shadow
Diocese de Dili > NOTÍCIAS > Notícias > LEI LA FO DALAN ATU PARTIDO MENUS VOTADO FORMA GOVERNO

LEI LA FO DALAN ATU PARTIDO MENUS VOTADO FORMA GOVERNO

DCDD – (24/10/2017) Lia hirak nee Pe. Júlio Crispim hatoo baseia ba regras constituçionais principalmente artigo 106 nebe contempla significado ida katak Primeiro Ministro indigita mai husi Partido mais votado ka mai husi aliança dos partidos. Pe. Júlio Crispim explica katak ida ne’e hatudu constitução koalia ba situação rua, ida uluk mak Partido mais votado no tuir fali mak aliança dos Partidos. Condição rua nee importante hodi hamosu tan condição seluk maka maioria parlamentar nudar ‘Conditios sine qua non’ atu assegura governação ida seguro no dura tuir princípio Estado de Direito Democrático.

Maioria parlamentar ba partido mais votado ka ba alianças dos partidos nee regra ida, katak se Primeiro Ministro nee indigitado husi partido mais votado nia tem que preenche condição maioria parlamentar ‘Conditios sine qua non’. Iha sorin seluk wainhira partido mais votado la consegue hetan ka preenche maioria parlamentar ‘Conditios sine qua no’ lei loke dalan ba segunda condição nebe katak Primeiro Ministro indigitado mai husi aliança dos partidos maibe ida ne’e mos tem que ho condição preenche maioria parlamentar” haktuir Pe. Julio Crispim.

Tuir Pe. Júlio katak, Interpretação nebe sala ba constituição hahu kedas husi 2007 kona ba artigo 106. Tamba nee, ita interpreta artigo ida nee ho hanoin katak se partido mais votado la preenche maioria parlamentar então partido ida nebe mak consegue halo aliança dos partidos hodi hetan maioria parlamentar, nia bele avança ba forma governo, ida nee interpretação errado ka interpretação sala.

Interpretação nebe los relaciona ho artigo 106 ne’e mak partido mais votado la consegue hetan maioria parlamentar karik, tuir mai nia bele halo fali alianças dos partidos atu bele hetan maioria parlamentar. Ne’e duni iha processo formação governo ne’e labele exclui fali partido mais votado, hodi fo fali opportunidade ba partido menos votado mak ba halo aliança maioria parlamentar atu forma governo.

Ne’e duni tuir Pe. Julio Crispim nebe oras ne’e sai mos docente iha Universidade Nacional Timor Leste ba  disciplina sira hanesan Direito comparado, filosofia do direito, Introdução ao direito ne’e, interpretação sala ba artigo 106 hahu kedas ona husi 2007 too agora. Tamba nee ita lao hela iha entendimento nebe sala kona ba assunto ne’e husi ponto de vista constitucional nian.

Relaciona ho Presidente da República ninia decisão kona ba assunto ida ne’e Pe. Julio Crispim hateten katak Presidente da República atual foti ona decisão  nebe tau conciência ba artigo ida nee (106). Presidente da República iha ninia decisão nia mantein nafatin partido mais votado mak ba forma governo mas que partido ne’e la hetan maioria parlamentar, nia mos fo ona dalan ba partido mais votado halo alianças dos partidos. Presidente ninia decisão ne’e loke ona ita nia conciência juridica constitucional katak interpretação ida nebe loos maka agora Presidente da República aplica dadauk ne’e.

Pe. Júlio haktuir katak uluk iha 2007 exclui partido Fretilin nudar partido mais votado husi indigitação do Primeiro Ministro hodi loke dalan ba alianças dos partidos ho maioria parlamentar, ida nee viola princípios democráticos. Nia realsa katak constitução la hakerek kona ba partido segundo mais/menos votado bele forma governo, constitução koalia deit kona ba partido mais votado maka bele forma governo. Se partido mais votado ne’e lable forma governo mesak deit karik, partido ne’e tem que halo aliança dos partidos atu bele hetan maioria parlamentar.

Padre diocesano Diocese Baucau nian ne’e mos reconhece katak decisão Presidente da República nian la preenche critério hotu maibe ho condição ida katak sei iha incidencia parlamentar hanesan saida maka uluk partido Fretilin ho partido  CNRT halo iha governo anterior, infelizmente  ida ne la aconteçe, ikus mai programa governo nian la passa. Hare ba realidade nebe hatudu katak programa governo nian la passa Pe. Julio Crispim explica hodi hateten katak “Governo sei apresenta nia programa dala ida tan iha Parlamento Nacional, se la passa Presidente da República halo demissão ba governo. Wainhira halo tiha demissão, Presidente sei bolu fila fali partido mais votado atu halo negociação foun ho partido sira seluk hodi halo aliança dos partido atu bele forma hikas governo foun, laos fo fali ba partido menus votado mak atu forma governo. Se processo ida ne ikus mai hatudu katak partido mais votado la bele  nafatin forma VII governo então Presidente da República tuir mai dissolve Parlamento Nacional hodi hakat ba elição antecipada”.

Wainhira husu kona ba Carta Moção Rejeição nebe oposição maioria parlamentar apresenta ba Parlamento Nacional hodi rejeita programa governo nian ativista Renetil ne hatan dehan katak los duni constituçao fo dalan atu bele apresenta moção de rejeição ba programa governo nian husi maioria deputado nebe iha função maioria efetiva. Ida ne’e katak moção de rejeição nebe apresenta ba Parlamento Nacional ne’e  representa cada deputado be aceita atu rejeita programa governo nian laos representa bloco oposição parlamentar ida tamba laiha lei ruma maka hakerek kona ba bloco ida iha Parlamento Nacional bele halo moção rejeição ba programa governo nian.

Ikus liu Padre Julio Crispim realsa katak “situação nebe aconteçe iha Parlamento Nacional ne’e ninia consequência ikus lolos maka hamonu VII governo constitucional. Tuir nia situação ida ne’e mosu mos tamba ema barak halo fali interpretação katak wainhira governo monu Presidente da República sei entrega ba iha Partido menus votado atu forma governo. Nia afirma liu tan katak se ikus mai Presidente da República foti duni decisao hodi fo fali ba partido menos votado ba forma governo, ne’e  Presidente República la tuir ona constitução”.(Rmg/Ngl)

Leave a Reply

Your email address will not be published. Required fields are marked *