shadow
Diocese de Dili > NOTÍCIAS > LETURA DIÁRIA > Terça Feira, XXI Semana Tempo Comum

Terça Feira, XXI Semana Tempo Comum

Ano A

 

Primeira Leitura                                                                                                                                    1Tes 1, 1-5, 8b-10

Lia housi São Paulo nia surat ba sarani sira iha Tessalónica

Maun-alin sira, kona ba ita Na’i Jesus Cristo nia hi’it An mai, no ita nia halibur malu ho Nia, imi keta laran taridu lalais eh ta’uk tanba “Espirito” ka  lia anin ruma ka surat ruma nebe, ema dehan, housi ami, hodi hateten katak Na’i nia loron to’o ona mai. Keta husik ema bosok imi nune’e. Housi Evangelho nebe ami lori, Nia bolu imi ba ida ne’e atu imi bele simu ita Na’i Jesus Cristo nia gloria. Ne’e duni, laran metin ba, maun alin sira, no kaer metin lisan nebe, ho liafuan housi ami nia ibun eh housi surat, ami hanourin tiha ba imi. Ita Na’i Jesus Cristo rasik, no Maromak, ita Aman, nebe hadomi ita no haraik tiha mai ita ksolok rohan laek no esperança lolos housi grasa, fo ksolok ba imi nia fuan no hametin imi iha buat hotu nebe imi halo eh ko’alia.

Maromak Futar Lia.

 

Salmo Responsorial.

Refrão : Na’i mai atu tesi lia ba mundo. Repete-se

  • Haklaken ba povo hot-hotu:

          “Na’i mak Liurai’. 

          Nia hari mundo metin, sei la nakdoko,

          Na’i ukun povo hotu ho justisa. Refrão

 

  • Lalehan haksolok ba, rai hananu ho ksolok ba,

          tasi no buat hotu iha tasi laran;

          rai luan ho buat moris tomak iha nia,

          haksolok, bidu ho ksolok ai sira iha ailaran. Refrão

 

  • Iha Na’i be sei hi’it-an mai Nia futar oin,

          Nia mai tesi lia ba rai,

          Nia tesi lia ba mundo ho justisa,

          no ba Ninia povo hotu hanesan. Refrão

 

Aclamação

Refrão : Aleluia, Aleluia… Repete-se

                 Maromak Nia liafuan moris no book maka’as, bele hatene lolos buat nebe       

                 ema hanoin no hakarak iha nia fuan. Refrão

 

Evangelho                                                                                                                                                                                    Mt. 23:23-26

+  Na’i, Jesus Cristo nia Evangelho nu’udar São Mateus haktuir

Iha tempo nebá, Jesus hateten nune’e: Susar ba imi, escriba no fariseu sira, laran makerek! Imi selu du’ut morin sira nia imposto hodi tau ba kotuk buat hirak nebe boot liu iha ukunfuan: justisa, laran luak no fiar metin. Tuir lolos, imi sei halo tuir buat hirak ne’e hodi la hewai buat seluk. Imi mata dalan matan delek sira ba ema matan delek sira. Imi tais susuk maibe tolan kuda camelo! Susar boot ba imi, escriba no fariseu sira, laran makerek! Imi hamos copo no bikan sira housi liur, maibe iha laran, sira nakonu ho na’uk no buat fo’er. Fariseu matan delek sira, hamos uluk copo no bikan laran ba atu bele sai mos iha liur.

Lia Maksoyn.

Leave a Reply

Your email address will not be published. Required fields are marked *