shadow
Diocese de Dili > NOTÍCIAS > Notícias > PARÓQUIA DARE IHA HELA VÉSPERAS BA TINAN 50 NINIA EXISTÊNCIA

PARÓQUIA DARE IHA HELA VÉSPERAS BA TINAN 50 NINIA EXISTÊNCIA

DCDD – D. Virgilio do Carmo da Silva Bispo de Dili, haktuir lia hirak ne’e wainhira preside missa abertura Cruz Jovem nian iha Paróquia S. Francisco Xavier Dare. Iha celebração refere participa housi Amo Vigário Assunto Educação, Pároco Dare, Nailulik sira, Madre sira, Autoridade sira housi Nacional, Município nomos Dare ninian, Civis e Militar, Conselho Pastoral  no sarani Paróquia sira nebé Pertence ba Diocese Dili. Bispo Dili oficialmente halo abertura atu Cruz Joven comessa lao hadulas foho Dare, Domingo, 27/08/2017.

Iha Reflexão D. Virgilio hateten: Paróquia Daré iha hela Vésperas ba tinan 50 ninia existência. Tinan 50 ne’e normalmente hanaran mos tinan Osan Mean nian. Hare fali kona ba história ne’e, Paróquia Dare mos laos ona labarik, laos ona mos Jovem, ita comapara karik ho ita ema nia moris karik ita nia loron tun dadaun. Ne’e duni, oportunidade diak sarani sira hare fali ita nia moris nudar sarani. Bispo hateten: Tinan 50 existência Paróquia Dare ninian, dalabarak ita haksolok, ita contente, consolação boot ida mak bainhira ita compara número sarani iha tinan 50 AGORA HO TINAN 50 liu ba ita dehan; Gentio iha Dare karik iha mos ita sura deit ho liman ona, laos hanesan tinan 50 liu ba. Além ita hare kona ba nia quantidade ou número boot, ita mos preocupa ho buat nebe ita bolu qualidade, significa sarani laos de’it iha Certidão Batismo, Crisma ona, Iha ona Certidão Casamento nian, maibe uluk nanain ita nia conhecimento kona ba ita nia fiar, ita convicção kona ba ita nia fiar sarani, ita nia testamunho da vida no ita hamrik metin iha Uma Creda hanesan ai nebe mean, ai metin maske iha tentacão, anin maka’as ita metin nafatin.

Virgilio do Carmo: Hakat ba tinan osan mean Paróquia Dare ninian Pároco ho nia sarani sira hakarak husik hela história ida nebé ita dehan Inespecível, tan ne’e husu atu Ilas Cruz Jovem nian bele horik hamutuk ho sarani sira iha Paróquia Dare iha Tinan ida ne’e nia laran. Cruz Jovem nian sei tama sai ita bot sira nia fatin no hela hamutuk ho ita bot sira durante tinan ida nia laran. Finalidade Cruz nia presença tulun sarani sira atu hatene ita nia identidade diak liu tan, ita nia conhecimento kona ba Cristo, kona ba ita nia fiar. Tan ne’e mak Cruz Jovem lao sei iha mos formação tan ne’e laos deit atu mai tuir deit celebração, maibé se iha formação iha bairo sira husu atu labarik, Jovem, inan-aman ita mos precisa fo tempo ituan atu simu formação Catequese. Catequese laos deit ba sira nebé atu simu Primeiro Cominhão, Crisma no Kaben, maibé Catequese ne’e dalan ida atu hametin ita nia fiar sarani nian. Oinsa mak ita bele hadomi ita nia fiar se ita la conhece, tulun sarani sira atu hadomi ninia fiar e wainhira nia hadomi no nia hatene mak nia bele moris tuir ninia fiar.

Virgilio do Carmo: Ema hateten sa kona ba Mane Maksoyn nia Cruz, se mak hau hare iha Cruz. Dare tinan ida ne’e ita bele dehan tinan graça ninian, buka loke imi fuan no laran ba Maromak, buka atu participa didiak ho fuan no laran, keta buka halo buat barak, keta buka halo barulho barak nebé ikus mai ita nia fuan taka metin ba mensagem nebe Cruz lori mai ita. Tan ne’e precisa hamamuk ita nia-an duni ba Jesus, haluha-an ba Jesus husik Jesus tama iha ha’u nia bairo, comunidade, família, iha ha’u nia fuan.

Virgilio do Carmo: Presença Cruz iha imi nia comunidade husu de’it buat ida”Loke imi nia fuan keta karak maibé laran mamar ba Maromak. Se mak karak ba Maromak, Maromak mos sei karak ba nia”. Ema ida-idak, sarani ida-idak buka hare ba ninia an, tan ne’e Cruz Jovem ne’e mai laos atu condena maibé mai atu comvida ita moris diak liu tan. Tan ne’e sarani ida-idak buka atu hare ba ida-idak nia-an la precisa hatudu ita nia liman ba ema ida nebé iha sorin no iha karuk maibé hatudu ba hau nia an rasik, halo exame de conciência diak ida iha tinan ida ne’e nia laran hodi buka atu conhece hau nia an, Cruz ne’e tenki sai hanesan espelho ida ba hau, família, bairo. Bainhira ó buka duni Jesus ho fuan ho laran, Nia sei transforma ó nia moris. Nia mai tamba ita salanain, Nia laos mai tamba ita nia perfeito.

D. Virgilio do Carmo: Nune’e iha tinan ida ne’e, iha dia 18 de Agosto 2018 wainhira Paroquiano Dare hamrik atu entrega fali Cruz Jovem ba Diocese Baucau, ita boot sira sente duni, hare duni momento ida ne’e inespecível duni ka la haluha tamba durante tinan ida ne’e ha’u buka duni, hau fo duni hau nia tempo, hau sente duni Ilas Cruz Jovem, hau hasoru duni Cristo, hau husik duni Cristo transforma hau nia vida. Cruz ninia presença tinan ida ne’e comvida atu ita hotu sai sarani ida nebé sólido, inabalável iha nia fiar. Cruz liu tiha husik hela história ida inespecível ba sarani hotu Dare ninian wainhira ita bot sira sente katak tinan osan mean la repete bebeik katak dala ida deit. Ne’e duni ita nebé hetan opurtunidade tinan graça nian ida ne’e, comvida duni sarani Dare Ilas Cruz Jovem ninian, comvida duni ita hotu wainhira bele halo transformação, comversão radical ida iha Dare no afecta Diocese Dili tomak no Timor tomak Igreja Timor Povo Timor.

Leave a Reply

Your email address will not be published. Required fields are marked *