shadow
Diocese de Dili > NOTÍCIAS > REFLEXÃO > Natividade Santa Maria

Natividade Santa Maria

(Reflexão Dom Virgilio do Carmo da Silva)

 

(Dia 8 de Setembro), Ohin Santa Creda celebra loron Natividade Santa Maria nian. Iha Chave 3 ita Nain Feto nia moris nebé Santa Creda bolu ita nia atenção; Primeiro momento Comfissão nian nebé ita celebra iha loron 8 fulan Desembro Imaculada Conceição, Segundo loron Natividade Santa Maria nian nebé ita celebra iha dia 8 de Setembro, Terceiro Festa Assunção nian nebé ita celebra iha dia 15 de Agosto. Celebração hirak ne’e atu fo hanoin mai ita katak hahu kedas momento Nia Inan Santa Ana kous nia iha nia knotak, Na’i Maromak haraik tiha ona ba Nia Moris Espírito nian. Tan ne’e laiha razão ba Maria atu laran triste maibé atu haksolok basá Nia nakonu ho Espírito Maromak ninian nebé lori Nia hananu Magnificat hodi dehan; Hau Klamar Haksolok iha Maromak. Tan ne’e wainhira termina nia moris iha rai, Maromak foti Nia Isin no Klamar ba lalehan atu participa iha moris Maromak ninian. Domin boot nebé Nai Maromak haraik ba Virgem Santa Maria ne’e tamba husi kedas nia hun mai Nia destino atu sai ita nia redentor nia Inan e Nia halao knar ida ne’e ho fidelidade tomak.

Festa ida ne’e hahu tiha ona iha Creda basá sarani sira hakarak atu compara e liu-liu hakarak atu hahí fo honra ba Santa Virgem nia moris hanesan naroman boot ida mosu molok loron matan sae. Tan ne’e sira compara ita nain Feto ne’e hanesan naroman boot nebé mosu mai be lori Nia Oan Jesus nudar loromatan sai nudar ita nia Salvador.

Natividade Santa Maria nian ba mundo hanesan sinal ita messias ninian ida nebé Nia mai mundo hein kleur iha tinan 2000 ikus liu ba. Ida ne’e mak razão ida mai ita atu celebra duni loron boot ida ne’e depois de tinan 2000 resin hanesan ema dehan; laiha criatura ida nebé bele lori no laiha criatura ida nebé bele halo buat nebé diak liu selae Nia de’it Virgem Santa Maria. Ida ne’e mak ita rona Profeta Micaías iha nia profecía hateten; Belém Êfrata ninian Ó mak kiik liu iha Uma Kain Judá, ó mak sei hahoris ba hau ema ida nebé sei ukun Esrael.

Sarani doben Paróquia Balide imi tenki sente duni festa ida privilégio ida basá ita mos ida nebé kiik, kiak, dook housi Na’i Maromak maibé hodi graça Batismo ninian ita simu tiha ona Maromak ne’e, ita mos goja tiha ona loro matan ne’e nia diak. Tan ne’e ohin ita mai iha ne’e ho centimento boot ida atu agradece ba Nai Maromak maske nune’e karik ba mos, Na’i Maromak fiar ita, Nia matan monu ba ita, hadomi ita, husik naroman boot ne’e hamahan ita no penetra iha ita nia fuan, maibe dala barak ita la loke ita nia fuan.

Wainhira koalia kona ba Virgem ba ema Israel sira, la koalia deit kona ba Jerusalem nebé mos, Imaculada sem mancha maibé koalia mos ba ema Israel sira Virgem nia conotação mos pobre, despresada, sem vida. Se hanesan ne’e oinsa mak ita liga ba Ita Nain Feto Maria. Maria compara karik ho Virgem Israel Despresada sem valor. Wainhira ita celebra virgindade de Maria katak ema nebé hadomi ho fuan tomak. Ida ne’e mak Nain Feto nia Virgindade nia moris didiak to’o rohan hodi fiel nafatin ba Na’i Maromak.

Festa Natividade Santa Maria nian ne’e la to’o mai ita fila-fila atu repete se Espírito nebé penetra iha Virgem Santa Maria nia Fuan la penetra iha ita ida-idak nia fuan no laran. Se wainhira ita colabora diak ho Espírito ida ne’e mak Maromak sei halo mos buat ruma iha ita nia vida. Espírito nia papél mak tulun ita atu reconhece ita nia parte liu-liu ita nia parte nakukun sira. Espírito ne’e tulun mos ita atu aceita laos atu reconhece deit mais atu aceita katak ha’u iha nakukun laran, hau lao sala dalan no Espírito ne’e mos sei sai mestre ida atu orienta ha’u, atu admira no contempla kona ba maravilha hotu wainhira ita koalia kona ba fidelidade. Amor total ida ne’e mak sei sai sasukat mai ita ida-idak atu avalia ita nia an tuir ita nia compromisso sarani, amor total ida ne’e sai sasukat ba ita atu avalia domin iha família laran oinsa inan-aman nia domin ba oan sira nune’e mos sira nia domin ba malu nudar fen ho laen, amo total ida ne’e mos sai sasukat laos hare de’it ita nia dever no obrigação sarani nian maibé mos nudar sidadaun ida nian.

Ita hotu nia infidelidade hirak ne’e mak dala barak halo ita sente buat ruma iha ita nia-an no ema seluk hare ita pobre, dispresado sem vida, buat hirak ne’e hotu mak halo ita atu contempla ohin atu admira, adora iha oração, Maromak nia grandeza, Generosidade, no simplicidade mak ita ida-idak wainhira iha coragem atu loke ita nia fuan no laran ba Maromak.

Sarani Paroquiano Balide haksolok ho festa ne’e e festa ne’e laos hotu ohin deit aban laiha ona aban ita liu husi Balide buat hotu mamuk tiha ona malirin tiha, maske haleu Igreja ne’e malirin maibe ita lori liafuan Nain Feto nian ida ne’e durante semana hirak nia laran ita mai hamutuk hamoris fiar ida ne’e iha Creda e agora fila fali toca ema ida-idak, família ida-idak, comunidade ida-idak atu hamoris no fo testemunho ba Ita Nain Feto nia diak iha ita ida-idak nia comunidade.

Hau nia parabens ba sira nebé atu simu Sacramento Comfirmação tamba imi prepara duni imi ida-idak nia-an ba Sacramento ida ne’e no imi rasik hatene saida mak imi atu halo laos hanesan wainhira ita atu simu batismo papa ho mama sira mak kous imi, maibé loron ida ne’e imi rasik mak sei hatan tamba imi otas boot ona. Tan ne’e Sacramento Batismo, Eucaristia no Comfirmação tuir ita nia nia doutrina Santa Creda nian katak Sacramento iniciação ninian. Tamba ne’e tenki hatene atu simu Sacramento Comfirmação atu completa graça Batismo ninian. Iha Comfirmação atu aumento no haklean graça Batismo nian, hametin liu tan graça ho Maromak, haburas liu tan domin no união ho Maromak. Ne’e duni Sacramento boot ida ne’e fo hanoin ba imi nebé otas boot ba dadaun nune’e keta haluha iha imi nia família no uma fukun mak Creda, Creda ida nebé Jesus Cristo mak sai Ulun mai ita hotu.

Espírito Santo nia presença iha imi hanesan viveiro ida. iha Batismo imi hetan tiha ona viveiro ida ne’e no iha Crisma atu hasanto liu tan viveiro ida ne’e atu viveiro ida ne’e fo fuan katak wainhira hanoin atu halo buat ruma ha’u precisa consulta ho paráclito ida ne’e, Espírito ida ne’e. Ita hotu iha Espírito ida ne’e, ita precisa husu, harohan buat nebé hau atu halo ne’e diak kalae, contra hau nia conciência kalae, tuir hau nia moral sarani nian kalae tamba ne’e koko hakasan hanoin uluk molok atu decide iha moris.

Ohin hamutuk ho sarani doben sira nebé celebra festa ida ne’e, mai ita harohan atu Espírito ida ne’e laos ba deit sira nebé atu Crisma maibé ita hotu neb’e Crisma tiha ona atu ita hotu bele renova ita nia-an. Tan ne’e ita husik hela ita nia preucupação sira ita mai husu harohan ba Maromak atu ita hotu bele renova ita nia-an iha Festa Natividade Santa Maria nian ne’e e harohan mos atu Espírito Santo ida ne’e bele lao hamutuk ho ita hotu-hotu iha ita nia moris hodi aprende lori ita nia cruz sarani nian ho domin.

Leave a Reply

Your email address will not be published. Required fields are marked *