shadow
Diocese de Dili > NOTÍCIAS > OPINIÃO > CONHECE MAROMAK LIUHUSI BÍBLIA

CONHECE MAROMAK LIUHUSI BÍBLIA

Atu hatene no conhece didi’ak Sé mak Maromak, ita tem que hatene uluk lai saida mak Bíblia; atu hatene saida mak Bíblia no conhece didi’ak nia conteudo sira, tem que hatene oinsá mak atu lé no hatene Livro-Lulik ne’e.

DOMINGOS DE DEUS MAIA (+67077762489)

 

SE MAK MAROMAK?

Hahú husi esperiénsia bain-bain, oinsá atu conhece ema ida? Iha maneira oin tolu atu conhece didi’ak ema ida:

  1. Ida dal-uluk, bazeia ba preconceito :

Ha’u haree ema ida no hahú imagina nia ne’e sé. Nia sai ema nebé tuir ha’u-nia hanoin, ha’u-nia preconceito; la’os ema ne’e loloos.

      2.  Ida da-ruak, bazeia ba saida mak ema seluk dehan kona-ba ema ne’e :

Ha’u la bele conhece didi’ak Nação ida bazeia deit ba saida maka governante sira husi acção ne’e dehan. Tan ne’e, ha’u mos la bele conhece didi’ak ema ida bazeia deit ba saida mak ema seluk dehan kona-ba nia. Exemplo barak: Foin-sae sira ko’alia maka’as kona-ba solidariedade; maibé, la bele hadian rasik sira-nia kama/toba-fatin, iha dadeer, hafoin hader; mane sira hakilar kona-ba direito humano; maibé, trata-aat sira-nia feen hanesan atan; nsts. Katak ema nia hahalok sira la reflete tuir sira-nia liafuan nebé declara ba ema seluk.

     3. Ida da-toluk, atu conhece ema ida, mak tem que moris hamutuk, hamaluk, hadulur ho nia. Liu husi moris-dulur (convivência) ne’e maka ema idak-idak hatudu loloos nia an rasik ne’e sé ho nia qualidade no defeito sira.

 

Atu habadak ida ne’e katak: Tuir loloos, ita hatene deit mak karikatura kona-ba Maromak tuir ema seluk-nia pintura (husi  hanoin nai-lulik, religioso, catequista no husi fiar-nain sira seluk). Ita rasik la buka hatene no conhece didi’ak Sé Maromak.

Iha Evanjellu afirma loloos katak Jesus Cristo deit maka conhece loloos Nia Aman Lalehan nia hakaran sira. No Nia deit mak sai Dalan, Lialoos no Moris (Jo 14,6).

Maske teologia medieval define katak Maromak nu’udar oniciente (hatene buat hotu), onipresente (presente iha tempu no fatin hotu-hotu), omnipotente (kbiit aas-liu buat hotu-hotu), nst; maibé bainhira ita loke Evanjellu sira, ita haree katak Nia (Jesus) makhoris frájil ida nebé moris hamutuk ho ema ki’ak no kbit-laek sira, tanis tanba belun mate, senti hamlaha, discute eh haksesuk ho Nia escolante sira, hatudu-An nervozu (raiva) ho fariseo sira, tauk ho Liurai Herodes, hatene tentacção, tauk iha agonia laran, senti-An hewai husi Aman Maromak, nst.

Ba Testamentu Foun (TF), atributu Maromak nian mak domin; tanba domin ne’e mak Jesus mai mundo, husi Maromak, atu soi ema maksalak sira. Haree husi apóstolu João nia surat ida dal-uluk nian, claro loloos, “Maun-alin doben sira, ita hadomi malu, tanba domin mai husi Maromak. Sé mak hadomi, nia moris ona husi Maromak no conhece ona Maromak.Se mak la hadomi, la conhece Maromak tanba Maromak mak domin (1Jo 4, 7 e 8).

Ba ema gregu sira, nebé haktuir definição Medieval nian kona-ba Maromak (be bele buat hotu-hotu), domin la sai atributu husi maromak (lulik) sira, tanba ba sira, buat necessidade (carência) ida, katak bainhira sira imagina eh hanoin hetan relacção di’ak ho objeto (sasaan) ida nebé sira hadomi, ida ne’e mak sai ona maromak ba sira (idolatria).

Ho sentido ida ne’e, Jesus mak Maromak loloos tanba Nia hadomi momoos nu’udar Aman Maromak hadomi; tanba ne’e, Nia sala-laek (isento do pecado); Nia domin ne’e nakunu (perfeito). Jesus mak ema nebé decentrado husi Nia-An no sentrado iha Aman Maromak no povu. Katak haktuir deit Aman nia hakaran sira hodi fó nia An ba soi ema husi salan sira.

Ho Conceito Maromak-Domin ne’e mak harii Creda nia fundamento ida klean ho lala’ok: fraternidade no colegialidade, la’os autoritárismo. Conceito ida ne’e mos loke dalan-luan atu sira descobre Maromak nia prezensa iha ema hotu nebé fiar-laek; maibé, sira hatudu nafatin domin iha sira-nia lala’ok no hahalok sira. No Maromak presente mos iha ema fiar-laek sira.

Jesus nia domin rohan-laek, la fihir no haketak ema ida nia moris : Nai Jesus identifica-An ho ema sira nebé precisa tebes domin no sira nebé hetan hanehan husi ema kbiit-nain no sistema sosio-culturál-religioso oin-oin : “Ha’u hamlaha, …;Ha’u hamrook, …;Ha’u lao-rai, …; Ha’u isin-tanan, … ; Ha’u moras, … (Mat 25 : 42-43).Sira mak sai nu’udar Jesus nia An no hola-fatin aas-liu iha Reino Maromak nian. Tan sira mak Maromak revela Nia domin iha Nia Oan Mane Mesak, Jesus Cristo, ita-nia Maksoi. Atu hatene momoos Sé mak Maromak, no sai Jesus nia escolante loloos mak tem que hatene no conhece Bíblia hodi iha fiar metin no brani hakbesik, ho laran-luak, ba ema sira ki’ik no kbiit-laek ne’e.

 

SAIDA MAK BÍBLIA?

Liuhusi Universu, ema bele koko hatene Maromak; liuhusi natureza, bele mos hatene Maromak nia beran boot; liuhusi acontecimento boboot sira, bele deit hatene Maromak nia designio (hakaran); liuhusi ema no profeta sira, bele hatene Maromak nia dalan, nia orientacção. Maibé, liu-liu, mak liuhusi Bíblia no Futarlia Maksoi, Jesus Cristo, ita Na’i. La hatene Bíblia, sei la hatene duni Se mak Jesus Cristo; se la hatene Cristo, sei la hatene loloos Sé mak Maromak. Nune’e, saida mak Bíblia?

 

Sentido Literáriu Bíblia nian: Bíblia ka Livro-Lulik ne’e mak liafuan ida nebé nia orijen mai husi lia Grega significa livro ka biblioteca, ka livro nobun ida nebé escrito. Bíblia Katólika nian: Testamentu Tuan (TT) no Testamentu Foun(TF) hamutuk iha livros 73 (TT nian 27 no TF nian 46). TT hakerek kona-ba acontecimentos no profeta sira nia liafuan molok Cristo moris; TF hakerek kona-ba misaun Jesus Cristo nian, iha mundo, hamutuk ho Nia escolante sira.Tuir Creda nia norin, katak Autór sira nebé hakerek Bíblia, sira uza sira-nia kakutak matenek no lia ema nian (Armaika, Ibrani, Grega no Latin) oin-oin hodi hakerek Bíblia; maibé, inspiracção husi Espíritu Maromak nian (Konst. Dog. Dei Verbum). Tanba ne’e, Maromak maksai nia Autór Ulun, ka Nain ba Nia Futarlia rasik. Nune’e, ita mos bolu kerek-nain sira ne’e Autor Sagrado.

Bíblia mak kbiit inspiradora no fonte klean ba revelacção: Inspiracção no hatudu-An (revelação), la’os hatuun deit ba Autór Sagradu sira nebé hakerek Bíblia; maibé, hatuun nafatin, liuhusi Espíritu Santu, ba ema sira nebé mak badinas lé no reflete beibeik Sagrada Escritura; kbiit inspiracção no revelacção haksumik hela iha Bíblia atu halo ita entende/komprende Nia Futarlia.

“Nune’e Jesus loke sira-nia neon atu entende Sagrada Escritura (Lk 24:45). Bíblia nebé hakerek ona Maromak nia liafuan sira iha kbiit atu sunu no hamanas ema nia fuan, “Nune’e ida hateten ba ida seluk, “La halakan ita-nia fuan bainhira Nia ko’alia iha dalan no esplika Escritura ba ita?” (Luk 24:332).

Se la lee Bíblia, ita lohi-an no lohi-malu tanba la hatene kona-ba Maromak nia kbiit/beran iha Bíblia, “Imi bosok ona, tanba imi la hatene Bíblia no mos kbiit Maromak nian” (Mat 22:29).Bíblia mak roman atu leno ita dalan iha nakukun-laran, “Roman sei iha imi leet, buka la’o bainhira imi sei iha roman atu nakukun la hatauk imi.

Se mak la’o iha nakukun-laran la hatene atu ba los nebé” (Jo 12:35). Ho Bíblia ita hatene Maromak nia hahalok sira nebé hakarek tiha ona iha Bíblia-laran, “Ó-nia matan haree Ha’u-nia hahalok sira, nebé hakerek hotu iha ó-nia livro (Sal 139:16).

Ita harohan atu Na’i haraik mai ita Espítu Santu nia matenek no revelacção atu hatene loloos Nia” (Ef 1:17); segredu nebé naksumik iha Bíblia sei hatudu momoos mai ita hanesan hakerek tiha ona (Ef 3:3).

Bíblia mos iha kbiit-boot atu julga eh halo justisa ba ema no kbiit-aat sira, iha mundo ne’e, “Oras ne’e ulun-aat sira mundo nian sei hetan duni-sai husi ne’e (Jo 12:31); no sei iha exemplo barak liután nu’udar prova kona-ba Bíblia nia kbiit no beran atu tane ema-nia maksoin iha mundo ne’e.

 

OINSÁ KONHESE MAROMAK LIUHUSI BÍBLIA?

La hadook-an tiha husi problema reál sira leten, mai ita buka dalan oinsá atu hatene uluk saida mak Bíblia; hafoin buka maneira oinsá deit atu hatene lee Bíblia; no tuir fali, maka ita halo atividade treino-an atu oinsá hatene no lee Bíblia; hafoin, ita buka meiu/fasilidade oin-oin no fatin própriu atu hala’o treino lee Bíblia.

Maromak konfia ba ema obra boot rua: Moris no Bíblia. Ida fótulun ba ita atu komprende di’akliu ida seluk. Tanesan obra-boot rua ne’e: (i) Moris hanesan estrada ida nebé ita la’o liu bá; (ii) ida seluk, mak Bíblia hanesan mapa-rodoviáriu ida nebé fó vizaun di’akliu kona-ba estrada ho nia ligacção ho dalan-kiik sira seluk.

Haree ba moris ne’e ho ita-nia matan rasik, kiik/limitadu, labele haree buat hotu, iha universu, hanesan ita haree estrada eh liuron ida; ho ema-nia matan, haree deit mak kurva ida-idak; ai, fatuk no foho sira iha dalan sorin-sorin. Maibé ho tulun husi mapa rodoviáriu ida, ita haree husi dezeñu kona-ba estrada tomak tuir nia distánsia kilómetru hira, hahú husi nebé no ba to’o iha nebé. Nune’e mos, bainhira ita haree moris ne’e ho pájina sira Bíblia nian, mak ita haree moris ho Maromak nia matan rohan-laek nian hanesan ita haree estrada ho mapa-rodoviáriu ida. Nuneé Mak ita bele hatene momoos moris ne’e oinsá, hahú husi nebé no atu la’o ba to’o iha nebé, tuir Maromak nia hakaran.

 

Pasajen Importante rua sai nuudar báze atu ita hatene mak :

(1)Pasajen ida dal-uluk, foti husi 1 João 4, 7-8, kona-ba Maromak nia domin : “Maun alin sira, ita hadomi malu tanba domin mai husi Maromak. Se mak hadomi, moris ona husi Maromak no conhece ona Maromak.Se mak la hadomi, la conhece Maromak, tanba Maromak mak domin”. Ba Testamentu Foun (TF), atributu prinsipál Maromak nian mak domin. Ema moris sai nú gravadór mamuk ida. Laiha bateria/pilla, nia la funsiona ida. Maromak mak Fornesedór bateria ne’e atu ema-nia moris funsiona eh la’o.

 

(2) Pasajen ida da-ruak, foti husi 1 Kor 13 : 1-13. Temi mos “Hino do Amor”. Nia títulu mak domin aas-liu buat hotu (ou o amor acima de tudo).Loos duni, moris no domin sai dimensaun ida deit iha makhoris sira. Moris mak domin, no tan domin-boot Maromak nian, mak mosu moris ne’e; no Na’i Maromak Kriadór mak huun no rohan husi  moris ne’e; no Nia mak moris ne’e duni (Deus da vida e é a vida). Domin-boot rohan-laek ne’e revela ba emar aira nebé Nia hadomi tebes liuhusi Hitória Salvacção no hakerek tiha ona iha Bíblia Sagrada. Portadór-Ulun nebé hetan kredensiál husi Aman Maromak atu lori Karta (Bíblia)- domin ne’e mak Nia Oan Mane rasik, Jesus Cristo, Mane Maksoi.

 

SENTIDO PRÁTIKU DOMIN (Agapé, Fillos no Eros)

Bíblia mak Karta-Domin nian husi Maromak ba emar sira nebé Nia hadomi tebes. Ne’ebé, Karta eh Bíblia ne’e nia forma oin-oin no nia conteudo mos oin-oin :(1) Uluk nanain, Maromak mak hatudu (revela) Nia domin-(agape). Ida ne’e mak domin ida nebé loos no aasliu hodi hakiak no soi ema hotu.(2) Ida tuir fali, mak domin-(fillos) nebé husi Maromak hotu; maibé hatudu (espressa) ho lala’ok, hahalok, linguajen no símbolismu culturál ema (humano) nian.(3) Ida ikusliu, mak domin-(eros), tuir nia natureza (natural/instintivo/animalia), iha hotu nia kbiit atu hamoris, hakiak no haburas; maibé, dala wain, ema uza-sala kbiit ne’e hodi hatudu-sai iha lala’ok no hahalok hirak nebé destrutivu (amorál) liu hanesan animal-fuik.

Iha Bíblia relata hotu esperiénsia hirak ne’e iha: nia di’ak no aat, loos no sala; maibé, Maromak tau nia Ukunfuan-Morál sira hanesan matadalan ida atu ita ema fihir no haktuir deit ida nebé mak tuir Maromak nia hakaran loos no soi ema nia moris-ksolok.

Bíblia nia conteudo-domin, nebé mak loos ona, tahek (cristaliza) tiha ona husi ema-nia moris bain-bain (experiência) tuir otas ezisténsia ema nian, husi dalas-sékulu ba sékulu. No ho Bíblia mak bele tahek moos fali ema idak-idak no ema nobun nia moris, loro-loron. Iha Bíblia ita haree no fihir domin-loloos husi Maromak hodi hatene la’o tuir Maromak nia Dalan-Loos, Lia-Loos no Moris-Loos iha Jesus Cristo, Ita Na’i Maksoi (Jo 14,6).

 

Ita bele habadak deit katak : Biblia mak Surat-Domin (agapè) rohan-laek nian husi Aman Maromak ba Nia emar sira nebé mak Nia hadomi tebes, iha rai-kdok ida. Nune’e mos, Bíblia mak Surat-domin (fillos/filial) husi inan-aman ba oan sira, nebé estuda iha rai-liur; no surat-domin husi namoradu ba namorada, nebé hakarak duni atu hasoru-malu, iha biban-leet ida; surat-domin husi laen nebé serbisu, iha rai-kdook, ba nia feen, nebé hein matan-mean hela, iha uma; husi belun di’ak ida ba belun di’ak seluk, iha tempu susar. Ema hotu koko ona ambiente saudade domin ida ne’e, bainhira hela ketak-ketak tiha iha fatin-kdook, moris ho separacção kleur, iha distánsia ida kdook tebes, oinsá nia senti saudade (kerinduan mendalam) klean ba malu.

Surat-domin ne’e mak reprezenta nia an (autor) rasik hodi hasoru malu husi distánsia ida, nebé fisicamente kdook; maibé besik liu ba idak-idak-nia fuan-klean. Saida mak hakerek iha surat ne’e nia laran (o conteúdo) ho expreção liafuan sira mesak midar no hafutar tan nia ho illas figurativa, afetiva no simbolismo romántica mesak furak; waoo apai, …,halo ida be simu (receptor) nia laran fekit maka’as ho ksolok! Nia senti ba liman-ain halolo-mamar tiha hanesan ema la’o-raiida be hetan ona oázis ida iha we malirin, iha raifuik-maran! Nia liafuan sira atrai, soran tebes nia laran-domin! Xoke tan nia sentimentu-domin ne’e nakali, kesi-metin liután nia relacção espirituál ida be aas-liu! Halo ida nebé mak simu (receptor) surat-domin ne’e senti lalehan no rai naktabit-malu tiha! Ai-han ho modo-ween bele furak oinsá iha meza-leten, senti ba, iha oras ida ne’e, la senti midar, la furak liu surat-domin ne’e! Lee surat-domin ne’e la kotu, la nahas deit – lee tiha, hanehan tiha xumasu-okos; la kleur, senti la hakmatek liu, foti ba lee fila fali, la bosan deiiit …!

Surat (Bíblia)-domin ne’e mos iha nia kbiit wain tebes atu hafoun ema-nia espíritu, motiva, inspira, fó aten brani ba ida lee-nain ne’e hodi hulan naha-todan sira, loro-loron, ho pasiénsia no laran-kman deit, durante sira-nia auzénsia fízika. Karik ho ilustracção husi moris baibain ne’e mak bele hatudu (espressa) katak Bíblia nia kbiit misteriozu ne’e naksumik hela iha kada Versíkulu no Kapítulu sira. Bainhira ita lee beibeik, sé deit mak sai leitór badinas, sei descobre (desvendar) duni segredu domin boot rohan-laek husi Aman Maromak, liuhusi Nia Oan Mane Fudin, Jesus Cristo hamutuk ho Espítitu Santu, iha deit Bíblia.

Leave a Reply

Your email address will not be published. Required fields are marked *