shadow
Diocese de Dili > NOTÍCIAS > LETURA DIÁRIA > Sabado, XX Semana Tempo Comum

Sabado, XX Semana Tempo Comum

Ano A

 

Primeira Leitura                                                                                                                                                                              Ez 9,6-15

Lia housi Livro Profeta Ezequiel nian

Iha loron hirak neba, Anjo lori ha’u ba to’o templo nia odamatan nebe fila ba Loro-Sa’e. Gloria Maromak Israel nian mai housi Loro-Sa’e ho tarutu boot ida hanesan ué boot nian, no rai sai naroman ho Nia gloria. Mehi ida ne’e, hanesan ida be ha’u hetan ona uainhira ha’u mai atu harahun ciadade, no hanesan ida be ha’u hetan ona iha mota Quebar nia ninin. Nune’e, ha’u monu taka oin ba rai. Na’i Nia gloria tama iha templo housi odamatan nebe fila ba Loro-Sa’e. Espirito foti ha’u hodi tau ha’u iha templo laran; gloria Na’i Nian hakonu tiha templo. Tuir mai, ha’u rona ema ida ko’alia mai ha’u housi templo laran, uainhira ha’u nia maluk hamriik hela iha ha’u sorin. Nia ko’alia mai ha’u nune’e:  “Emar nia oan, iha ne’e mak fatin Ha’u trono nian, fatin nebe Ha’u ain hamriik ba: iha ne’e mak Ha’u sei horik nafatin iha Israel oan sira nia leet”.

Maromak Futar Lia.

 

Salmo Responsorial. 

Refrão :  Na’i Nia gloria sei horik nafatin iha ita rain. Repete-se

                   Ha’u rona buat be Na’i dehan:

                   Maromak fo hatene dame ba Nia povo no Nia sarani.

                   Nia maksoin besik ba ema be hamta’uk Nia;

                   Nia gloria horik iha ami rain. Refrão

 

                  Laran di’ak no domin sei hasouru malu,

                  dame no justisa sei hako’ak malu. Laran di’ak sei tubun housi rai,

                   justisa  sei tun mai housi Lalehan. Refrão

 

                   Na’i sei haraik buat nebe di’ak, ita rain sei fo fuan.

                   Justisa sei la’o iha Nia oin, dame sei sama tuir Nia ain fatin. Refrão

 

Aclamação

Refrão : Aleluia, Aleluia… Repete-se

                Imi Aman ida de’it, Aman lalehan; imi nia Mestre ida de’it,

                Na’i Jesus Cristo.  Refrão

 

Evangelho                                                                                                                                                                                          Mt. 23:1-12

+ Na’i Jesus Cristo Nia Evangelho nu’udar São Mateus haktuir

Iha tempo nebá, Jesus ko’alia ba ema lubun boot no ba Nia Escolante sira dehan: “Escriba no fariseu sira tur iha Moisés nia kaderia. Ne’e duni, simu ba hodi halo tuir buat hotu nebe sira dehan ba imi;  maibe keta tuir sira nia hahalok, basa sira ko’alia maibe la halo. Sira futu naha todan no susar atu foti, hodi tau ba ema sira nia kbas, maibe sira rasik la book nia ho sira nia liman fuan ida. Sira halo buat hotu atu ema hare sira. Nune’e, sira kesi fita boot ida ba sira nia reen tos hodi hanaruk sira nia tais ninin; sira kaan atu tur iha fatin uluk iha festa sira hodi buka tur iha oin iha sinagoga laran; sira hakarak ema cumprimenta sira iha prasa hodi bolu sira  ‘Rabbi.’ Imi fali, keta husik ema hanaran imi  ‘Rabbi’,  basa imi nia Mestre ida de’it, no imi hotu mesa maun alin. Keta bolu ema ida aman iha rai, basa imi nia Aman ida de’it, nebe iha lalehan. Keta husik ema hanaran imi doutor, basa imi nia doutor ida de’it:  Cristo. Ida nebe boot liu iha imi leet sei sai imi nia atan. Ida nebe foti an, Na’i sei hatun nia; ida nebe haraik an, Na’i sei hahi nia.”

Lia Maksoyn.

Leave a Reply

Your email address will not be published. Required fields are marked *