shadow
Diocese de Dili > NOTÍCIAS > LETURA DIÁRIA > XXVI DOMINGO DO TEMPO COMUM

XXVI DOMINGO DO TEMPO COMUM

ANO A

 

 Primeira Leitura                                                                                                                                                                                           Ez 18, 25-28

Lia housi Livro Profeta Ezequiel

Na’i lia tun nune’e: “Imi hateten: ‘Na’i nia hahalok la tuir dalan los!’ Ne’e duni, Israel nia oan, rona mai: Ha’u nia hahalok ne’e la tuir dalan los? Keta imi nian karik mak la los? Uainhira ema di’ak husik tiha nia hahalok di’ak ne’e, hodi halo aat, hafoin mate karik, nia sei mate tan buat aat nebe nia halo. Wainhira ema maksalak husik tiha nia moris aat hodi moris los, tuir dalan di’ak, nia sei soi nia moris. Nia loke karik matan hodi hakribi salan nebe nia halo, nia sei moris, sei la mate.”

Maromak Futar Lia.

 

Salmo Responsorial                                                                                                                                                                     Sal 25, 4bc-5.6-7.8-9

Refrão : Na’i, hanoin Ita nia laran luak!!! Repete-se

 

Na’i, halo ha’u hatene Ita nia ukun-fuan,

hanourin Ita dalan mai ha’u.

Hatudu Ita nia lialos mai. Ita, ha’u nia Maromak,

ha’u nia Maksoin. Na’i, ha’u hein ita. Refrão

 

Na’i, hanoin Ita nia laran maus,

no Ita laran di’ak nebe la nahas.

Keta hanoin ha’u nia salan,

hahalok aat molok sei klosan.

Hanoin ha’u ho laran luak, Na’i, tan di’ak tebes. Refrão

 

Na’i, di’ak laran maus,

lori ema maksalak ba dalan los;

halo ema ki’ik moris tuir justisa,

hanourin ba ema ki’ak atu tuir. Refrão

 

Segunda Leitura                                                                                                                                                                                 Flp 1, 20c-24.27a

Lia housi São Paulo nia surat ba sarani sira iha Filipo

Maun-alin sira: Iha karik ksolok oan ruma iha Cristo, iha karik laran kman ruma iha caridade; bele simu netik tulun ruma housi Espirito Santo, iha karik hadomi no laran luak ruma, ne’e sa, imi buka hato’o ha’u nia ksolok hodi moris hamutuk ho neon no hanoin ida de’it: Buka tuir hadomi ida de’it, klamar ida de’it, hanoin ida de’it. Keta halo buat ruma hodi buka hasouru malu, eh hodi foti an de’it; maibe, ho haraik-an, buka hanoin ema seluk boot liu imi an rasik; keta hanoin ida-idak buka de’it sasan ba nia, maibe, hanoin buat nebe ema seluk hakarak. Buka tuir de’it Cristo Jesus nia hanoin. Nia maski Maromak, la hakarak hatudu hanesan Maromak. Maibe, Nia haraik tiha Nia-an rasik, hodi hola isin ida hanesan atan, sai nu’udar ema. Iha tiha ilas nu’udar mane ida, Nia haraik An liu tan, hodi halo tuir to’o mate, hodi iha cruz. Tan ne’e, Maromak hahi Nia. Tan ne’e, Maromak fo ba Nia naran ida nebe boot liu naran hotu-hotu. Atu, ho Jesus nia naran, ain-tur hotu sei hakneak iha lalehan, iha rai, iha inferno; nanal tomak haklaken katak Jesus Cristo ne’e Na’i, atu hahi Aman Maromak.

Maromak Futar Lia.

 

Aclamação

Refrão : Aleluia, Aleluia!!! Repete-se

Ema nebe hanoin Ha’u, sei halo tuir Ha’u nia lia-fuan;

Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                                                  Mt 20, 1-16

+ Na’i Jesus Cristo nia Evangelho nu’udar São Mateus haktuir

Iha tempo neba, Jesus dehan ba boot sacerdote sira nian no ba ema katuas sira povo nian: “Imi hadomi oin sa? Ema ida iha oan mane rua. Nia ba hasouru ida boot, hodi dehan: ‘Oan, ohin ó ba serbisu iha to’os uvas nian.’ Maibe nia hatan: Ha’u la kohi.’ Hafoin liu tiha, nia hanoin didi’ak fali, nia ba duni. Aman ne’e ba hasouru fali oan seluk hodi hateten hanesan uluk. Nia hatan: ‘Ha’u ba Na’i.’ Maibe, nia la ba. Sira na’in rua ne’e, ida nebe mak halo tuir sira nia aman nia hakarak?” Sira hatan: “Ida uluk ne’e,” Jesus simu hasouru sira: “Ha’u dehan tebes ba imi: Ema publicano no feto moris aat sira sei ba Maromak nia Reino uluk liu imi. João Baptista mai hasouru imi iha dalan nebe lori ba justisa, imi la fiar nia; maibe, ema publicano no feto moris aat sira fiar duni nia. Imi hare tebes nia, la hakribi imi salan, hodi fiar nia.”

Lia Maksoyn.

Leave a Reply

Your email address will not be published. Required fields are marked *