shadow
Diocese de Dili > NOTÍCIAS > LETURA DIÁRIA > Segunda-Feira,XXX DO TEMPO COMUM

Segunda-Feira,XXX DO TEMPO COMUM

ANO A

 

Primeira Leitura                            Rom. 8:12-17

Lia housi São Paulo nia Surat ba sarani sira iha Roma

Maun alin sira: Ne’e duni, ita la iha tusan ba isin, atu moris tuir isin. Imi moris tuir isin karik, imi sei mate; maibe tuir espírito, imi oho karik isin nia hahalok, imi sei moris.

Sira nebe Maromak nia espírito mak ukun mak Maromak nia oan sira. Basá imi la simu espírito atan nian nebe halo imi ta’uk, maibe imi simu espírito oan hakiak nian, tan ne’e, ita haklaken: “Abba, Aman!” Espírito rasik fó sasin ho ita nia neon katak ita Maromak nia oan; no oan karik, ne’e duni liman-rohan na’in, liman-rohan na’in Maromak nian no liman-rohan na’in hamutuk ho Cristo; naran ita terus hamutuk ho nia atu ita mós bele hetan naran boot hamutuk ho nia.

Maromak futar Lia.

 

Salmo Responsorial                                                                                      Sal. 67(68):2,4,6-7ab,20-21 (R.cf.21a)

Refrão : Na’i, ita Maromak, mai atu soi ita. Repete-se

Maromak hamriik, nia funu baluk sira namkari,

sira be rai kuna hasouru nia,halai housi nia oin;

maibe, ema justo sira haksolok,

haksolok iha Maromak futar oin,

no sira nakonu resin ho ksolok. Refrão

 

Kiak sira Aman, feto faluk sira biit,

Maromak hôrik iha nia kadunan santo.

Nia hadi’a fatin ida ba ema kiak,

lori ba liberdade ba ema sira iha dadur. Refrão

 

Loron ba loron, rahun di’ak nafatin ba Na’i!

Hanoin ita, Maromak ho ita, ita maksoi,

ita Maromak mak Maromak ida be soi,

Na’i soi ita housi mate. Refrão

 

Aclamação                                                                                                                                                            Jo. 17:17b,a

Refrão: Aleluia, Aleluia ! Repete-se

Ita liafuan, Na’i mak lialós tebes;

hametin ami iha lialós. Refrão

 

Evangelho                                                                                                                                                             Lc. 13:10-17

Na’i Jesus Cristo nia Evangelho tuir São Lucas

Iha tempo neba, iha loron sábado ida Jesus hanourin iha sinagoga. Iha neba iha feto nebe espírito áat ida halo moras tinan sanulo resin walu ona: nia la’o hakru’uk de’it la bele hamriik lós. Haré tiha nia, Jesus bolu nia hodi dehan ba nia: “Feto, o nia oras la iha ona.” Hafoin nia tau liman ba nia. Iha oras neba kedas, feto hamriik lós hodi hahi Maromak. Maibe, na’i ulun sinagoga nian hirus tanba Jesus fó isin di’ak iha loron sábado; nia dehan ba ema sira: “iha loron neen atu serbisu; ne’e duni, mai iha loron hirak ne’e; keta mai iha loron sábado.” Maibe Na’i hatan ba nia dehan: “Laran makerek sira, imi la kore imi nia karau eh kuda housi nia luhan iha loron sábado, hodi lori nia ba fó hemu? Ne’e duni, feto ne’e, Abraã nia oan, nebe diabo kesi ba tinan sanulu resin walu ona, la soi atu kore tiha mós iha loron sábado?” Dehan tiha nune’e, nia funu baluk sira moe hotu, maibe povo tomak haksolok tanba hahalok kmanek sira nebe nia halo.

Lia maksoyn.

Leave a Reply

Your email address will not be published. Required fields are marked *