shadow
Diocese de Dili > NOTÍCIAS > LETURA DIÁRIA > Quarta Feira, XX Semana Tempo Comum

Quarta Feira, XX Semana Tempo Comum

Ano A

 

Primeira Leitura                                           Ez 9,6-15

Lia housi Livro Profeta Ezequiel nian

Na’i lia tun mai ha’u nune’e: “Emar nia oan, ó si’ik hasouru bibi-atan sira Israel nian. Ó si’ik hodi dehan ba bibi-atan sira ne’e: Na’i Maromak dehan nune’e: Aat tebes ba bibi-atan sira Israel nian nebé tau matan ba sira an rasik. La’os ba bibi sira mak bibi-atan sira sei tau matan? Imi hasai susu-uén ba imi nia ai-han, bibi malae fulun ba imi nia hatais, Imi óho balada sira be bokur tebes hodi hasa’e sakrifício, maibé, imi la lori sira ba du’ut matak.  Imi la fo han balada sira be kbiit láek; la tau matan ba sira be moras, la tau ai-moruk ba sira nebé kánek. Imi la lori hikas mai luhan bibi nebé la’o dook housi luhan no mos la buka tuir bibi sira nebé lakon. Imi haré sira ho lia maka’as no todan. Sira la’o namkari tiha, tan bibi-atan la iha; sira sai nu’udar ai-han balada  fuik sira nian, tan sira la’o namkari dook. Ha’u nia bibi sira la’o hela iha foho sira leten, la’o namkari hela iha rai tomak; ema ida la hanoin atu tau matan ba sira, ema ida la buka atu halibur sira”. Tan ne’e, bibi-atan sira, imi rona Na’i Nia lia fuan ba: Tebes duni, nu’udar Ha’u moris Na’i Maromak dehan nune’e Ha’u sei husu konta ba imi, tan Ha’u Nia bibi sira la iha bibi-atan, husik hela iha na’uk ten sira liman hodi sai tiha nu’udar ai-han balada fuik sira nian.  Basá, Ha’u Nia bibi-atan sira, la kohi tau matan ba Ha’u Nia bibi sira.  Sira tau matan de’it ba sira an rasik, la lori Ha’u Nia bibi sira ba du’ut matak”. Tan ne’e, bibi-atan sira rona Na’i Nia lia ba. Na’i Maromak ko’alia nune’e: “Ha’u sei ba husu konta ba bibi-atan sira, Ha’u sei ba husu sira atu haraik hikas mai Ha’u, Ha’u Nia bibi sira. Ha’u sei la husik sira tau matan ba bibi sira, bibi-atan sira sei la tau tan matan ba sira an rasik.  Ha’u sei soi Ha’u Nia bibi sira housi sira ibun, sira sei la han tan Ha’u Nia bibi sira”. Basá, Na’i Maromak ko’alia nune’e: “Ha’u rasik mak sei tau matan ba Ha’u Nia bibi sira,  Ha’u sei haré didi’ak sira”.

Maromak Futar Lia. 

 

Salmo Responsorial.                                                                                                                            Sal 21,2-3,4-5,6-7                                         

Refrão :  Na’i ha’u Mahein, ha’u la kuran buat ida. Repete-se

                   Na’i ha’u nia mahein,

                   ha’u la kuran buat ida:

                   lori ha’u hakmatek iha du’ut matak,

                   lori ha’u ba ué malirin hodi haksolok ha’u klamar. Refrão

 

                   Nia lori ha’u kona dalan los tan hadomi Nia naran.

                   Maski ha’u la’o housi rai-kle’an nakukun ha’u sei la ta’uk buat aat ida,

                   tan Ita hamutuk ho ha’u.

                   Ita nia ai-tonka no ai-tato’an fo laran metin mai ha’u. Refrão

 

                   Ita hadi’a aihan mai ha’u

                   iha ha’u funu baluk sira oin.

                   Ho mina, Ita hamorin ha’u ulun;

                   ha’u cálice nakonu resin. Refrão

 

                   Laran di’ak no grasa sei la’o tuir ha’u,

                   lor-loron iha ha’u nia moris;

                   ha’u sei hela iha Na’i nia uma

                   tinan-ba-tinan nafatin. Refrão

 

Aclamação

Refrão : Aleluia, Aleluia.. Repete-se

                 Maromak Nia liafuan moris no book maka’as,

                 bele hatene lolos buat nebe ema hanoin no hakarak iha nia fuan. Refrão

 

Evangelho                                                                                                                                                                                            Mt. 20:1-16a

+ Na’i Jesus Cristo Nia Evangelho nu’udar São Mateus haktuir

Iha tempo nebá, Jesus haktuir aiknanoik ida ne’e ba escolante sira: “Reino Lalehan nian hanesan uma na’in ida nebé sai iha dadersan atu halo contrato ho ema serbisu na’in sira ba nia to’o ho uvas nian. Halo tiha contrato ho sira loron ida denarius ida, nia haruka sira ba nia to’os. Tuku sia, nia sai fali hodi hare ema sira seluk iha dalan la halo buat ida. Nia dehan ba sira: ‘Imi mos ba ha’u nia to’os, ha’u sei fo buat nebe los ba imi. Sira ba, Nia sai fali iha loron fahe rua, no mos tuku tolu loraik hodi halo nune’e nafatin. Tuku lima loraik, nia hetan tan ema seluk iha neba. Nia husu ba sira: ‘Tan sa imi hamriik loron tomak iha ne’e la halo serbisu ruma?’ Sira hatan, ‘Ema la bolu ami.’ Nia dehan ba sira: ‘Imi mos ba ha’u nia to’os.’ Iha loraik, to’os na’in dehan ba mandor: ‘Bolu serbisu na’in sira hodi selu nia kolen, hahu housi sira ikus to’o sira uluk.’  Serbisu na’in sira nebe mai tuku lima loraik hakbesik hodi simu ida-idak denariu ida. Uainhira sira nebe uluk mai, sira hanoin atu simu liu maibe sira mos simu ida-idak denariu ida. Simu tiha osan, sira hamuu hasouru uma na’in hodi dehan: ‘Sira nebe ikus ne’e serbisu oras ida de’it, ó selu sira hanesan ami, nebe terus kole ho manas loron tomak.’ Nia hatan ba sira: ‘Ha’u belun, ha’u la hasouru ha’u lia ba ó:  ita la halo contrato denariu ida ba loron ida?  Ne’e duni, simu buat nebe ó nian hodi ba ona. Ha’u hakarak fo ba ida ikus ne’e hanesan ha’u fo ba ó. Ha’u la bele halo nu’udar ha’u hakarak ho ha’u nia rikusoi? Ka ó laran moras tanba ha’u laran di’ak?” Nune’e sira nebe ikus sei sai uluk, sira nebe uluk sei sai ikus.”

Lia Maksoyn.

Leave a Reply

Your email address will not be published. Required fields are marked *