesa!” Ho nee, Jesus hatán ba nia:”Feto, o nia fiar boot duni. O sei hetan buat nebe o hakarak”. Hahu ba loron nee, nia oan feto hetan kedas isin diak.

Lia Maksoyn

 

Reflexão :

FIAR, O SEI HETAN BUAT NEBE O HAKARAK

PEDIDO FETO CANAAN NIAN: Leitura Evangélica Domingo semana nee (Mat 15,21-28) relata kona ba Jesus ho feto ida nebe husu tulun ba Jesus atu kura eh fo isin diak ba nian oan feto nebe demónio halo terus.

Fofoun Jesus la reage/fo resposta ba pedido nee. Tansa Jesus hatudu attitude nunee? Talves Jesus hakarak koko klean oinsa feto Canã nia fiar ba Maromak. Maske Jesus la fo oin, maibé, feto nee continua tuir Jesus  hodi husus nafatin. Jesus nia escolante sira mos sente perturbado hodi haruka Jesus duni tiha feto nee. Tuir mai acontece diálogo badak entre Jesus ho feto nee, no conversa nee remata ho louvor nebe Jesus fob a feto Canã nee tan nia fiar ba Jesus. Iha momento nee kedas, nmia oan hetan isin diak. Oinsa ita bele entende klean liu tan Evangelho nee?

 

Território TIRO no SIDON; Evangelho relata katak fofoun Jesus hasees-An ba território Tiro no Sidon (Mat 15,2). Território nee rezide iha tasi ibun parte norte/tasi feto (Agora Lebanon Sul), pelo menos kilómetro 60 husi parte loromonu lagoa(danau) Genesaret iha Galileia (Cf Mat 14,34), fatin nebe Jesus antes horik ba.

Evangelho mos relata katak Jesus hasees-An ba Tiro ho Sidon hodi evita tensão conflito entre Jesus ho ema Fariseu no escriba sira nebe hiit-an mai husi Jerusalem hodi buka Jesus nia fraquesa doutrinal (Cf Mat 15,1-21).

 

Iha rai Sidon no Tiro, Jesus hatene katak ema fariseu ho escriba sira husi Jerusalem sei la halo acção protesta doutinal ruma hasoru Jesus tanba território nee laos parte husi Isarel nian. Evangelista Mateus relata katak, depois de conversa ho feto Canã nee, Jesus lao tuir Nia dalan husi lagoa Genesare hanesan antes Nia halao ona (Mat 15,29).

 

FETO CANÃ; Conversa entre Jesus ho feto Canã nee rai hela sentido especial ba povo Tiro no Sidon basá, ema Judeu sira considera ema Canã sira laos parte husi povo Maromak nian, tanba nee sira hare malu inimigo ba malu.

 

Sira hare malu matan la mos tanba sira nia tradição no moris religiosa nebe la hanesan. Ema Judeu considera ema Canã sira nudar ema liu nebe la hola parte iha sira nia cultura. Evangelista Marcos descreve feto Canã nee udar ema nebe origem Grecia husi cidadania Siro-Fenisia (Mc 7,26).

 

Liafuan Grecia iha nee, refere liu ba moris religiosa nebe la pertence ba religião Judeu nian. Cidadania nebe Marcos refere, hanesan deit ho ida nebe Evangelista Mateus temi kona ba feto Canã nee. Em princípio, feto nee, ema judeu hatene nudar ema nebe la pertence ba sira nia tradição no religião judaica. Se nune, Jesus lao bibi ain iha fatin hirak nee hodi cura, hanorin, fo isin diak, duni sai diabo too bolu Ninia escolante sira hodi halo saida? Se sira la pertence ba tradeção judaica, Jesus ba haklaken iha neba ho interece saida?  

Feto nee husu atu nia oan feto hetan isin diak….será que feto nee nia oan merece ka lae ba pedido nee? Cultura geral justifica katak; ita ema moris bele husu tulun ba ema se se deit …maibé, pensamento nee la válido ba mentalidade judaica iha altura neba,…..talves too ohin loron.

Tanba nee make ma judeu sira mos dalaruma aplica hahalok caridade ba sira nia maluk judeu deit ema seluk sira la interece…….talves ita sei hanoin Jesus nia ai-knanoik kona ba Samaritano nebe laran diak (Luc 10, 33-37) (Samaria altura neba, considerado la pertence ba Israel tanba mentalidade religiosa contaminado ona ho tradição religiosa rai seluk nian). Interessante ba ita nobun hodi hatene katak tanba ida nee mak iha Evangelho Jesus la atende feto nee nia pedido tanba feto nee laos pertence ba judeu………Jesus afirma posição nee hodi dehan:”Hau mai tan deit bibi-oan sira nebe lakon housi Israel nia uma laran”.

 

BA DEIT BIBI SIRA NEBE LAKON HOUSI ISRAEL NIA UMA LARAN?

Tuir Evangelista Mateus, Jesus nia afirmação nebe dehan: ”Hau mai tan deit bibi oan sira nebe lakon housi Israel nia uma laran” (Mt 15,24), nee basea duni ba costume nebe hateten katak; maksoyn mai husi Maromak leten aas ba hodi salva deit povo Israel nebe naklekjar iha rai oioin…..maksoyn ida nee mai laos ba ema sira nebe la pertence ba povo escolhido. Maibé, entre sira nee, iha mos entidade judeu balu nebe consciente katak ema liur mos bele hola parte iha promessa salvação nee. Salvação laos ona exclusivo ba  judeu eh povo escolhido deit maibé, bele mos ba ema hotu. Conversa entre Jesus ho feto nee bele justifica conseito salvação nee (Mt 15, 26-28). Maske fofoun Jesus la atende feto nee, maibé, tan feto nee harohan bebeik ikus mai nia ninia fiar nee hetan duni resposta husi Jesus nudar Maksoyn.

 

Jesus rasik iha Ninia afirmação uluk, hakarak mos express aba feto nee katak Jesus nia presence nudar maksoyn la merece ba nia. Tanba nee mak Jesus hateten: :”la bele kaer oan sira nia hahan atu soe ba asu oan sira” maibé, argumento fiar nebe feto nee tenik ba Jesus dehan: :”Haraik mai, Nai, tan asu oan sira hili hahan mumun monu housi nain sira nia mesa!” 

Expressão fiar feto nian nee ho haraik-an maibé, expressa ninia fiar nebe profundo ba Jesus nia tulun nudar Maksoyn. Tanba nee mak Jesus fo kedas resposta nebe feto nee hein hodi dehan:” Feto, o nia fiar boot duni. O sei hetan buat nebe o hakarak”. Jesus fo resposta nee tan deit nia mos consciente katak salvação nebe Jesus lori mai mundo laos ba deit ema Israel maib, ba mundo tomak. Ex-presidente Indonesia Abdul rachman Wahid “GUS DUR” dala ida dehan: Jesus laos makoyn ba Cristão sira deit maibé, Jesus maksoyn ba mundo tomak. Ema nebe fiar no husu Maromak nia tulun, nia merece hetan ninia resposta.

Nunee, sai claro ona mai ita katak; Maksoyn nebe apresenta iha Jesus nia figura no doutrina sira, ohin loron merece ba ema hotu iha mundo rai klaran. Jesus rasik dehan: buka ba…o sei hetan…dere odamatan ba….odamatan sei loke ba o…..feto nebe ita rona iha Evangelho Domingo semana nee, fo exemplo kona ba lalaok nee. Assim seja  (ignaslopes)

Leave a Reply

Your email address will not be published. Required fields are marked *