shadow
Diocese de Dili > NOTÍCIAS > LETURA DIÁRIA > Segunda Feira, XXI Semana Tempo Comum

Segunda Feira, XXI Semana Tempo Comum

ANO A

 

Primeira Leitura

Lia housi São Paulo nia surat ba sarani sira iha Corinto

Maun-alin sira: Uainhira ha’u to’o ba imi hodi haklaken Maromak Nia misterio, ha’u la mai ho lia sasin kmanek sira ka ho matenek. Basa ha’u decide atu la bele hatene buat seluk iha imi leet; ha’u hatene de’it Cristo Jesus no Nia nebe ema hedi iha Cruz. Uainhira ha’u iha imi leet, ha’u kbiit laek, hodi ta’uk no nakdedar tebes, no ha’u ko’alia no haklaken, la’os hodi lia maka’as matenek  nian, maibe hodi kbiit Espirito Santo nian, nune’e imi nia fiar bele hari metin, la’os iha ema nia matenek maibe iha Maromak nia kbiit.

Maromak Futar Lia.

                                                                                                     

Salmo Resp.

Refrão :  Na’i ha’u hadomi tebes Ita lei. Repete-se

  • Na’i ha’u hadomi tebes Ita lei, loron tomak ha’u hanoin nia.

           Ha’u matenek liu ha’u funu baluk sira,

           tan ha’u hamutuk nafatin ho Ita lei. Refrão

 

  • Ha’u matenek liu ha’u mestre sira, tan ha’u hanoin Ita lei.

           Laran mos liu fali katuas sira,

           tan ha’u halo tuir Ita ukunfuan. Refrão

 

  • Ha’u hadook an housi dalan aat, atu moris tuir Ita liafuan.

          Ha’u la hadook-an housi Ita hanourin,

           tan Ita rasik mak hanourin ha’u. Refrão

 

Aclamação

Refrão :  Aleluia, Aleluia … Repete-se

                   Na’i Nia Espirito horik iha Ha’u.

                   Nia haruka Ha’u haklaken Lia-foun ba kiak sira. Refrão

 

Evangelho                                                                                                                              Lc. 4:16-30

+ Na’i Jesus Cristo Nia Evangelho nu’udar S. Lucas haktuir

Iha tempo nebá, Jesus mai iha Nazaré, iha nebe Nia sai boot. Tuir Nia lisan, Nia tama iha sinagoga iha loron sábado. Nia hamriik atu lê. Sira fo ba Nia livro profeta Isaías nian. Loke tiha livro ne’e, Nia hetan fatin ida nebe hakerek nune’e:  “Na’i nia Espirito iha Ha’u, basa Nia foti tiha Ha’u atau haklaken maksoin ba dadur sira no halo matan delek sira hare; atu soi sira nebe ema hanehan, hodi haklaken Na’i nia tinan rahun kmanek nian.”  Hafoin, taka tiha livro, Jesus fo fali nia ba knar na’in. Nia tur tiha. Ema hot-hotu iha sinagoga laran hateke ba Nia. Tuir mai, Nia hahu ko’alia ba sira dehan:  “Ohin halo tuir los duni liafuan Escritura nian nebe imi foin rona.”  Sira hotu ko’alia di’ak kona ba Nia; hodi hakfodak, tan liafuan kmook nebe sai housi nia ibun. Sira dehan:  “Ida ne’e la’os José nia oan?”  Nia hatan ba sira:  “Tebes duni, imi sei hateten mai Ha’u aiknanoik ida ne’e:  ‘Doutor, fo isin di’ak ba ó nia isin rasik ba. Buat hotu nebe ami rona Ó halo iha Kafarnaum, halo mos iha ne’e, iha Ó nia rai.” Nia dehan teni ba sira:  “Tebes, Ha’u dehan ba imi katak ema la simu profeta ida iha nia rai rasik. Ha’u dehan ba imi katak ba imi:  iha Elias nia loron, iha feto faluk barak iha Israel, uainhira lalehan taka metin ba tinan tolu no fulan neen nia laran; rai tomak hamlaha boot; maibe Maromak la haruka Elias ba feto faluk sira ne’e ida. Nia haruka de’it ba feto faluk iha Sarepta, iha rai Sidonia. Iha Eliseu nia loron mos, iha ema moras lepra barak iha Israel, maibe sira ida de’it mak hetan isin di’ak, katak Naaman housi rai Siria.”  Rona tiha liafuan hirak ne’e, ema hotu iha sinagoga laran,  laran nakali teb-tebes. Sira hamriik hodi duni sai Nia housi cidade; hodi lori Nia to’o rai tatinis iha foho leten, iha nebe sira nia cidade hamriik hela, atu soe tun Nia housi neba. Maibe Jesus liu housi sira leet, la’o tuir nia dalan.

Lia Maksoyn.

Leave a Reply

Your email address will not be published. Required fields are marked *