shadow
Diocese de Dili > NOTÍCIAS > LETURA DIÁRIA > Sexta Feira, XXI Semana Tempo Comum

Sexta Feira, XXI Semana Tempo Comum

Ano A

 

Primeira Leitura

Lia housi São Paulo nia surat ba sarani sira iha Corinto

Maun-alin sira: Cristo la haruka ha’u atu sarani maibe atu haklaken Evangelho, no la’os ho matenek ema nia liafuan nian, nune’e Cristo nia Cruz la bele sai folin laek. Lia menon housi cruz mak buat nebe beik ba sira nebe atu lakon ona, maibe mai ita nebe hetan maksoin daudaun, cruz ne’e mak Maromak nia biit. Basa hakerek nanis, “Ha’u sei halakon ema matenek nia matenek no ha’u sei tau ba sorin liafuan housi sira nebe hatene buat barak.” Ema matenek iha nebe? Escriba iha nebe? Mundo ne’e nia lia na’in iha nebe? Maromak la halo mundo ne’e nia matenek sai tiha buat beik? Basa iha Maromak nia matenek, mundo ne’e la hatene Maromak housi matenek, Maromak hakarak katak housi liafuan nebe ami haklaken hanesan buat beik, sira nebe fiar sei hetan maksoin. Ema judeu sira husu milagre, ema grego sira buka matenek. Maibe ami haklaken Cristo nebe mate iha cruz, nebe sai fatuk sidi ba ema judeu sira no buat beik ba ema grego sira; maibe ba sira nebe Maromak bolu, ema judeu ka grego, Cristo mak Maromak nia biit no Maromak nia matenek. Basa Maromak nia beik matenek liu ema sira nian; Maromak nia biit laek maka’as liu ema sira nia biit.

Maromak Futar Lia.

 

Salmo Responsorial.

Refrão : Na’i Nia laran luak hakonu iha rai…Repete-se

  • Hahí iha Na’i, ba, imi sira be laran mós,

          ema fuan sira be los, hahi Nia.

          Hahi Na’i ho citara,

          hananu ba Nia salmo ho harpa lian. Refrão

 

  • Na’i Nia lia fuan lós tebes,

          bele laran metin iha Nia liman nia hahalok sira,

          Na’i hadomi justisa no lialos, Nia domin nakonu rai tomak. Refrão

 

  • Na’i sobu fiar laek sira nia plano,

          hakra’ut povo sira nia projecto; Maibe,

          Na’i Nia plano hela ba nafatin,

          no Nia fuan nia desenho ba derasaan hotu. Refrão

 

Aclamação

Refrão Aleluia, Aleluia…Repete-se

                  Imi neon moris hodi hamulak nafatin atu imi bele

                   hamriik ho laran metin iha Mane Maksoi Nia futar oin. Refrão

 

Evangelho                                                                                                                                                                                  Mt. 25:1-13

+ Na’i Jesus Cristo Nia Evangelho nu’udar São Mateus haktuir

Iha tempo nebá, Jesus dehan ba escolante sira aiknanoik ida ne’e: “Reino Lalehan hanesan virgem na’in sanulu nebé kaer áhi-oan ida-idak hodi ba hasouru Noivo. Sira na’in sanulu ne’e, na’in lima beik, lima seluk matenek. Sira be beik, lori ahi-oan maibe la lori mina. Sira na’in lima be matenek lori mina iha vaso hamutuk ho ahi-oan. Tan Noivo lada’uk mai, sira matan dukur hodi toba tiha. Kalan fahe rua, sira rona lian ida nune’e: ‘Noivo mai ona ne’e, imi ba hasouru nia’! Virgem sira hotu hader hodi hadi’a sira nia ahi-oan. Sira nebe beik dehan ba matenek sira: ‘Fo imi nia mina mai ami, tan ami nia ahi-oan mate’. Maibe, sira nebe matenek dehan: ‘Keta la to’o karik ba ami no ba imi; di’ak liu imi ba buka ema nebe fa’an hodi sosa ba imi rasik’. Uainhira sira ba sosa, Noivo to’o mai. Sira nebe hein hela, tama ho nia atu han iha casamento, odamatan taka tiha. Ikus mai, virgem sira seluk to’o mai, hodi dehan: ‘Na’i, Na’i, loke odamatan mai ami’. Maibe, Nia hatan ba sira: ‘Ha’u dehan los ba imi, Ha’u la hatene imi’. Ne’e duni, matan moris neon na’in ba, tan imi la hatene oras ka loron”.

Lia Maksoyn.

Leave a Reply

Your email address will not be published. Required fields are marked *