shadow
Diocese de Dili > NOTÍCIAS > LETURA DIÁRIA > XXV DOMINGO DO TEMPO COMUM

XXV DOMINGO DO TEMPO COMUM

ANO A

 

Primeira Leitura                                                                                                                Is 55, 6-9

Lia housi Livro Profeta Isaías;

Buka Maromak, Wainhira sei bele; harohan ba Nia, Wainhira sei besik. Ema aat buka husik nia salan, ema maksalak buka husik nia hanoin. Fila fali ba nia, nebé sei hanoin nia; fila fali ba ita nia Maromak, nebé laran luak atu perdua. “Tan, Ha’u nia hanoin la hanesan imi nian, imi nia dalan la hanesan Ha’u nian Maromak nia liafuan. Hanesan lalehan harí iha rai fohon, nune’e mos, Ha’u nia dalan dook housi imi nian, Ha’u nia hanoin dook housi imi nian”.

Maromak Futar Lia.

 

Salmo Responsorial                                                                                              145,2-3,8-9.17-18

Refrão : Na’i Maromak besik ba sira nebé harohan. Repete-se

 

  • Ha’u hana’i Ita kalan loron,

          hahí nafatin Ita naran.

          Maromak boot, sei hahí didi’ak,

          Nia beran la nahas. Refrão

 

  • Na’i laran luak hadomi ita,

          la rai hirus, hadomi perdua.

          Na’i hakarak di’ak ba ema hotu,

          fo tulun ba ema laran susar. Refrão

 

  • Na’i nia hanoin lós tebes,

          laran di’ak ba sasan tomak.

          Besik ba sira nebé harohan,

          ba sira nebé harohan tebes. Refrão

 

Segunda Leitura                                                                                                  Flp 1, 20c-24. 27a

Lia housi São Paulo nia surat ba ema sira iha Filipo;

Maun alin sira: Ha’u nia isin sei hahí Cristo, hodi ha’u nia moris eh hodi ha’u nia mate. Tan, mai ha’u, moris katak Cristo, mate katak buat folin di’ak ida. Moris iha isin ida ne’e fo karik tempo atu kaer knar di’ak ruma, ha’u la hatene atu hili los ida nebé. Ha’u iha buat sira leet: ha’u hakarak ba, hakarak hela ho Cristo; ne’e di’ak liu. Maibé, hela iha isin ne’e, hela tan di’ak liu ba imi. Buka de’it moris lolós tuir Cristo nia Evangelho.

Maromak Futar Lia.

 

Aclamação

Refrão : Aleluia, Aleluia!!! Repete-se

   Imi mos ba hotu Ha’u nia toos,

   Ha’u sei selu didi’ak imi nia kolen. Refrão

 

Evangelho                                                                                                                                   Lc 20, 1-16

Na’i Jesus Cristo nia Evangelho nudar São Mateus haktuir;

Iha tempo nebá, Jesus haktuir aiknanoik ida ne’e ba Escolante sira: “Reino Lalehan nian hanesan toos na’in ida nebé, rai sei nakukun ba buka ema atu serviço iha nia toos ho uvas. Sira lia tuir malu atu ema ida simu osan ida iha loron ida; Hafoin, nia haruka ba toos. To’o tuku sia dader, Nia sai hodi hetan seluk nebé la halo buat ida; nia dehan ba sira: ‘Imi mos ba ha’u nia toos, ha’u sei selu lolós imi kolen! Sira ba’. Iha loron manas boot no iha tuku tolu loro-kraik, nia sai tenik, hodi halo hanesan uluk. Sai hikas iha tuku lima loro-kraik, nia hetan fali ema balun, hodi hateten ba sira: ‘Nusá imi hela loron tomak iha ne’e, hodi la halo buat ida?’ Sira hatán ba nia: ‘Tan ema ida la bolu ami’. Nia dehan ba sira: ‘Imi mos ba ha’u nia toos’. Molok loron atu monu, toos na’in dehan ba nia atan: ‘Bolu ema sira ne’e mai hodi selu sira kolen; hahú housi sira nebé mai ikus to’o sira nebé mai uluk’. Sira, tuku lima loro-kraik nian mai, hodi simu osan ida-ida. Hafoin, sira uluk nian mai, hodi hanoin atu simu liu; maibé, sira mos simu de’it osan ida. Simu tiha, sira mumún toos na’in, hodi dehan: ‘Sira ikus ne’e, kole de’it oras ida, maibé, ó tanesan sira ho ami nebé loron hawai ami loron tomak’. Maibé, toos na’in simu hasouru sira: ‘Belun, ha’u la hasusar ó! Ita nia lia la tuir malu atu ó simu osan ida? Lori buat nebé ó nian, hodi tuir ó dalan. Ha’u hakarak fo ba ida ikus hanesan ida nebé ha’u fo ba ó. Ha’u la bele halo tuir ha’u nia hakarak ho buat nebé ha’u nian? Eh hatudu ó nia hirus tan ha’u nia laran di’ak? Nune’e, ema nebé ikus sei uluk fali; sira nebé uluk, sei ikus fali”.

Lia Maksoyn.

Leave a Reply

Your email address will not be published. Required fields are marked *