shadow
Diocese de Dili > NOTÍCIAS > LETURA DIÁRIA > Domingo, XXXIII DO TEMPO COMUM

Domingo, XXXIII DO TEMPO COMUM

ANO A

 

Primeira Leitura                                                 Prov. 31, 10-13. 19-20. 30-31

Lia housi São Paulo nia surat ba sarani sira iha Provérbio

Sê mak bele hetan feto ida hahalok di’ak? Nia kmook liu murak sira! Nia la’en tau laran metin ba nia, basá, buat di’ak la susar. Nia fo moris ksolok de’it ba nia káben, la fó susar iha nia moris tomak. Nia buka bibi-malae fulun ho kábaas, nia liman kaer knar ho ksolok. Nia liman kaer klalai, nia liman fuan ti’I sasular. Lolo liman ba ema susar, loke liman ba ema ki’ak. Buat nebé furak bele bosok, buat nebé kmook folin laek; feto nebé hamta’uk Maromak it abele hahí nia. Fo netik nia kolen sorin ba nia; buat nebé nia halo hahí nia iha cidade odamatan.

Maromak Futar Lia.

 

Salmo Responsorial                                                                                                                                                             Sal. 127 (128), 1-2, 3. 4-5

Refrão : Rahun-di’ak ba ida nebe

                 Tuir Maromak nia dalan!!! Repete-se

 

Rahun-di’ak ba ida nebé hamta’uk Maromak

Hodi tuir Na’i nia dalan!

Nia sei han nia kolen,

Di’ak no ksolok hela ho nia. Refrão

 

Nia káben hanesan uvas naburas nafatin

Iha nia uma laran.

Nia oan sira hanesan oliveira nia tuban,

Hadulas nia moris tomak. Refrão

 

Ne’e bença ba ema nebé hamta’uk Maromak,

Na’i sei hahí nia housi Sião.

Nia sei haré jerusalém nia di’ak

Iha nia moris tomak! Refrão

 

Segunda Leitura                                                                                                                                                                                             1 Tes. 5. 1-6

Lia housi São Paulo nia surat ba sarani sira iha Tessalónica

Maun alin sira: Kona ba tempo no loron nebé Na’iatu mai iha dala ikus, lalikan ha’u atu hakerek ba imi. Imi rasik hatene nanis katak Na’i sei mai, hanesan áhu-na’in ida. Wainhira ema aat dehan: “Dame no hakmatek,” ida ne’e, susar no aat sei monu iha sira leten, hanesan terus nebé feto hetan molok atu tur-áhi; susar ne’e sei kona duni sira. Maibé, maun alin sira, imi la la’o iha nakukun, atu loron ne’e toman imi hanesan na’ok-ten ida, tan imi naroman nia oan, loron nia oan. Ita laós nakukun no kalan sira oan. Tan ne’e, ita keta toba hanesan ema seluk; ita la’o ho neon moris hodi hatene ukun an rasik.

Maromak Futar Lia.

 

Aclamação                                                                                                                                                                                                               Lc. 21, 28

Refrão : Aleluia, Aleluia!!! Repete-se

Foti ulun hodi haré mai,

Tan imi nia Maksoyn besik ona. Refrão

 

Evangelho                                                                                                                                                                                                         Mt. 25, 14-30

Na’i Jesus Cristo nia Evangelho nu’udar  São Mateus haktuir

Iha tempo nebá, Jesus dehan ba Escolante sira aiknanoik ida ne’e: “Ema ida molok atu la’o ba dook, bolu nia atan sira, hodi fo hela nia riku ba sira. Nia fo osan mutin lima ba ida, ba ida seluk fo rua, ba ida seluk tan fo deit ida, tuir ida-idak nia kbiit. Hafoin, nia ba ona. Ida nebé simu lima ba fila liman hodi hetan fali funan lima. Ida nebé simu rua mós ba fila liman hodi hetan fali funan rua. Maibé, ida nebé simu de’it ida, nia ba ke’e rai hodi hakoi tiha nia na’in nia osan. Kleur tiha, atan sira nia na’in to mai, hodi ba sisi tusan ho sira. Ida nebé simu osan mutin lima hakbesik hodi fo tan funan lima, dehan: ‘Na’i, ita fo hela osan lima mai ha’u; lima ne’e, nia funan nebé ha’u manán!’ Na’i hatán ba nia: ‘Di’ak, atan di’ak! Tan ó di’ak iha buat witoan, ha’u sei tau ó iha buat wa’in nia oin. Mai haksolok hamutuk ho ha’u!’ Hakbesik mos ida nebé simu rua ne’e, dehan: Na’i, ita fo rua mai ha’u. Rua ne’e nia funa nebé ha’u manán!’ Na’i hatán ba nia: ‘Di’ak, atan di’ak! Tan ó di’ak iha buat witoan, ha’u sei tau ó iha buat wa’in nia oin. Mai haksolok hamutuk ho ha’u!’ Hakbesik mos ida nebé simu ida de’it, dehan: Na’i, ha’u hatene katak ita ema maka’as: Ita sohin fuan iha nebé ita la kuda, ku’u fuan iha nebé ita la tau. Ha’u ta’uk, ba subar tiha osan ne’e iha rai. Buat nebé ita nian, mak ne’e.’ Na’i hatán ba nia: ‘Atan aat, baruk-ten! Ó hatene katak sohi ida nebé ha’u la kuda, ha’u ku’u fuan iha nebé la tau. Ne’e duni, ó bele tau osan ne’e iha banco, molok ha’u fila mai, bele iha ona funan! Hasai osan nebé iha nia hodi fo ba ida nebé iha sanulu. Tan, ema iha ona, sei fo tan, hodi hetan wa’in liu; maibé ida nebé laiha, sei hasai tiha nia sasán hotu. Oras ne’e, lori atan aat ne’e hodi ba soe iha nakukun laran! Iha nebá, ema sei tanis, sei halerik.”

Lia Maksoyn

Leave a Reply

Your email address will not be published. Required fields are marked *