shadow
Diocese de Dili > NOTÍCIAS > LETURA DIÁRIA > Domingo, XXXIV DO TEMPO COMUM

Domingo, XXXIV DO TEMPO COMUM

ANO A

 

Primeira Leitura                                                                            Ez. 34, 11-12. 15-17

Lia housi Livro Profeta Ezequiel

Na’i Maromak hateten nune’e: “Ha’u rasik sei tau matan ba Ha’u nia bibi sira. Ha’u mak sei haré sira. Hanesan bibi-atan tau matan ba nia bibi sira, wainhira nia hela iha bibi sira nebé lakon nia klaran, nune’e mos, Ha’u sei tau matan ba Ha’u nia bibi sira, hodi hasai sira housi fatin nebé sira la’o lakon iha loron nakukun, iha loron ai-abu taka rai metin. Ha’u mak sei tau matan ba Ha’u nia bibi sira, Ha’u mak sei lori ba hammá – Maromak futar lian. Ha’u sei buka bibi sira nebé lakon, sei halibur sira nebé la’o sala dalan. Ha’u sei tau aimoruk ba sira nebé kanek, sei fo kbiit ba sira nebé moras, sei tau matan ba nebé bokur no isin di’ak. Ha’u sei tau matan ho justiça.” Kona fali ba imi, Ha’u nia bibi, Na’i Maromak hateten nune’e: “Ha’u sei halo justiça ba bibi sira, bibi malae no bibi timur.”

Maromak Futar Lia.

 

Salmo Responsorial                                                                                                                                                                Sal. 22 (23), 1-2a. 2-3. 5-6

Refrão :  Maromak, ha’u nia Na’in,

                  Ha’u sei la hetan susar!!! Repete-se

 

Na’i, ha’u nia Maksoyn,

ha’u sei la susar.

Halo ha’u hammá iha fatin kmook. Refrão

 

Lori ha’u ba wé-matan di’ak,

haraik kbiit mai ha’u.

Hala’o ha’u iha dalan lós,

atu hahí Nia naran. Refrão

 

Iha ema aat sira oin,

tau hela mesa nakonu.

Tau mina santo iha ha’u ulun;

tau kusin nakonu to’o resin. Refrão

 

Segunda Leitura                                                                                                                                                                               1Cor. 15, 20-26a. 28

Lia housi São Paulo nia surat ba sarani sira iha Corinto

Maun alin sira: Cristo moris hias housi mate, mosu fali housi mate-bian sira leet, nu’udar ai-fuan foun hasai housi toos. Tan mate mai housi ema ida, nune’e, hodi ema ida moris hias mosu mai housi mate-bian sira. Hanesan housi Adão, ema hotu mate, nune’e mos housi Cristo, ema hotu sei hetan moris hias. Maibé, ida-idak iha nia fatin: Uluk knana’in Cristo, nu’udar ai-fuan foun hasai housi toos, tuir mai, sira nebé kona ba Cristo, wainhira Nia mai. Hafoin, buat hotu sai nahas, wainhira Cristo tau nia kbiit Liurai iha Aman Maromak nia liman; wainhira hamonu tiha na’i-ulun, sira, ema boot no funu balu sira nia na’i-ulun. Cristo mak sei ukun, to’o hanehan funu balu sira hotu iha Nia ain okos.

Funu balu nebé sei halakon ikus liu, ne’e mak mate. Wainhira buat hotu iha ona Cristo nia ukun, Nia rasik nu’udar Oan Mane, sei hela iha Aman nia ukun; Aman nebé halo Nia, ukun sasán tomak. Nune’e, Maromak mosu tomak iha ema hotu-hotu.

Maromak Futar Lia.

 

Aclamação                                                                                                                                                                                                          Mc. 11, 10

Refrão : Di’ak tebes ida be mai hodi

                 Na’i Nia naran!!! Repete-se

 

Ou  :       Aleluia, Aleluia!!! Repete-se

                 Reino di’ak nebé atu mai,

                 Ita Aman David nia Reino. Refrão

 

Evangelho                                                                                                                                                                                                        Mt. 25, 31-46

Na’i Jesus Cristo nia Evangelho nu’udar  São Mateus haktuir

Iha tempo nebá, Jesus dehan ba nia Esolante sira: “Wainhira Oan Mane mai ho nia kbiit, hamutuk ho Anjo sira hotu, iha loron ne’e, Nia sei hein-An iha Nia fatin ho glória. Reino hotu sei halibur iha Nia oin, Nia sei haketak ema sira, hanesan bibi-atan haketak bibi-malae housi bibi-timur. Nia sei tau bibi-malae iha sorin kwanan, tau bibi-timur sira iha karuk. Liurai sei dehan ba sira nebé iha sorin kwanan: ‘Mai, Ha’u nia Aman nia doben sira, mai simu, nu’udar liman rohan, Reino nebé hadi’a kedas ba imi, molok mundo foin halo. Tan Ha’u hamlaha, imi fo han Ha’u, Ha’u hamrook, imi fo wé mai Ha’u, Ha’u mai housi dook, imi simu Ha’u, Ha’u la iha hena, imi fo hatáis Ha’u, Ha’u moras, imi ba haré Ha’u, Ha’u iha cadeia, imi ba haré Ha’u.’ Ho ida ne’e, ema di’ak sira sei hatán ba Nia: ‘Na’i, wainhira ami haré Ita hamlaha, ami fo han, eh hamrook, ami fo wé? Wainhira ami haré Ita mai housi dook, ami simu, eh Ita la ho hena, ami fo hatáis? Wainhira ami haré Ita moras eh iha cadeia, ami ba haré Ita?’ Liurai sei simu netik: ‘Ha’u dehan tebes ba imi: wainhira imi halo ba Ha’u nia alin ruma, maski nia kiik liu, imi halo mai Ha’u.’ Nia sei dehan mos ba sira nebé iha sorin karuk: ‘Dook tiha housi Ha’u, ema aat sira, ba hela iha áhi nebé la nahas; áhi nebé hadi’a hela ba demónio no nia anjo sira. Tan Ha’u hamlaha, imi la fo han, Ha’u hamrook, imi la fo wé, Ha’u mai housi dook, imi la simu Ha’u. Ha’u la iha hena, imi la fo hatáis Ha’u, Ha’u moras, Ha’u iha cadeia, imi la ba haré Ha’u. Ho ne’e, sira mos sei hatán: ‘Na’i, wainhira ami haré Ita hamlaha eh hamrook, mai housi dook eh la iha hena, moras eh iha cadeia, maibé, ami la tau matan ba Ita?’ Nia sei hatán ba sira: ‘Ha’u dehan tebes ba imi: wainhira imi la halo ba Ha’u nia alin ruma, maski nia kiik liu, imi mos la halo mai Ha’u.’ Sira ne’e sei ba terus to’o la nahas; sira nebé di’ak sei ba moris nafatin.”

Lia Maksoyn

Leave a Reply

Your email address will not be published. Required fields are marked *