shadow
Diocese de Dili > NOTÍCIAS > Notícias > DIOCESE MALIANA HARÍ SEMINÁRIO FOUN

DIOCESE MALIANA HARÍ SEMINÁRIO FOUN

DCDD – (26/09/2017) Diocese Sagrado Coração de Jesus Maliana marca tan história foun ida ho existência Seminário Menor São José de Maliana. Antes nee fatin refere sai nudar Colêgio de Sagres Maliana, maibé ho iniciativa husi Ex.mo e Rev.mo. Mgr. Joseph Marino, Núncio Apostólico coopera hamutuk ho Bispo, Nailulik, Autoridades no sarani Diocese Maliana nian hodi indica Colêgio refere sai Seminário Menor ho ninia mahein São José rasik. Seminário Menor nee hahu nia rehabilitação iha 11 de Janeiro de 2017, no iha loron 26 Fulan Setembro 2017, Seminário Menor São José hetan Bensão husi Ex.mo e Rev.mo. Mgr. Joseph Marino, Núncio Apostólico rasik, hahu ho Seminarista nain 21 nebé sai nudar Seminarista moruk Seminário Menor refere ho nia primeiro Reitor Padre Pascoal Marquês. 

Bispo de Maliana D. Norberto do Amaral hateten: Núncio Apostólico wainhira mai visita fatin ida nee ou Colêgio Maliana, iha nia visita nee nia hateten; fatin ida nee se diak liu karik loke Seminário. Tamba nee, Seminário ida nee hamriik ho iniciativa Núncio Apostólico nian rasik.

Norberto acressenta tan katak: Ami hanaran Seminário Menor refere ho naran S. José nee ho razão Seminário ida nee hari ho iniciativa Núncio Apostólico nian rasik. Como Núncio mos naran Joseph tamba nee ami hanaran Seminário Menor São José de Maliana.

Biban hanesan, Núncio Apostólico hateten: Seminário ida nee hamriik tuir lolos nee Santo Padre Francisco mak hakarak loke Seminário ida nee. Antes hau mai, hau hasoru Santo Padre hau hateten katak iha Timor iha Padre barak, Madre barak, Seminarista barak maibe sala latoo. Tamba nee Santo Padre hateten mai hau nunee; ba koalia ho Bispo sira atu loke tan Seminário, haktuir Núncio Apostólico.

Núncio Apostólico alerta katak: imi hirak nebe agora iha Seminário S. José ida nee, imi mak Seminarista moruk Seminário ida S. José Maliana tamba nee hau hatoo hau nia buat diak ba imi no hau hatoo Maromak nia bensa ba imi.

Iha sorin seluk, Presidente Comferência Episcopal Timor-Leste e Bispo de Baucau D. Basilio do Nacimento iha nia discurso hateten mos katak: Hau apessia ituan tamba Iha tinan 50 liu ba hau mos liu husi uma ida nee, nee duni naton neba escolante no ohin hau fila fali mai hare uma nee oin seluk sai Seminário. Iha momento neba Uma Creda ida deit mak foun no resto nee nunee hela e hadia hela deit.

Basilio hateten: Ohin Maliana liu-liu iha fatin ida nee iha tan Seminário Menor ho Colégio. Fatin rua nee atu aprende hotu; ida aprende matenek nian, ida seluk fatin ida nebé labarik sira rona Maromak nia bolu e mai buka tuir ho Superiores sira nia tulun no hanoin buka atu rona Maromak nia liafuan e rona Maromak nia bolu. Hirak nebé Maromak bolu atu sai Amululik tuir dalan ida nee ho contente tamba Jesus Cristo husik hela Nia Uma Creda ida nee, maibe atu halo Uma Creda ida nee sai sasin iha mundo nee, bolu ema hotu atu sai Santo, maibe bolu mos iha imi balu nia leet, manda labarik mane lubuk ida nebe rona Maromak nia liafuan hakarak servi nia hanesan Jesus Cristo.

Nee duni ba Diocese Maliana no nia Bispo Norberto ho ninia iniciativa halo Seminário Menor iha Maliana, amo sira no mos ba povo tomak nebé colabora ho amo Bispo atu hadia no haburas Uma Creda iha Diocese Maliana e Seminário São José nee sai hanesan fini buras ida nebé que desde 1950 wainhira Pe. Manuel Luiz hari Colégio ida nee e nia nunca mehi katak Colégio nee iha loron ida sei sai Seminário.

Pe. Pascoal Marquês nudar Reitor ba Seminário Menor S. José de Maliana hateten; agradece ba Comfiança nebé Bispo haraik mai hau hanesan formador no belun ba Seminarista sira. Ita hatene katak Formador principal mak Maromak rasik. Ba hau presença no hamutuk ho Seminarista sira ida nee graça boot ida ba hau. Liu husi Seimnarista sira, hau aprende buat barak iha tempo moderno nee sei iha Jovem balu nebé conciente hodi hakarak rona Vocação ida nee.

Pe. Marquês Sublinha tan: Hau mos bele aprende husi pessoal Seminarista ida-idak, sira nia personalidade, sira nia character nebé hariku hau iha moris. Dala ruma sei iha processo naruk iha estudu nebé precisa lao hamutuk, ida nee fo ánimo mai ami Formadores sira. Ita hotu iha esperança katak Seminarista sir abele aprende buat barak iha fatin ida nee liu-liu iha vida intellectual, Vida Espiritual no vida humana ida nebé Madura. Obrigado barak ba Núncio Apostólico, Bispo Diocese Baucau no Bispo Maliana, Colegas Padres no ba Doadores sira. Ami foin hahu iha Seminário ida nee iha 11 de Janeiro 2017 nebe iha Doadores lubuk ida nebé fo tulun mai ami. 

Leave a Reply

Your email address will not be published. Required fields are marked *