shadow
Diocese de Dili > NOTÍCIAS > LETURA DIÁRIA > Sexta Feira, XXI Semana Tempo Comum

Sexta Feira, XXI Semana Tempo Comum

ANO A

 

Primeira Leitura

Lia housi São Paulo nia surat ba sarani sira iha Corinto

Maun alin sira: Imi tenki haré ami nu’udar Cristo nia atan no ema nebé tau matan ba Maromak nia mistério. Tebes duni; se mak tau matan tenki sai ema nebé bele fiar. Maibe mai ha’u, imi ka ema nia tribunal naran de’it tesi lia mai ha’u, ne’e la halo buat ida; ha’u la tesi lia ba ha’u nia an rasik; ha’u laran la hetan ema ida hasouru ha’u, maibe ne’e la dehan katak ha’u lós ona; ida nebé tesi lia mai ha’u mak Na’i rasik. Ne’e duni, keta tesi lia molok nia tempo lolós; molok Na’i hi’it an mai, basá Nia mak sei leno buat nebé subar iha nakukun laran no sei hatudu hanoin sira iha ema nia laran, no iha loron nebá ema ida-idak sei simu lia hahí nian housi Maromak.

Maromak Futar Lia.

 

Salmo Resp.

Refrão :  Ema justo nia maksoin mai housi Na’i. Repete-se

  • Tau laran metin iha Na’i hodi halo di’ak,

          Ó sei horik hakmatek iha rai.

          Tau iha Na’i ó nia ksolok,

          Nia sei haraik ba ó, ó fuan nia hakaran. Refrão

 

  • Saran ba Na’i ó nia moris aban-bainrua;

           Hein iha Nia! Na’i sei hatudu dalan ba ó.

           Nia sei halo nabilan ó nia justiça hanesan roman,

           Ó nia direito hanesan loron fahe-rua. Refrão

 

  • Hadook-an housi aat hodi halo buat di’ak,

          Ó sei moris ba nafatin,

          Basá, Na’i hadomi justiça,

          no la husik sira ba laran metin iha Nia. Refrão 

 

  • Maksoin ema justo nian mai housi Na’i,

          nia mak sira subar fatin iha tempo susar; 

          Na’i sei tulun sira no souri sira,

          basá, sira hamahan-an iha Na’i. Refrão

 

Aclamação

Refrão : Aleluia, Aleluia …Repete-se

                  Na’i dehan: Ha’u mundo nia roman; ema sé tuir Ha’u,

                  la lao iha nakukun, maibe, sei hetan roman moris nian. Refrão

 

Evangelho                                                                                                                                                                                        Lc. 5:33-35

+ Na’i Jesus Cristo nia Evangelho nu’udar  São Lucas haktuir

Iha tempo neba, escriba no fariseu sira hateten ba Jesus:  “João nia escolante sira hadera an dala barak hodi hamulak. Fariseu sira nia escolante sira halo mos nune’e. Maibe, Ó nian fali han hemu.” Jesus hatan ba sira: “Imi bele halo noivo nia bainaka sira hadera an uainhira noivo sei hela ho sira. Loron sei to’o mai, uainhira ema sei hasai noivo housi sira;  foin mak sira sei hadera an iha loron hirak neba.”  Nia haktuir tan aiknanoik ida ne’e ba sira:  “Ema ida la tesi hatais foun ida atu taka hatais tuan nia kuak;  halo nune’e karik, ida foun sei les ida tuan, hena nebe hasai housi ida foun la los ho hatais tuan.  Ema ida la rai hela tua foun iha tua fatin kulit tuan;  nia halo nune’e karik, tua foun sei halo fera tua fatin kulit tuan hodi halo tua nakfakar de’it, no tua fatin kulit sei sai aat. Maibe tua foun sei tau iha tua fatin kulit foun, no sira rua sei la lakon. la iha ema ida nebe, hemu tiha tua tuan, hakarak hemu tan tua foun, basa nia dehan:  ‘Tua tuan mak di’ak.”

Lia Maksoyn.

Leave a Reply

Your email address will not be published. Required fields are marked *