shadow
Diocese de Dili > NOTÍCIAS > LETURA DIÁRIA > 18 de Outubro São Lucas, evangelista Festa

18 de Outubro São Lucas, evangelista Festa

ANO A

Primeira Leitura                                                                                                                       2Tm. 4:10-17b

Lia housi São Paulo nia segunda Surat ba Timóteo

Oan doben, Demas husik tiha ha’u tan domin ba mundo ne’e, no ba tiha ona Tessalónica; Crescente ba tiha rai Galácia, no Tito ba rai Dalmácia. Lucas de’it mak hela ho ha’u. Haré Marcos mai ho ó; nia nu’udar tulun di’ak ba ha’u nia serbisu. Ha’u haruka ona Tíquico ba Éfeso. Wainhira ó mai, lori mós unuk nebe ha’u husik hela iha Carpo nia uma iha Tróade, no livro sira, liu-liu sira nebe hakerek iha bibi sira kulit. Alexandre, badaen besi, halo áat barak mai ha’u; Maromak sei selu nia ba buat nebe nia halo. Ó rasik matan moris ho nia, basá nia hasouru maka’as buat hotu nebe ita hateten. Wainhira iha sasin dauluk atu tahan ha’u an, la iha ema seluk nebe fó sasin hodi tulun ha’u. Sira ida-idak husik tiha ha’u; Maromak sei perdua sira! Maibe Na’i iha ha’u sorin hodi fó biit mai ha’u, nune’e housi ha’u, lia menon tomak bele to’o ba gentio sira atu bele rona.

Maromak Futar Lia.  

 

Salmo responsorial                                                               Sal.144(145):10-11,12-13a,17-18(R.cf.12)

Refrão: Na’i Ita santo sira haklaken Ita reino nia glória. Repete-se

Na’i, ema hotu sei agradece Ita boot,

Ita emar sira hahi Ita boot.

Sira sei haklaken Ita reino nia glória,

sira haktuir buat hirak Ita halo.  Refrão

 

Atu fó hatene ema tomak Ita biit,

glória no kmanek Ita reino nian.

Ita nia reino, reino rohan laek,

Ita nia ukun sei hela metin

housi otas ba otas.  Refrão

 

Na’i nia hanoin lós tebes,

laran di’ak ba sasan tomak.

Besik ba sira nebe harohan,

ba sira nebe harohan tebes.  Refrão

 

Aclmação                                                                                                                                                Jo. 15:16

Refrão: Aleluia, Aleluia!  Repete-se

Na’i dehan, “La’os imi mak hili Ha’u, Ha’u mak hili imi hodi haruka imi ba atu bele fó fuan no imi nia fuan bele hela ba nafatin”.  Refrão

 

Evangelho                                                                                                                                             Lc. 10:1-9

Na’i Jesus nia Evangelho tuir São Lucas

Iha loron hirak neba, Na’i fihir escolante hitu nulu resin rua tan, hodi haruka sira rua-rua atu ba uluk iha cidade no fatin sira nebe Nia atu ba. Nia dehan ba sira: “To’os boot, maibe servisu na’in sira oituan de’it. Tan ne’e, husu ba to’os na’in atu haruka serbisu na’in sira ba Nia to’os. La’o ba, Ha’u haruka imi ba hanesan bibi oan sira iha asu fuik sira leet. Keta lori bukae, kohe eh sandalias. Keta cumprimenta ema iha dalan. Imi tama karik iha uma ida, uluk knana’in dehan: ‘Dame ba uma ne’e!’ Iha karik ema dame na’in ida iha neba, imi nia dame sei hôrik ho nia; lae karik, sei fila fali ba imi. Hela ba iha uma ne’e, han hemu buat nebe sira iha, basá serbisu na’in so’i atu simu nia kolen. Keta tama uma, sai uma sira. Imi tama iha cidade ida no sira simu karik imi, han ba buat nebe sira fó ba imi. Fó isin di’ak ba ema moras sira iha neba, hodi hateten ba sira: ‘Maromak nia reino besik ona imi’.

Lia maksoyn

Leave a Reply

Your email address will not be published. Required fields are marked *