shadow
Diocese de Dili > NOTÍCIAS > LETURA DIÁRIA > Sábado, XXIV SEMANA DO TEMPO COMUM

Sábado, XXIV SEMANA DO TEMPO COMUM

Ano A

 

Primeira Leitura                                                                                                             1Tim. 6:13-16
Lia housi São Paulo nia primeira Surat ba Timóteo

Oan doben: ohin, iha Maromak nia futar oin, nebe buat moris hotu nia hun, no iha Jesus Cristo nebe ko’alia lolós nu’udar sasin kona ba lialos ba Poncio Pilatos, ha’u saran ba ó knaar atu halo buat hotu nebe ha’u haruka o, la ho sala ruma eh buat ruma kuran, to’o tempo nebe ita Na’i Jesus Cristo mosu hikas mai, nebe Maromak sei fó hatene sai iha tempo lolós; Maromak nebe kmanek ua’in no buat hot-hotu nia Na’i mesak, Liurai liurai sira nian no Na’i na’i sira hotu nian; Nia mesak mak la mate; nia uma hela iha naroman rohan laek; ema seidauk haré ka bele hare; naran boot no biit rohan laek ba Nia. Amen.

Maromak Futar Lia.

 

Salmo Responsorial                                                                                  Sal. 99(100):2,3,4,5 (R.2c)

Refrão :   Mai iha Na’i futar oin,

                   ho knananuk ksolok nian. Repete-se

  • Rai tomak hahi Na’i,

           Serbi Na’i ho ksolok;

           Mai to’o Nia ho hananu ksolok nian. Refrão

 

  • Hatene ba katak Na’i mak Maromak!

          Nia hakiak ita, ita Ninian.

          Ita, Nia povo, bibi sira Nia luhan nian. Refrão

 

  • Tama housi odamatan hodi agradece,

          Tama ba Nia kadunan ho knananuk hahi nian.

           Haliban Nia, hana’i Nia naran. Refrão

 

  • Tanba Na’i di’ak tebes!

          Nia laran-luak rohan laek;

          Nia fidelidade sei to’o bei-oan sira hotu. Refrão

 

Aclamação                                                                                                                                 cf.:Lc. 8:15

Refrão : Aleluia, Aleluia! Repete-se

                 Ksolok ba sira nebe rona Maromak Nia liafuan ho neon no laran hodi fó fuan,

                 tan sira laran metin. Refrão.

 

Evangelho                                                                                                                                      Lc. 8,4-15

Na’i Jesus Cristo nia Evangelho tuir São lucas

Iha tempo neba, wainhira ema lubun boot halibur hamutuk, hodi hakbesik ba Jesus housi cidade tomak, Nia haktuir, aiknanoik ida ne’e: “Ema ida ba kari fini. Nia sei kari dadaun, fini balun monu iha dalan ninin, hafoin ema sama no manu sira housi lalehan mai han sira. Fini balun monu iha fatuk leten; moris tiha, sira namlaik, basá be la iha. Fini balun fali monu iha aitarak laran.

Aitarak sira moris hamutuk ho sira, hodi hanehan sira. Ikus mai, fini balun monu iha rai di’ak, hodi moris no fó fuan dala atus ida.” Hateten tiha ne’e, Nia dehan ho lia maka’as: “Sira nebe iha tilun atu rona, rona ba!”

Escolante sira husu ba Nia aiknanoik ida ne’e katak sá. Nia hatan: “Ba imi fó hatene tiha ona mistéiro Maromak nia reino nian; maibe ba ema seluk hato’o de’it ho aiknanoik sira, atu ‘hodi hare, sira la hare momós; no hodi rona, sira la hatene momós.’

Ne’e duni aiknanoik ida ne’e katak: fini mak Maromak nia liafuan. Fini nebe monu iha dalan ninin mak ema sira nebe, rona tiha nia, diabo mai hodi hasai liafuan housi sira nia laran atu sira la bele fiar hodi hetan maksoin. Fini nebe monu iha fatuk leten mak ema sira nebe wainhira sira roma liafuan, sira simu nia ho ksolok; maibe, tan abut la iha, sira fiar ba tempo uituan deit, hafoin husik ona iha oras susar nian. Fini nebe monu iha aitarak laran, ne’e mak sira nebe rona, maibe hanoin oi-oin, rikusoi no ksolok mundo ne’e nian hanesan sira, la biban atu sai boot no tasak. No fini nebe monu iha rai di’ak, ne’e mak sira nebe rona liafuan ho neon ho laran, rai didi’ak nia hodi fó fuan, tan sira laran metin.

Lia maksoyn.

Leave a Reply

Your email address will not be published. Required fields are marked *