shadow
Diocese de Dili > NOTÍCIAS > LETURA DIÁRIA > Quarta-Feira, XXXIII DO TEMPO COMUM

Quarta-Feira, XXXIII DO TEMPO COMUM

ANO A

 

Primeira Leitura                                                                      2Mac. 7. 1, 20-31

Lia housi segundo livro Macabeus nian

Iha loron hirak neba, maun ho alin na’in hitu hamutuk ho sira nia inan, ema dadur tiha. Liurai Síria nian, baku sira ho chicote no karau nia uat, hodi obriga sira atu han na’an fahi nebe Lei Judeu sira nian bandu atu han. Sira nia inan nia barani halo ema hotu hakfodak no soi atu ita hanoin hetan nafatin nia hahalok ne’e. Wainhira nia haré nia oan na’in hitu mate iha loron ida de’it nia laran, nia terus ho aten barani, tan nia tau neon ho laran metin iha Na’i. Ho neon no laran tomak fó aten barani ba sira ida-idak ho sira lian rasik, fó barani ba nia hanoin be feto nian, hanesan mane asua’in, nakonu ho hanoin ukun na’in sira nian, dehan ba nia oan sira: “Ha’u la hatene tuir oinsá imi mosu iha ha’u knotak; la’os ha’u mak fó iis no fó moris ba imi; la’os ha’u mak tau hamutuk baluk sira housi imi isin lolon nebe imi ida-idak iha. Tan ne’e, Maromak nebe hakiak mundo, halo ema moris, no hakiak buat hot-hotu, Nia moris mak sei haraik fali ba imi iha Nia laran-luak, iis no moris nebe ohin imi rasik heuuai tan hadomi Nia lei”.

Nune’e, liurai Antíoco ta’uk ema heuuai nia; nia hanoin katak liafuan hirak neba ko’alia hasouru nia. Liurai haré katak oan ida kiik liu sei moris hela, nia la hamaus de’it ho liafuan, maibé, nia promote hodi jura katak nia sei halo labarik ne’e sai riku no di’ak hodi fó knaar boot ba nia atu hala’o wainhira nia husik tiha nia bei-ala sira nia lisan. Tan foin sa’e ne’e la kohi rona liurai nia liafuan, liurai bolu nia inan mai iha nia oin, hodi fó hatene ba nia atu fó hanoin di’ak ba nia oan Atu soi nia moris. Liurai ko’alia kleur ho nia inan; nia inan halo tuir duni atu hateten ba nia oan tuir liurai nia hakarak. Nia hakruuk ba nia oan hodi hasara liurai laran áat ne’e nia hahalok áat ho sira nia lisan rasik hodi dehan nune’e ba nia oan: “Ha’u oan, hanoin netik ha’u, nebe lori ó iha ha’u knotak iha fulan sia nia laran, fó susu ó iha tinan tolu nia laran, hakiak ó, hanourin ó, fó han ó to’o ohin loron. Ha’u oan, ha’u husu ba ó atu hateke ba Lalehan no hateke mós ba rai. Buat hotu nebe ó haré hetan sira, hatudu atu fó hatene katak Maromak la hakiak buat sira ne’e housi buat nebe iha nanis ona; hanesan ne’e mós kona ba ita, ema. Ó keta ta’uk ema laran áat ida ne’e, maibé, ó sei banati tuir ó nia maun sira hodi simu mate, atu nune’e, tan Na’i Nia laran-luak, ha’u bele ha’u bele simu fali ó hamutuk ho ó nia maun sira iha loron ikus”.

Wainhira nia inan ko’alia hotu tiha, nia dehan: “Tan sá imi hein? Ha’u la halo tuir buat nebe liurai haruka. Ha’u sei halo tuir lei nebe fó sai housi Moisés ba ha’u nia bei-ala sira. Ó be halo buat áat oi-oin hasouru Hebreu sira, ó sei la halai housi Maromak Futar Liman”.

Maromak Futar Lia

 

Salmo Responsorial                                                                                                                                            Sal. 16(17). 1. 5-6. 8b-9a e 15 (R.15b)

Refrão : Na’i, ha’u neon sei haksolok tebes,

              Wainhira Ita Glória mosu mai!!! Repete-se

Na’i, rona ha’u be justo,

Rona ha’u nia halerik ba;

Sée tilun ba ha’u hamulak,

Be ha’u halo ho laran lós. Refrão

 

Hametin ha’u ain tuir Ita Nia dalan,

Atu ha’u nia hakat la bele sala,

Maromak, ha’u bolu Ita, Ita sei hatan mai ha’u;

Sée tilun no rona ha’u liafuan. Refrão

 

Na’i, souri ha’u iha Ita liras nia mahan,

Dook housi sira be halo áat mau ha’u.

Na’i, haraik mai ha’u atu haré Ita Futar Oin,

Wainhira ha’u hader habosu ha’u ho Ita ilas. Refrão

 

Aclamação                                                                                                                                                                                                        cf. Jo. 15. 16

Refrão : Aleluia, Aleluia!!! Repete-se

Laos imi mak hili Ha’u, Ha’u mak hili imi hodi haruka

Imi ba atu bele fó fuan no imi nia fuan bele hela ba nafatin, Nai dehan. Refrão

 

Evangelho                                                                                                                                                                                                          Lc. 19. 11-28

Na’i Jesus Cristo nia Evangelho nudar São Lucas haktuir

Iha tempo neba, Jesus haktuir tan aiknanoik ida, tanba Nia besik ona Jerusalém, no mós tanba sira hanoin katak Maromak nia reino sei mosu lalais. Ne’e duni, Nia dehan: “Ema boot ida ba tiha rai dook atu simu reino, hafoin fila fali. Bolu tiha nia atan na’in sanulu, nia fahe ba sira osan mean sanulu, hodi dehan ba sira: ‘Fila liman ba to’o ha’u sei fila fali mai.’ Maibé ema sira iha reino neba odi nia. Sira haruka manuain sira tuir nia hodi dehan: ‘Ami lakohi ema ne’e atu ukun ami.’

Simu tiha reino, wainhira nia fila hikas, nia haruka ema bolu atan sira nebe nia fó osan, atu hatene sira manan hira. Ida uluk mai dehan: ‘Na’i, ita nia osan manan sanulu tan.’ Nia hatan: ‘Di’ak tebes, atan di’ak, tanba ó ema lós kona ba sasan uitoan, ó sei ukun cidade sanulu.’ Atan seluk mai dehan: Na’i, ita nia osan manan lima tan.’ Nia hatan mós ba ema ida ne’e: ‘Ó mós sei ukun cidade lima.’ Ida seluk mós mosu mai dehan: ‘Na’i ita nia osan mak ne’e. Ha’u rai didi’ak iha hena ida, basá ha’u ta’uk ita nebe ema si’akten, nebe foti buat nebe la rai hela no ku’u buat nebe la kuda.’ Ba ema ne’e nia simu fali: ‘Housi ó nia ibun rasik, ha’u tesi lia hasouru ó, atan áat. Ó hatene katak ha’u ema laran tós, nebe foti buat nebe la tau, ku’u buat nebe la kuda. Ne’e duni, tansá ó la hatama ha’u nia osan iha banco atu, fila tiha, ha’u bele manan nia osan funan?’ Hafoin nia dehan ba sira nebe hamriik iha neba: ‘Hasai tiha osan housi nia, hodi fó fali ba ida nebe iha sanulu.’ Sira dehan: ‘Na’i, nia iha ona osan sanulu.’ ‘Ha’u dehan ba imi: ba ida nebe iha ona, sei fó tan; maibé housi ida nebela iha, sei hasai tan buat nebe nia iha. Kona ba ha’u nia funu baluk sira nebe lakohi ha’u atu ukun sira, lori sira mai iha ne’e, oho tiha sira iha ha’u nia oin!’” Dehan tiha ne’e, Jesus la’o hodi sa’e ba Jerusalém.

Lia Maksoyn

Leave a Reply

Your email address will not be published. Required fields are marked *