shadow
Diocese de Dili > NOTÍCIAS > LETURA DIÁRIA > Terça Feira, XXI Semana Tempo Comum

Terça Feira, XXI Semana Tempo Comum

ANO A

 

Primeira Leitura

Lia housi São Paulo nia surat ba sarani sira iha Corinto

Maun-alin sira: Espirito Santo koko buat hot-hotu, to’o hatene momos Maromak. Iha ema sira leet, se mak hatene buat nebe iha ema nia laran; ema ne’e nia espirito de’it mak hatene buat nebe iha nia laran. Nune’e mos, ema ida la hatene Maromak nia laran; Maromak nia Espirito de’it mak hatene. Ita la simu mundo nia espirito maibe Espirito nebe mai housi Maromak, atu ita bele hatene lolos presente nebe ita simu housi Maromak hodi la selu buat ida. No ami hato’o buat sira ne’e, laos ho liafuan nebe ema nia matenek hanourin, maibe ho liafuan nebe Espirito hanourin, hodi hato’o lialos espiritual ho liafuan espirito nian. Ema nebe la’os espiritual la simu Maromak nia espirito nia presente, basa ba nia, buat ne’e mesa bulak, no nia la bele compreende nia basa nia bele hare de’it ho espirito. Maibe ema espiritual bele hare buat hot-hotu no ema ida la bele tesi lia ba nia. Basa, “Se hatene tiha Na’i nia hanoin atu bele hanourin Nia?”  Maibe ita iha Cristo nia hanoin.

Maromak Futar Lia.

 

Salmo Resp.

Refrão : Na’i justo iha Nia dalan hot-hotu. Repete-se

  • Na’i laran midar no laran-luak, la hatene hirus,

           laran di’ak nafatin.

           Na’i di’ak ba ema hotu,

           hanoin Nia criatura tomak. Refrão

 

  • Na’i, ema sira fo agradece ba Ita,

          Ita emar sira hahi Ita.

          Sira haklaken Gloria Itaboot reino nian,

          hodi tatoli ba malu buat foun Ita halo. Refrão

 

  • Atu fo hatene ba ema tomak Ita kbiit,

          no Ita reino nia kmanek ua’in;

          Ita Nia reino, reino ida rohan laek,

          Ita ukun to’o derasaan hot-hotu. Refrão

 

  • Na’i halo tuir duni Nia futar lia,

          la kuran buat ida iha buat hotu be Nia halo.

          Nia tahan ema sira be atu monu,

          Nia tulun ema sira be ema hanehan. Refrão

 

Aclamação

Refrão : Aleluia, Aleluia … Repete-se

              Profeta boot ida mosu tiha iha ita leet;

              Maromak mai hare tiha nia povo. Refrão

 

Evangelho                                                                                                                                                                          Lc. 4:31-37

+ Na’i Jesus Cristo Nia Evangelho nu’udar S. Lucas haktuir

Iha tempo nebá, Jesus tun ba Cafarnaum, cidade ida Galileia nian. Nia hanourin sira iha loron sábado. Ema sira hakfodak ho nia doutrina, basa Nia ko’alia ho biit. Iha sinagoga laran, ema ida ho espirito fo’er hakilar ho lia maka’as dehan: “Iha saida iha ami no Ó, Jesus Nazaré? Ó mai atu halo aat ami?  Ha’u hatene Ó se los:  Maromak  nia santo!”  Nia si’ak ema ne’e dehan: “Nonok no sai tiha housi nia!”  Soe tiha ema ne’e ba rai iha sira hotu nia oin, diabo sai housi nia, la halo aat ida ba nia. Sira hotu hakfodak no ta’uk, hodi hateten ba malu:  “Liafuan ne’e sa los? Ho kbiit no ukun, Nia haruka espirito fo’er sira sai, no sira sai duni!”  Jesus nia naran boot habelar iha fatin hot-hotu iha rai neba.

Lia Maksoyn.

Leave a Reply

Your email address will not be published. Required fields are marked *