shadow
Diocese de Dili > NOTÍCIAS > OPINIÃO > GOVERNO DAHITU “NU AHI INAN NO WE-MATAN”

GOVERNO DAHITU “NU AHI INAN NO WE-MATAN”

Husi Pe. Herminio de F. Gonçalves

Director Comissão Justiça e Paz Diocese Dili

 

  1. Introdução

Eleição hotu tiha, público hein governo foun nebe hanaran “Sétimo Governo”, dudu ba dada mai, ikus mai Fretilin mak consegue harí duni governo. Formação governo dahitu nian nee hamosu questões barak husi público no partido sira. Balun questiona kona ba governo minoritário, balun seluk questiona kona ba constitucionalidade do governo, balun fali questiona konaba duração ka ketahanan governo ida nee too nia rohan ka lae? Questões sira nee mak ita koko atu hamosu análisa balun iha nee, la iha intenção atu hamis ka defama ema ruma ka partido balun.

  1. Resultado Eleição

Resultado eleição hatu´ur partido político sira iha situação ida defícil tebes. Laiha partido ida mak manan maoiria absoluta. Partido Fretilin mak sai hanesan partido vencedor maibe liu deit cadeira ida husi partido CNRT. Hare ba composição cadeira iha parlamento, Fretilin ho vinte e tres caideiras no Partido CNRT ho vinte e dois cadeiras, partido vencedor rua nee dudu malu partido ida nebe mak iha iniciativo atu forma governo. Partido CNRT molok tama ba votação declara antes katak lamanan maioria, CNRT hamrik nu´udar oposição lakohi forma Governo.

Hafoin eleição hotu tiha, Tribunal de Recurso anuncia resultado eleição, partido CNRT hahu fali reunião extra ida iha CCD hodi hola opção entre posição ka oposição. Iha encontro refere, partido CNRT kaer metin nafatin princípio foti opção política katak, CNRT nafatin iha oposição. Iha tempo hanesan Presidente Partido CNRT halo mos decalaração katak nia resingna-an husi Presidente Partido, maibe hamutuk nafatin iha CNRT.

Hare ba situação política ida hanesan nee laiha tan dalan seluk ona, Partido Fretilin nudar vencedor, maske minoria tem que foti iniciativa forma governo. Basá partido segundo mais votado declara ona nia posição iha oposição. Situação política ida hanesan nee obriga Presidente da República tem que hanoin extra no buka meios atu indigita partido balun nia ema ba cargo primeiro ministro hodi hahu forma coligação ba formação governo basá labele husik nação ida nee ho tulo negara tanpa Pemerintah.

  1. Forma Coligação

Fretilin foti iniciativa convida partido PLP ho Khunto ba forma coligação, partido PD dada tiha tempo balun molok tama ba decisão hakarak ou lakohi atu coliga. Wainhira partido PLP fo lampo verde ba Fretilin atu halo coligação hodi hakat ba formação governo partido PD mos pánico. Reunião por reunião acontece iha hotel Novo Turismo, resultado husi reunião sira refere Nihil, significa resultado zero.

Partido PLP dada-an husi coligação, partido PD aproveita kedan tempo mamuk nee hodi loke-an ba convite husi partido Fretilin atu halo coligação hodi hakat ba formação sétimo governo. Iha tempo nebe hanesan Fretilin hakarak halo coligação ida forte tamba ne’e nia hakarak forma governo hamutuk ho PD no Khunto atu bele hetan maioria parlamentar tuir ukun fuan constituição art. 106:2.

Processo negociação ba formação VII governo constitucional lao nafatin ho partidos sira ne’e maibe to’o iha loron ikus atu assina deit acta coligação nian iha CCF, Khunto decide devórcio tiha ho Fretilin hodi la marca presença iha sede Comite Central Fretilin nian. Buat nebe Fretilin hakarak la sai tuir, biar nune’e PD ho Fretilin hakat nafatin ba oin hodi forma governação mas que la hetan maioria parlamentar. Ne’e hamosu situação ida iha nebe CNRT la preocupa, PLP apatis, Khunto bilin balan iha klaran.

  1. Modal Nekat Fretilin

PD nia presença iha Fretilin nia sorin hanesan anjo salvador hodi salva fretilin la hakat mesak ho mínimo parlamentar, maibe hasae grau ida ba minoria parlamentar. Mas que minoria parlamentar, maibe Fretilin brani hakat nafatin ba formação governo atu la husik Timor-Leste hanesan negara tak bertuan ka nação nebe laiha nain.

Wainhira uma ida nebe laiha nain, ema seluk bele aproveita ocasião hodi halo ocupação ilegal hanesan 1975 nian. Minoria parlamentar la sai ona nudar pertimbangan ka perhitungan ba Fretilin, maibe buat nebe sai preocupação ka perhitungan ba Fretilin mak tem que salva Timor-Leste husi situação fakum atu labele mosu khaos.

Governação fakum basá sexto governo constitucional remata tiha ona nia mandato constitucional, sementara governo foun sedauk iha. Nee mak ita bolu negara fakum. Wainhira “Nagara Fakum” iha tempo naruk, iha poténcia atu lao ba khaos. Basá sexto governo iha deit mandado gestão laos decisão.

Governo gestão katak, funcionamento estado nian lao hela iha parte atendemento público nian, governo gestão labele hamosu decisão ruma basá nia mandato constituicional remata tiha ona. Karik mosu rungu-ranga ruma, goveno gestão foti decisão nee inconstitucional. Governo gestão lakon mandato constitucional halo plano orsamental ba ano fiscal foun. Modal nekat Fretilin nian nee laos deit atu aproveita tur iha cadeira mamar governo nian, maibe atu fo proteção ba nação.

  1. Minoria Parlamentar

Ema barak mak questiona kona ba duração governo ida ho minoria parlamentar. Situação ida nee único uitoan. Mosu keresahan hati husi público katak, minoria parlamentar nee bele halo aprovação ba orsamento geral do estado ano fiscal 2018 nian bele passa maibe mos labele passa iha parlamento? Hau optimista katak, bele passa wainhira orsamento nee refleta necessidade básica povo nian, hanesan : saúde, educação, be mos, ahi, dalan no seluk-seluk tan.

Oposição la significa katak tem que vota contra buat hotu nebe governo apresenta ba parlamento atu aprova. Oposição barak fortifica governação governo ida nian. Oposição laos atu forma jurus hodi hamonu governo. Factos hatudu tiha ona katak, vota ba hola kareta foun ba parlamento quarta ligislatura nian, hotu-hotu vota unanimidade, partido oposição nebe koalia barak ba necessidade povo mos la vota contra. Ibun bele boot, maibe wainhira buat nebe beneficia ba sira nia-an sira la dúvida atu fo voto a favor.

Governo mak tem que iha capacidade atu interpreta partido oposição nia hakarak iha parlamento, detecta didiak sira nia prioridades halo plano ida ho diak, razoavel bele responsabiliza, acumula oposição nia interesse, aprovação orsamento bele passa ho maioria de voto.

Tane aas interesse estado no interesse povo buat ida sei la susar, dúvida sei lakon, esperança sei mosu. Povo mos le tiha ona katak, sira nebe mak nia voz alta iha parlamento nee, usa povo hanesan plástico hodi hafalun sira nia interesse barak iha laran. Povo laos tiha fali objetivo dezenvolvimento nian, maibe nakfilak tiha-an ba instrumento ida atu atinge sira nia objetivo. Tan nee, lalika pecimista kona ba aprovação orsamento geral do estado ba ano fiscal 2018 nian atu lapassa.

  1. Legalidade Governo Dahitu

Koalia kona ba legalidade governação sétimo governo, laos hare deit ba iha constituição iha alinea balun deit, maibe bele hare mos iha artigo seluk. Artigo sira la hamrik ketak-ketak, maibe cada artigo iha corelação ho artigo seluk. Karik lei la difine hotu bele mos, hare iha situação casual hanesan descreve ona iha leten.

Legalidade primeiro mak Fretilin sai nudar vencedor iha eleição geral parlamentar. Fretilin nudar partido mais votado ho vinte e tres cadeiras iha parlamento nacional. Nee significa katak, Fretilin hetan tiha ona legimitação husi votos povo nian, Fretilin preenhe critérios partido mais votado artigo 106 alinea primeiro. Artigo 106 alinea segundo cacat hukum, basá la preenche maioria parlamentar. Ho lia-fuan seluk katak, Fretilin partido mais votado, maibe la preenche critério maioria parlamentar. Presidente da República hasai DECRETO PRESIDENCIAL atu FORTIFICA autoridade ba primeiro ministro indigitado.

Ema questiona DECRETO Presidente nian, tan nee, hare husi liur hanesan maun-alin nain rua hili malu, maibe hare husi laran hasoru situação dilemático ida nebe defícil atu foti decisão. Basá partido segundo mais votado declara-an hamrik hanesan oposição iha parlamento nacional. Tan nee, maski cacat hukum obrigatoriamente presidente tem que halo decisão hodi fo legalidade ba partido mais votado forma governo atu hatan ba situação kekosongan Pemerintahan.

  1. Constitucionalidade Governo Dahitu

Contitucionalidade ba governo ida atu lidera nação iha periode ida, base legal mak consituição. Contituição mak fo legalidade ba poder ida atu bele kaer ukun too rohan. Sétimo governo nia caso ita bele considera específico uitoan. Presidente da República hasai decreto ida atu bele reforça contitucionalidade ba governação sétimo governo nian. Hare tuir constituição artigo 106 Katak Fretilin hetan votos mais votado husi partido CNRT, maibe laos absoluta. Tan lahetan maioria absoluta obrigatoriamente tem que halo coligação ho partido kiik sira seluk atu atinge maioria parlamentar. Iha processo coligação nia laran mos la atinge nafatin maioria parlamentar wainhira Khunto dada-an husi coligação. Necessidade nação nian, obriga Fretilin hakat ba oin ho minoria parlamentar. Tamba nee mak ema barak questiona ba legalidade sétimo governo nian. Maioria absoluta la alcança, maioria parlamentar mos la atinge. Karik nunee mak governo ida nee sei bele bolu governo constitucional? Ba parte ida nee Jurista sira nia serviço, liu-liu Tribunal Recurso nia servisu nudar interpretador ba constituição!

Maski iha questões sira hanesan nee Fretilin aten brani hakat ba formação governo tan partido sira seluk labrani atu forma governo. Karik Fretilin mos la hakat ba forma governo, husik hela nação ida nee mamuk sem iha governo? (tampa pemerintah)? Tan nee, laprecisa tan atu ita halo questões bar-barak maibe fo apoio ba governo nebe iha atu lori dezenvolvimento ba povu. Protege nação nee husi risco negara tak bertuan.

  1. XANANATAUR Silêncio Profundo.

Depois de eleição hotu tiha, Fretilin inicia forma governo dahitu CNRT-PLP hili dalan oposição XananaTaur silêncio profundo los. Sira nia porta vos mak koalia hodi naran partido nian. Dr. Mari anúncio iha TVTL katak iha contacto ho sira nain rua. Sira nain rua rasik la declara sai husi sira nain rua nia futar ibun katak, apoio ka la apoio formação governo dahitu ida nee.

XANANA-TAUR nudar general nain rua completa malu iha linha guerrilhia nian, hahu husi base de apoio rahun mudança ba forma clandestina no guerrilha nudar maun-alin kaduak nebe la husik malu iha ailaran. Sira nain rua nia posição nudar Primeio comandante no segundo comandante da guerrilha. Funu nain, nain rua nia silêncio profundo hanesan ação protesto ida ba formação governo dahitu, basá hare momos katak linha diplomacia nian bolu malu ba kaer ukun, marginalisa tiha funu nain, nudar frente força armada nebe resiste, hasoru udan-anin terus hamlaha no hamrok, aimoruk laiha, simu kartus, bombardimento tasi no loro-matan nian durante funu ba ukun aan.

  1. Governo dahitu Dupla Naran

            Governo dahitu mosu ho naran dupla. Governo coligação ao mesmo tempo governo inclusão. Governo coligação tan forma coligação ho PD, maibe iha estrutura governo insert ema balun husi partido oposição CNRT no PLP menos KHUNTO. Mas que membros governo husi partido oposição sira declara tiha ona ba público katak, sira nia presença iha governo dahitu nian la representa partido, maibe sira ba hanesan indivído independente. Hanesan individo independente, maibe tama hela iha estrutura partido oposição iha parlamento, bele garante independéncia nee ka lae? Basá iha partido oposição, maibe tem que tuir orientação partido nebe kaer ukun. Evangelho Jesus Kristo nian dehan katak “ema ida labele servi patrão nain rua dala ida”.

Modelo hanesan nee, ita bele hare husi parte rua. Parte ida karik individo independente duni significa sira trai tiha ona partido nebe sira hatur-an ba. Parte seluk ita bele desconfia katak, partido oposição sira mak halo jogada oin kotuk karik. Iha oin dehan oposição, maibe iha kotuk sira dudu membros ba hola parte iha governo. Karik jogo oin kotuk significa imi soe rai rahun ba povo nia matan. Bele mos Partido nebe kaer ukun mak halo tática ida hanesan nee atu halo rahun partido oposição sira. Karik partido kaer ukun mak monta estrategia ida nee hodi garante estabilidade governativa ba futuru tinan lima nian.

  1. Postura Governo Dahitu Bubu Matak

            Modelo coligação no inclusão governativa dala ida, afeta ba postura governo

boot demais. Título ministro no secretário estado sira nian mos mesak bobot no estranho, defícil tebes atu bele decora lalais. Exemplo mak ministro presidência…..

Postura governo nebe boot sei causa mos ba orçamento boot tuir postura governo nian. Orçamento nebe boot sei lori peso ba nação. Ministro ho secretário estado sira laos manan osan kiik, aumenta tan equipamentos hanesan kareta ba ministros, secretário estado no parlamento nen nulu resin lima nian, orçamento mos bubu hotu dala ida. Dalaruma mak povo hela naran deit. Povo sai deit nudar consume política ba ukun-nain sira nia moris diak.

Plano uluk nebe Dr. Mari Alkatiri dehan katak kareta ida capacidade ba ema uitoan sai deit nudar estatemento política ida nebe mamuk, maibe la implelementa iha realidade. Programa 6H Harii, Hametin, Hadia, Hamos, Habelar, Haburas sei sai deit hanesan retórica política campanha nian lamosu iha realidade.

Oinsa mak bele hamos, wainhira membros governo balun iha caso antes naran apontada iha Ministério Público no CAC. Komf Timor Post 3/10/2017. Maski seidauk iha carta notificação husi ministério público, maibe sedu ka tarde sei bolu nafatin. Tuir los molok atu simu tomada de posse precisa seleção liu husi ministério público naran candidatos membro governo sira. Membros Governo dahitu nebe antes iha caso sei sai aitarak ba governo rasik atu atinge boa governação.

  1. Deputado Idêntico ho Prado

Mandato deputado terceira legislatura besik remata halo hela problema leilão ba kareta prado nebe provoca demostração husi movimento Uninivercitário Timor-Leste tomak, ikus resulta atuação polícia causa ema balun kanek, balun ba sela, balun seluk hemu gas lacrimogênio. Iha tempo neba, bancada partido Fretilin, CNRT, PD no Frente Mudança halo declaração katak, sira sei cancela leilão no dada hikas kareta sira fila nudar património parlamento.

Quarta legislatura nebe chefia husi Sr. Aniceto Guterres dada duni kareta refere, maibe continua Leilão, mantein sosa kareta foun ba parlamento sira.

Prado sai polêmica boot entre parlamento terceira no quarta legislatura ho Movimento Universitário. Parlamento nebe representa povo, la sensível rona povo ninia lia halerik.

Orsamento do estado 2018 sidauk debate, maibe jatah deputado nian aprova uluk tiha ona hola kareta foun ho votos unanimidade. Povo sira balun iha crecimento economia hakarak sosa kareta DNTT bando ho razão ingarafamento no fatin laiha ona.

Relaciona ho hola kareta foun MUTL sira halo ona ameassa atu hatun massa halo demostração contra decisão parlamento nian ba sosa kareta foun. MUTL nekad pronto mate, tama sela no prisão wainhira parlamento lakohi cancela. MUTL sira nia razão los tan hare ba povo seidauk moris diak, falta necessidades básicas hanesan be mos, dalan aat, economia insustentável ahi no seluk-seluk tan.

Orçamento tres milões ba hola kareta laos kiik. Folin cada kareta bele dada be mos ba aldeia ida, hola trator manual ba grupo holticultura sanulu, hola cadeira no mesa ba escola lima. Escola sira iha Dili laran hanesan Cinco de Maio, Quatro de Setembo, Nobel da Paz no seluk tan condição infavorável ba alunos sira atu tuir aprendizagem ho diak. Parlamento foun iha ponto balun hanesan fali taka matan ba necessidade básico sira nee hodi aprova osan ba sosa kareta luxo.

Universitário sira nudar povo nia oan nebe representa povo fora de uma fukun (luar gedung) iha dever moral sai lian ba povo lian laek sira. Wainhira Movimento Universitário sira halo demostração hetan mos medidas husi Polícia Nacional Timor Leste. Iha ne’e ita hare katak mosu hahalok violência balun, nune’e hau hanoin ita bele hanaran parlamento laos insidência parlamentar, maibe bele mos troca fali ho naran ba “acidente parlamentar”. Ação violento sira sei sai nudar consumo político ba maioria parlamentar oposição hodi ataka no demite governo iha qualquer tempo.

Hare ba realidade, governo ho parlamento foun sidauk too loron 100, maibe consegue hare tiha ona buat tolu principal nebe la fo satisfação ba maioria bloco oposição iha parlamento mak hanesan, Lei governo local nebe hetan veta husi PR, ilegal fishing nebe compania halao hamutuk ho MAP. Parlamento la representa povo lian laek sira iha uma fukun parlamento nacional. Indonesia nia provervo ida dehan”siapa yang menabur duri ia akan menuai duri pula”. Se mak kuda aitarak nia sei kuu aitarak”.

  1. Conclusão

            Iha Parte conclusão, hau hakarak esplica kona ba significado título husi opinião nee katak, filósofo sira balun dehan mundo nee forma ho ahi fukan ida nakduir no namkari mai hodi forma tiha planeta iha nebe hanaran mundo. Filosofo seluk haktuir katak, we turuk mak turuk mai hodi forma hela planeta ida nebe hanaran rai. Filosofia filósofo sira nian koko atu halo” pembuktian terbalik” hodi hetan buat ida naran “ kebenaran ilmu” tuir experiê no reflexão ciêntifica.

Ahi no we buat rua nebe nunca dame malu, maibe bele servisu hamutuk. Ahi iha kbiit halo nakali bee. We mos iha kbiit atu hamate ahi. Ahi kose lolon ida iha kbiit ha´an rai (inséndio) tomak, we turuk oan ida nebe turuk bebeik iha fatuk leten iha kbiit atu hafera fatuk boot ida. Ahi nudar símbolo ba roman no we símbolo ba matak malirin. Ahi no we hamutuk halo karau kulit be mahar sai dodok, halo buat sira nebe matak sai tasak. Ahi no we hamutuk iha tisi koto moruk sai midar. Ahi fo manas no roman ba ema, we iha kbiit hatubun no haburas ai-horis sira.

Ahi no we bele simboliza característica povo no ukun nain timoroan sira nian dala balun sai ahi sunu no halakan situação política, dala balun sai we fo matak malirin, maibe dala ruma mos sai we boot sasurut foer no ai-tomak sira tama tasi. We no ahi hau usa hodi simboliza política maioria no minoria parlamentar nebe nakonu ho hahalok arrogante, no vaidoso nian nebe sai preocupação público ba política loron ohin nian nebe acontece daudaun iha rai doben ida nee.

Leave a Reply

Your email address will not be published. Required fields are marked *