shadow
Diocese de Dili > NOTÍCIAS > LETURA DIÁRIA > Quarta Feira, XXI Semana Tempo Comum

Quarta Feira, XXI Semana Tempo Comum

ANO A

 

Primeira Leitura

Lia housi São Paulo nia surat ba sarani sira iha Corinto.

Maun-alin sira: ha’u la bele ko’alia ho imi nu’udar ema nebe espiritual ona, maibe nu’udar ema isin nian, nu’udar labarik kiik iha Cristo. Ha’u fo tiha susuben ba imi, la’os aihan tos, basa imi seidauk hadi’a an ba nia. Tebes duni, oras ne’e mos imi seidauk bele han nia, basa imi sei ema isin nian. Basa uainhira sei iha laran moras no buka oin iha imi leet, imi la’os ema isin nian, hodi moris hanesan ema bai-bain?  Uainhira ema ida dehan, “Ha’u Paulo nian,”  no ema seluk  “Ha’u Apolo nian,”  imi la’os ema bai-bain de’it?  Apolo ne’e se no Paulo ne’e se?  Atan sira nebe tan sira imi hahu fiar, nu’udar Na’i foti ida-idak. Ha’u kuda, Apolo rega, maibe Maromak mak halo moris. Ne’e duni, ida nebe kuda eh ida nebe rega la folin ida;  Maromak de’it mak halo moris. Ida nebe kuda no ida nebe rega hanesan de’it, no ida-idak sei simu nia kolen tuir nia serbisu. Basa ami maluk nu’udar Maromak nia serbisu na’in, imi Maromak nia to’os, Maromak nia uma andar.

Maromak Futar Lia.

 

 Salmo Resp.

Refrão :  Ksolok ba povo nebe Na’i hili nu’udar Nia lima-rohan. Repete-se

  • Rahun-di’ak ba povo nebe hili Na’i ba nia Maromak,

           povo be Nia hili nu’udar Nia lima-rohan.

           Housi aas Lalehan Na’i hanoin,

           no hare ema hot-hotu. Refrão

 

  • Housi Nia horik fatin,

          Nia hanoin ema hot-hotu iha rai;

          Nia mak halo ema ida-idak nia fuan,

          Nia tau matan ba sira nia serbisu. Refrão

 

  • Ita klamar hein iha Maromak,

          Nia mak ita kbiit no ita mahein;

          Iha Nia, ita fuan haksolok,

          ita tau laran metin iha Nia naran santo. Refrão

 

Aclamação

Refrão :      Aleluia, Aleluia …Repete-se

                       Na’i Nia Espirito horik iha Ha’u.

                       Nia haruka Ha’u haklaken Lia-foun

                       ba kiak sira no fo liberdade ba dadur sira. Refrão

 

Evangelho                                                                                                                                                                             Lc. 4:38-44

Na’i Jesus Cristo Nia Evangelho nu’udar S. Lucas haktuir

Iha tempo nebá, husik tiha sinagoga, Jesus ba Simão nia uma. Simão nia banin feto moras boot, isin manas. Sira husu Jesus atu tulun nia. Hakru’uk tiha ba nia, Jesus duni sai isin manas, nebe sai kedas housi nia. Hafoin nia hamriik hodi serbi sira. Uainhira loron atu monu ona, sira hotu nebe iha ema ho moras oi-oin lori sira ba Jesus. Nia tula liman ba sira ida-idak, hodi fo isin di’ak ba sira. Diabu sira sai housi ema barak, hodi hakilar dehan:  “Ó Maromak nia Oan Mane!” Maibe Nia haruka hodi la husik sira ko’alia, basa sira hatene katak Nia mak Cristo. Iha dadersan, Nia sai hodi la’o ba fatin fuik ida. Ema lubun boot buka Nia. Hetan tiha Nia, sira hakarak katak Nia la bele husik sira. Maibe nia dehan ba sira:  “Ha’u sei haklaken mos liafoun di’ak Maromak nia reino nian ba rai selu-seluk; tan ne’e mak Ha’u mai.”  Ne’e duni, Nia la’o ba oin hodi hanourin iha sinagoga sira rai Judeia nian. 

Lia Maksoyn.

Leave a Reply

Your email address will not be published. Required fields are marked *