shadow
Diocese de Dili > NOTÍCIAS > LETURA DIÁRIA > Sabado, XXI Semana Tempo Comum

Sabado, XXI Semana Tempo Comum

ANO A

 

Primeira Leitura

Lia housi São Paulo nia surat ba sarani sira iha Corinto.

Maun-alin sira :  “Ha’u dehan mos sira ne’e ba ha’u nia an no ba Apolo ba imi nia di’ak, atu imi bele hanourin an housi ami atu la bele ba liu fali buat nebe hakerek nanis, atu la iha ema ida housi imi leet nebe sei nakonu ho laran loko an kona ba ema ida liu fali ema seluk. Se mak fo kmanek liu ba imi?  Imi iha buat saida nebe imi la simu uluk? Maibe imi simu tiha karik, tansa imi loko an hanesan imi la simu nia?  Imi haksolok ona;  imi sai riku ona;  imi sai tiha liurai maski ami la iha! Tebes, ha’u hakarak katak imi sai liurai, atu ami mos bele ukun hamutuk ho imi. Basa nu’udar ha’u hare, Maromak hatudu ami apóstolo sira nu’udar ikus liu ema hot-hotu, hanesan ema nebe atu saran ona ba mate, basa ami sai tiha hanesan buat aat ida nebe mundo, anjo no ema sira hotu bele hare. Ami bulak tanba Cristo, maibe imi matenek iha Cristo; ami kbiit laek, maibe imi maka’as; ema hare di’ak imi, maibe ema hare aat ami. To’o oras ne’e kedas ami hamlaha no hamrook, hatais uitoan de’it no ema trata aat ami, ami la’o ba la’o mai hanesan ema nebe uma la iha. No ami serbisu ho ami nia liman rasik. Uainhira ema hasara ami, ami hateten di’ak ba sira; uainhira ema fo terus, ami tahan de’it; uainhira ema konta ami nia vida, ami hatan ho laran maus. Ami sai tiha hanesan buat fo’er mundo ne’e nian, ema hotu nia fo’er to’o oras ne’e. Ha’u hakerek ida ne’e ba imi la’os atu hamoe imi, maibe atu hanourin imi nu’udar ha’u nia oan doben sira. Basa maski imi la iha matadalan barak ba Cristo, imi nia aman la barak, basa ha’u sai tiha imi nia aman iha Cristo Jesus housi Evangelho.

Maromak Futa Lia. 

 

Salmo Resp.

Refrão :   Na’i Maromak besik ba sira be harohan. Repete-se

  • Na’i Nia hanoin los tebes,

           laran di’ak ba sasan tomak Nia halo;

           besik ba sira nebe harohan,

           ba sira nebe harohan tebes. Refrão

 

  • Ba sira be hamta’uk,

           Nia haraik sira nia hakaran, rona sira lian susar no soi sira.

           Na’i tau matan ba sira nebe hadomi Nia,

           maibe, halakon ema aat sira. Refrão

 

  • Ha’u ibun sei hananu hodi hahi Na’i.

           Buat moris hotu haliban ba nafatin,

           Nia naran santo. Refrão

 

Aclamação

Refrão :      Aleluia, Aleluia …Repete-se

                      Ha’u ne’e dalan, lialos no moris hun, Na’i lia tun dehan; 

                      ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                          Lc. 6:1-5

+ Na’i Jesus Cristo nia Evangelho nu’udar  São Lucas haktuir

Iha tempo neba, iha Sábado ida, uainhira Jesus la’o housi to’os batar nian, nia escolante sira hahu silu no dulas batar iha sira nia liman hodi han. Fariseu sira dehan:  “Tansa imi halo buat nebe bandu iha loron sábado?”  Jesus hatan ba sira:  “Imi la lê buat nebe David halo uainhira nia ho nia maluk sira hamlaha, katak nia tama iha Maromak nia Uma, hola pão sacrificio nian hodi han no fahe ba sira, pão nebe na’i lulik sira de’it mak bele han?”  Nia dehan tan sira:  “Oan Mane mak sábado nia Na’i.”

Lia Maksoyn.

Leave a Reply

Your email address will not be published. Required fields are marked *