shadow
Diocese de Dili > NOTÍCIAS > LETURA DIÁRIA > XXII, DOMINGO IHA TEMPO COMUM

XXII, DOMINGO IHA TEMPO COMUM

ANO A

 

Primeira Leitura                                                           Jer 20,7-9

Lia housi Livro Profeta Jeremias

Na’i, Ita halo ha’u laran monu ba Ita, hodi husik ha’u laran tuir Ita; Ita laran manan ha’u, manan los  duni. Iha fatin tomak ema hamoe ha’u, ema tomak dehan aat ha’u. Uainhira ha’u hateten, sei hateten ho kbiit hodi haklaken: “Funu no aat!” Ba ha’u, Maromak nia lia-fuan mosu tiha hanesan lia hasara no lia aat. Nune’e ha’u dehan:  “ha’u sei la hanoin tan Maromak, ha’u sei la temi tan Nia naran. Maibe ahi ida hamanas hela ha’u neon, metin los iha ha’u ruin. Ha’u buka halakon tiha, maibe, ha’u la tahan.

Maromak Futar Lia.

 

Salmo Responsorial                                                                                                                                    sal. 62(63), 2.3-4.5-6.8-9

Refrão : Ha’u nia Maromak, ha’u klamar buka Ita… Repete-se

  • Na’i, ha’u nia Maromak, ha’u buka Ita;

          ha’u klamar buka Ita nafatin.

          Ha’u isin buka Ita, nu’u rai maran buka wé. Refrão

 

  • Ha’u hakarak hahi Ita iha kadunan,

           hare Ita nia kbiit no gloria.

           Ita nia domin di’ak liu moris tomak,

           ha’u ibun hana’i Maromak. Refrão

 

  • Ha’u sei hahi kalan loron,

           sei foti ha’u liman ba Maromak.

           Ha’u sei hetan tulun tomak;   

           ha’u ibun la kole hahi Maromak. Refrão

 

  • Maromak tahan ha’u nafatin,

           ha’u haksolok ho Maromak nia tulun.

           Na’i, hamutuk ho Ita, ha’u hetan di’ak,

           Na’i tahan ha’u ho Nia liman. Refrão

 

Segunda Leitura                                                                                                                                              Rom. 12,1-2

Lia housi São Paulo nia surat ba sarani sira iha Roma

Maun-alin sira: Ha’u husu ba imi, tan Maromak nia laran luak, atu imi hasa’e imi nia an rasik ba Maromak; hasa’e hanesan buat karan moris, buat santo no kmanek ida. Imi sei hasa’e buat karan nune’e. Imi keta la’o tuir mundo; hadi’a imi-an ho neon foun, atu bele hatene Maromak nia hakaran:  buat nebe di’ak, buat nebe kmook, buat nebe di’ak liu hotu.

Maromak Futar Lia.

 

ACLAMAÇÃO                                                                                                                                                      Mt. 16,24

RefrãoAleluia… Repete-se

                   Na’i ko’alia: Ema nebe hakarak tuir Ha’u,

                   sei haluhan nia an rasik; simu nia cruz hodi tuir Ha’u. Refrão

 

Evangelho                                                                                                                                                             Mt. 16,21-27

Na’i Jesus Cristo nia Evangelho  nu’udar São Mateus haktuir

Iha tempo neba, Jesus hahu hanourin ba Escolante sira katak Nia sei ba Jerusalém hodi hetan terus ua’in housi ema katuas sira, na’i-ulun sacerdote sira no escriba sira; Nia sei mate, hafoin, liu loron tolu, moris hias. Pedro bolu ketak tiha Jesus hodi haksi’ak nune’e:  “Na’i, Maromak sei tulun Ita! Ita sei la hetan ida ne’e.”  Maibe, Jesus fila ba nia dehan:  “Sai housi Ha’u nia oin Satanás! Ó hakarak teri netik Ha’u dalan; Ó la hanoin tuir Maromak, maibe, tuir ema nia hanoin.”  Hafoin, Jesus dehan ba Escolante sira:  “Ema nebe hakarak tuir Ha’u, sei haluhan nia an rasik; simu nia cruz hodi tuir Ha’u. Tan ema nebe hakarak soi nia moris sei lakon moris ne’e; maibe, ema nebe lakon nia moris tan Ha’u, sei hetan fali. Tebes, folin di’ak ba ema, manan mundo tomak, maibe, lakon nia moris rasik? Mane Maksoin sei mai fali iha Nia Aman nia kbiit, hamutuk ho Anjo sira; iha ne’e, Nia sei haraik di’ak ba ema ida-idak tuir nia moris.

Lia Maksoyn.

Leave a Reply

Your email address will not be published. Required fields are marked *