shadow
Diocese de Dili > NOTÍCIAS > REFLEXÃO > REFLEXÃO & LEITURA DOMINGO XXXIV TEMPO COMUM /Ano A/2017

REFLEXÃO & LEITURA DOMINGO XXXIV TEMPO COMUM /Ano A/2017

CRISTO LIURAI

 

Primeira Leitura                                                                    Ez. 34, 11-12. 15-17

Lia housi Livro Profeta Ezequiel

Na’i Maromak hateten nune’e: “Ha’u rasik sei tau matan ba Ha’u nia bibi sira. Ha’u mak sei haré sira. Hanesan bibi-atan tau matan ba nia bibi sira, wainhira nia hela iha bibi sira nebé lakon nia klaran, nune’e mos, Ha’u sei tau matan ba Ha’u nia bibi sira, hodi hasai sira housi fatin nebé sira la’o lakon iha loron nakukun, iha loron ai-abu taka rai metin. Ha’u mak sei tau matan ba Ha’u nia bibi sira, Ha’u mak sei lori ba hammá – Maromak futar lian. Ha’u sei buka bibi sira nebé lakon, sei halibur sira nebé la’o sala dalan. Ha’u sei tau aimoruk ba sira nebé kanek, sei fo kbiit ba sira nebé moras, sei tau matan ba nebé bokur no isin di’ak. Ha’u sei tau matan ho justiça.” Kona fali ba imi, Ha’u nia bibi, Na’i Maromak hateten nune’e: “Ha’u sei halo justiça ba bibi sira, bibi malae no bibi timur.”

Maromak Futar Lia.

 

Salmo Responsorial                                                                                                                                                                   Sal. 22 (23), 1-2a. 2-3. 5-6

Refrão :       Maromak, ha’u nia Na’in,

                       ha’u sei la hetan susar!!! Repete-se

 

Na’i, ha’u nia Maksoyn,

ha’u sei la susar.

Halo ha’u hammá iha fatin kmook. Refrão

 

Lori ha’u ba wé-matan di’ak,

haraik kbiit mai ha’u.

Hala’o ha’u iha dalan lós,

atu hahí Nia naran. Refrão

 

Iha ema aat sira oin,

tau hela mesa nakonu.

Tau mina santo iha ha’u ulun;

tau kusin nakonu to’o resin. Refrão

 

Segunda Leitura                                                                                                                                                                                1Cor. 15, 20-26a. 28

Lia housi São Paulo nia surat ba sarani sira iha Corinto

Maun alin sira: Cristo moris hias housi mate, mosu fali housi mate-bian sira leet, nu’udar ai-fuan foun hasai housi toos. Tan mate mai housi ema ida, nune’e, hodi ema ida moris hias mosu mai housi mate-bian sira. Hanesan housi Adão, ema hotu mate, nune’e mos housi Cristo, ema hotu sei hetan moris hias. Maibé, ida-idak iha nia fatin: Uluk knana’in Cristo, nu’udar ai-fuan foun hasai housi toos, tuir mai, sira nebé kona ba Cristo, wainhira Nia mai. Hafoin, buat hotu sai nahas, wainhira Cristo tau nia kbiit Liurai iha Aman Maromak nia liman; wainhira hamonu tiha na’i-ulun, sira, ema boot no funu balu sira nia na’i-ulun. Cristo mak sei ukun, to’o hanehan funu balu sira hotu iha Nia ain okos.

Funu balu nebé sei halakon ikus liu, ne’e mak mate. Wainhira buat hotu iha ona Cristo nia ukun, Nia rasik nu’udar Oan Mane, sei hela iha Aman nia ukun; Aman nebé halo Nia, ukun sasán tomak. Nune’e, Maromak mosu tomak iha ema hotu-hotu.

Maromak Futar Lia.

 

Aclamação                                                                                                                                                                                                           Mc. 11, 10

Refrão : Di’ak tebes ida be mai hodi

                  Na’i Nia naran!!! Repete-se

 

Ou        Aleluia, Aleluia!!! Repete-se

              Reino di’ak nebé atu mai,

              Ita Aman David nia Reino. Refrão

 

Evangelho                                                                                                                                                                                                            Mt. 25, 31-46

Na’i Jesus Cristo nia Evangelho nu’udar São Mateus haktuir

Iha tempo nebá, Jesus dehan ba nia Esolante sira: “Wainhira Oan Mane mai ho nia kbiit, hamutuk ho Anjo sira hotu, iha loron ne’e, Nia sei hein-An iha Nia fatin ho glória. Reino hotu sei halibur iha Nia oin, Nia sei haketak ema sira, hanesan bibi-atan haketak bibi-malae housi bibi-timur. Nia sei tau bibi-malae iha sorin kwanan, tau bibi-timur sira iha karuk. Liurai sei dehan ba sira nebé iha sorin kwanan: ‘Mai, Ha’u nia Aman nia doben sira, mai simu, nu’udar liman rohan, Reino nebé hadi’a kedas ba imi, molok mundo foin halo. Tan Ha’u hamlaha, imi fo han Ha’u, Ha’u hamrook, imi fo wé mai Ha’u, Ha’u mai housi dook, imi simu Ha’u, Ha’u la iha hena, imi fo hatáis Ha’u, Ha’u moras, imi ba haré Ha’u, Ha’u iha cadeia, imi ba haré Ha’u.’ Ho ida ne’e, ema di’ak sira sei hatán ba Nia: ‘Na’i, wainhira ami haré Ita hamlaha, ami fo han, eh hamrook, ami fo wé? Wainhira ami haré Ita mai housi dook, ami simu, eh Ita la ho hena, ami fo hatáis? Wainhira ami haré Ita moras eh iha cadeia, ami ba haré Ita?’ Liurai sei simu netik: ‘Ha’u dehan tebes ba imi: wainhira imi halo ba Ha’u nia alin ruma, maski nia kiik liu, imi halo mai Ha’u.’ Nia sei dehan mos ba sira nebé iha sorin karuk: ‘Dook tiha housi Ha’u, ema aat sira, ba hela iha áhi nebé la nahas; áhi nebé hadi’a hela ba demónio no nia anjo sira. Tan Ha’u hamlaha, imi la fo han, Ha’u hamrook, imi la fo wé, Ha’u mai housi dook, imi la simu Ha’u. Ha’u la iha hena, imi la fo hatáis Ha’u, Ha’u moras, Ha’u iha cadeia, imi la ba haré Ha’u. Ho ne’e, sira mos sei hatán: ‘Na’i, wainhira ami haré Ita hamlaha eh hamrook, mai housi dook eh la iha hena, moras eh iha cadeia, maibé, ami la tau matan ba Ita?’ Nia sei hatán ba sira: ‘Ha’u dehan tebes ba imi: wainhira imi la halo ba Ha’u nia alin ruma, maski nia kiik liu, imi mos la halo mai Ha’u.’ Sira ne’e sei ba terus to’o la nahas; sira nebé di’ak sei ba moris nafatin.”

Lia Maksoyn

 

Hanoin kona ba ó rasik nia fiar

Evanjéliu ohin nian ko’alia kona ba Jezus mak Liurai hot-hotu nia Liurai, nebé sei fila fali mai hodi julga ema tomak iha nasaun hotu.  Maromak nia reinu ida nebé iha amizade no domin.  Sei julga ita housi oinsá ita hatudu domin no laran luak ba ema seluk no tempu sira nebé ita fila kotuk ba ema sira nebé presiza.  Jezus hateten katak: ‘Wainhira imi halo buat ne’e ba Ha’u nia alin ki’ik sira ne’e ida, imi halo mai Ha’u rasik’ Jezus dehan momoos saida mak Nia hakarak hateten ho ne’e.  Wainhira ita tulun ema ruma ka hatudu domin ka laran di’ak ba ema ruma, ita tulun no hatudu domin ba Nia. Wainhira ita haterus ema ruma, la laran luak ka fila kotuk ba ema, ita haterus no fila kotuk ba Nia. Ita haree hahalok sira ne’e iha ita nia moris loro-loron, ne’e duni, ita iha oportunidade ba haree Jezus iha ema ida-ida nebé ita hasouru loro-loron.       Oinsá mak ita sei haree Nia?  Ita fó ita nia tempu no domin ba Nia ka ita la’o liu housi Nia sorin no la hatene nia mak Jezus?  Ita simu Jezus ka fila kotuk ba Nia?  

 

MENSAJEN

Aikanoik juízu finál nian hahú ho introdusaun ida (vers. 31-33) ne’ebé aprezenta kuadru “Oan Mane” tuur iha ninia tronu, haketak ema sira “hanesan bibi-atan haketak bibi-malae husi bibi-timur”. Hafoin, mai diálogu rua. Ida, entre “liurai” no “bibi-malae sira” ne’ebé horik iha nia sorin loos (vers. 34-40); ida seluk, entre “liurai ho bibi-timur sira” iha ninia sorin karuk (vers. 41-46). Iha diálogu dahuluk, “liurai” simu “bibi-malae” sira no konvida atu simu liman-rohan “Reinu” nian; iha diálogu daruak, “liurai” hadook “bibi-timur” sira atu la tama iha “Reinu”. Tanba sá? Kritériu ida-ne’ebé mak “liurai” uza atu simu balun no hewai sira seluk? Buat ne’ebé desizivu, tuir Mateus nia perspetiva, mak atitude domin eh indiferensa nian ba Jezús nia maun no biin-alin sira ki’ik liu, moris iha situasaun aat liu nesesidade nian – hamlaha, hamrook, la’o rai, la iha hatais, moras, iha dadur laran… Jezús identifika An ho ki’ik-oan sira, kiak sira, fraku sira, marjinalizadu sira; hatudu domin no solidariedade ba ema kiak katak halo ba Jezús rasik no hatudu egoízmu no indiferensa ba ema kiak hanesan halo ba Jezús rasik. Liafuan “maun no biin-alin” iha signifikadu rua. Iha sentidu jenériku, liafuan “maun no biinalin” atu dehan ema naran de’it; iha ne’e, Jezús nia ezortasaun konvida ema sira ne’ebé hakarak tama iha Reinu atu bá hasoru ema naran de’it ne’ebé hamlaha, hamrook, la’o rai, isin tanan, moras eh iha dadur laran, atu hatudu domin no solidariedade. Iha sentidu kloot liután, liafuan “maun no biin-alin” refere ba membru sira komunidade sarani nian… Maski nune’e, grupu rua ne’e la haketak malu; no posivel katak Mateus refere ba realidade rua hotu. Ezortasaun ne’ebé Mateus lansa ba ninia komunidade sarani (no ba komunidade tempu no fatin hotu nian) kona-ba sai matan moris no neon-na’in (tema boot “diskursu eskatolójiku nian” iha kap. 24-25) hetan naroman ho juízu finál ne’e. Kritériu ne’ebé deside ba entrada iha Reinu mak moris iha domin no solidariedade ba ema kiak sira, ema ki’ik sira, ema ne’ebé la hetan protesaun, ema marjinalizadu sira. Ezortasaun ne’e dirije ba komunidade ida ne’ebé la tau atensaun ba domin ba maluk sira ne’e. Ema sira ne’ebé moris atitude sira-ne’e labele halo parte ba Reinu. Mateus nia objetivu atu aprezenta sena juízu ida-ne’e mak halo katekeze ida kona-na kritériu sira atu tama iha Reinu. Mateus hatudu Kristu nia identifikasaun ho ema ne’ebé hamlaha, ema abandonadu, ema ki’ik sira, la iha protesaun: sira hotu membru Kristu nian no la hadomi sira signifika la hadomi Kristu. Dehan katak hadomi Kristu no la moris tuir Kristu, iha domin ba ema hotu,  signifika lia-bosok no inkoerénsia. Maromak kondena ema aat sira (“bibi-timor sira”) ba infernu? Lae. Maromak la kondena ema ida. Ema mak kondena eh la kondena an, bainhira nia la aseita eh aseita moris ne’ebé Maromak oferese ba nia. No iha ema ruma ne’ebé, konxiente kona-ba buat ne’e nia importánsia, hewai domin no hili, ho modu definitivu, egoízmu, orgullu, auto-sufisiénsia – katak, hadook an ho modu definitivu husi Maromak no Reinu? Iha ema ruma ne’ebé, komprende opsaun sira ne’e nia sentidu-laek, ulun toos ba nafatin? Entaun, tanba sá mak Mateus halo Maromak ko’alia ba “bibi-timor” sira: “imi hadook   an husi ha’u, ho malisan ba ahi rohan-laek ne’ebé hadia hela ba diabu ho nia anju sira?” Tanba Mateus mak pregadór ne’ebé uza téknika nia tempu nian no gosta uza ilas maka’as ne’ebé kona auditóriu no sadik sira. Mensajen mak ne’e: egoízmu no indiferensa ba maluk la hetan fatin iha Maromak nia Reinu.

Leave a Reply

Your email address will not be published. Required fields are marked *