shadow
Diocese de Dili > NOTÍCIAS > OPINIÃO > BAINHIRA RAZÃO LAIHA KBIIT MATAN BEN SAI FORÇA FOUN HODI CONTINUA LUTA

BAINHIRA RAZÃO LAIHA KBIIT MATAN BEN SAI FORÇA FOUN HODI CONTINUA LUTA

Hau hahu hau nia hanoin murak nee, ho liafuan parabens, hodi hatoo hau nia lia ksolok no hawelok ba inan feton doben sira hotu, ba loron nasional feto nebe monu los iha loron 3 fulan Novembro.

Kada tinan iha Loron 3 fulan Novembro estado no governo Timor Leste consagra hanesan loron feto nasional hodi hanoin mos heroina Maria Tapo nia mate ba luta libertação wainhira contra hasoru invasór militar indonezia iha area fronteira Tapo Bobonaro nian. Historia haktuir katak ho heroina Maria Tapo nia mate sasin sira haruka kedas karta ida ba Comité Central Fretilin hodi declara dehan “Ami Feto Tapo Oan Sei La Rende, Ami Sei Larende Nafatin No Ami Sei Funu To’o Ami Nia Ran Turuk Ikus Liu Nian”. Hafoin simu carta nee, Primeiro ministro RDTL Nicolau Lobato iha 1976 hola kedas decisão no hatur metin iha povo maubere tomak nia neon loron 3 fulan Novembro nudar loron nasional feto. Iha 1977 encontro CCF nian decreta kedas rezolusaun ida hodi valorize loron 3 fulan Novembro hanesan loron nasional ba feto Timor Leste. Loron feto nasional hahu celebra kedas iha luta ba ukun an mas que iha ailaran no iha fatin nebe falintil sira subar ba. Liu tiha restoração independensia iha 2002, iha congresso nasional feto, iha tinan 2004, nebe hetan participação maximo husi organização feto hotu-hotu iha teritorio Timor Leste laran tomak, mosu ezigensia katak Timor Leste tenque iha loron nasional ba feto, hodi fo hondra no louvor ba maluk feto sira tamba sira mos fo contribuição makas no partisipa direitamente ba luta libertação nasional. Ezigensia iha congresso nee sai hanesan plataforma ida no hodi ba apresenta iha Narlamento Nasional hodi foti desizão. Ikus mai Parlamento Nasional aceita no halo lei número 17/1/3/2005, nebe deside loron 3 fulan Novembro nudar loron nasional ba feto Timor Leste.

Envolvimento feto iha funu ba libertação tuir naração nebe atan hau hetan liu husi biografia Maria Tapo nian, feto sai hanesan segunda linha atu entende katak feto serviço makas liu mak apoia ba logistica, liu-liu prepara aihan atu bele suporta nafatin mane sira iha linha de fogo hodi kontinua luta hasoru inimigo. Buat hotu muda bainhira hetan assaltu husi inimigo, feto sira laos iha kotu maibe brani no kaer mos kilat hodi tiru malu, extraordinario tebes, iha situação ida nee. Feto hahu fo contribuição hodi luta, liu husi processo ida nebe lori risco no hodi mate hodi sosa tamba hakarak atu ema hotu moris livre no goza liberdade tuir lei universal haruka.

Evolução ba loron feto nasional no luta ba igualidade genero iha Timor Leste hatudu sinal positivo. Koalia konaba igualidade genero, ita hateke ba buat ida boot no luan tebes. Ita koalia ba contexto actual ida hodi luta atu buka defende lialos ruma hodi kore ema husi realidade ida. Igualdade género katak feto no mane iha direito no dever hanesan. Tamba nee igualidade genero nia objetivo fundamental mak oinsa bele hari sociedade ida nebe livre husi prekonseitus hotu no discriminação. Feto no mane livre atu halo decisão, desenvolve sira nia capacidade pessoal sira sem interferência no estereótipos.

Hare ba definição badak nebe iha lori ita tama ba realidade iha Timor Leste. Oinsa ho igualidade genero iha Timor Leste, ninia evolução no impacto ba iha sociedade nia moris. Ita lao tuir espaço tempo nian nebe ita lao dau-daun, sociedade Timor Leste neon começa ona nakloke, matenek iha fuan hatene hadomi no simu malu, hirak nee hotu lori ita ba solução ida no halo ita sente katak feto no mane la iha diferensas, hatudu sinal diak ba evolução husi igualidade genero nebe hetan mundo no liu-liu Timor Leste luta ba. Naroman nee mosu no sau dau-dau hanesan loro matan nia naroman, ita hein atu labele lakon iha sociedade nia let. cultura feto sa no umane belit metin iha ita nia Hanoi, feto iha kotuk no mane iha oin, conceito ida nee, too oras nee sei lao, ba hau pessoal nee la sala, los basa lisan hanorin buat ida maibe la significa atu taka dalan hodi la valorize feto sira, feto nafatin iha oportunidade atu hola decisão ruma tuir lisan nebe iha no iha espaço ida deit atu halo qualquer atividade ida hodi fo contribuição no laiha descriminação nee mos hatudu igualidade genero.

Leitores doben sira, ita la hare igualidade género husi aspeto ida deit, maibe ita precisa hare ho visaun ida luan no precisa iha conhecimento ida diak atu labele generalize conceto igualidade genero nee hodi halo definição seluk ida nebe la iha direção. Organização feto sira iha Timor Leste hola papel ida importante tebes, atu hadaet no lori formação no educa povo Timor Leste hodi bele conciente no tau valor hanesan ba feto no mane, tau valor ida oinsa mak oras nee sociedade sivil sira hakatak? Iha pontos lubuk ida nebe ita precisa hare: Respeita feto, fo fatin ba feto nia participação, cria oportunidade hanesan no buka solusiona feto nia problema hodi tau iha prioridade assunto feto nian atu hatudu katak feto no mane iha direito no dever hanesan atu contribui ba desenvolvimento nasional sem iha descriminação sociedade nia let.

Impacto no modernização tempo nian nebe afeita tebes ba luta feto nian ba igualidade genero lori ita ba pensamento critica balun tuir mai nee. Ita hahu ho Pergunta hirak tuir mai nee; husi introdução no evolusan nebe ita hatur iha lete, lori pergunta essensial ida mai ita, Igualidade Genero ida nebe mak oras nee inan feton sira entende, liga ho situação real moris inan feton sira nian? Igualidade genero entermos de liberdade ou libertinagem?

Realidade hatudu momos mai ita, mundo Terceira millennium lori buat seluk nebe halo ita sentre estranho uitoan maibe nee mak realidade nebe haleu ita. Media social sira, liu-liu Facebbok sai fatin atu ema halo actividades hotu-hotu. Inan feton sira, nia komprensaun ba igualidade genero nee mak ida nebe? Pergunta mosu, resposta la lori solução, ate ikus mai sresposta mos nakfilak ba pergunta lahatene ita atu ba nebe? Tamba sa atan hau hatur questaun lubuk ida nunee, nee la significa hau kontra maibe hakarak atu halo kritika construtivo ruma atu ita bele intende didiak saida mak igualidade genero no saida mak hau nia dignidade humano.

Hau la koalia sobre etica moral maibe hau hakarak atu ita define buat rua nee hodi tetu no tau iha fatin, atu nunee ita hakilar ba igualidade genero karik ita koalia ba dignidade ema nian, ba hau igualidade genero no dignidade do pessoa humano nee buat rua nebe belit metin hanesan isin lolon ho klamar nebe labele tan atu haketak. Iha sosiedade feto sira uja sira nia direito, sira nia liberdade hodi halo buat hotu tuir hakarak ate ikus mai liberdade nee nakfilak tia ba libertinagem. Tamba sa ita tenque dehan nunee, tamba realidade hatudo, feto lubuk ida luta ba igualidade genero, atu ema tane as feto nia dignidade no participação iha sociedade, inan feton lubuk ida mos, liberta sira nia an sai husi kuridor nebe iha hodi halo buat seluk nebe contrario. Halo buat hotu tuir deit hakarak, hanoin dehan ida nee mak liberdade lolos, ida nee mak igualidade genero nebe ema hotu valorize. Buat hotu acontese, fo sala ba cultura, hodi dehan Feto hanesan objektu iha cultura Timor Leste. Tamba cultura mak la fo espaço. Nee sala? Feto laos objeto. Se feto ida mak dehan nia sai hanesan objeto iha cultura Timor Leste. Oinsa ho nia luta rasik ba igualidade género iha sociedade nebe nia iha ba. Cultura la haketak no fo espaço ba feto hanesan objecto, maibe cultura iha prespetiva nebe lolos nee fo espaço atu mane sira respeita no tane feto sira nune mos ba feto sira tenque valorize mane hanesan protetor da familia no mos ba geração tuir mai. Labele generalize buat hotu hodi hanoin dehan atu muda buat hotu iha minute ida nia laran, maibe buka intende atu labele sai husi coridor nebe iha.

Tamba nee ikus husi opinião nee lori hau ba taka ho tema nebe tau iha leten katak inan Feton sira dalabarak liu ho matan ben simu realidade bainhira sira nia razão la iha ona kbiit, tamba nee iha neon ida, fuan ida iha fiar, deside Timor nia future. Povo nee nia moris continuação conta mos ho feto nia luta***

(Husi : Lakere Aulain)

Email               : aulainfuhur@gmail.com

Helafatin         : Comoro, delta I

No. contac.      : 77747750

Leave a Reply

Your email address will not be published. Required fields are marked *