shadow
Diocese de Dili > NOTÍCIAS > LETURA DIÁRIA > Segunda-Feira, XXXIV Tempo Comum

Segunda-Feira, XXXIV Tempo Comum

ANO A

 

Primeira Leitura                                                                       Dan. 1. 1-6, 8-20

Lia housi Profecia Daniel nian

Iha tinan ba dala tolu iha ukun Joaquim, liurai Judá nian, Nabucodosor, liurai Babilónia, mai Jerusalém hodi tau hale’u soldadu sira iha cidade. Na’i saran iha nia liman, Joaquim, liurai Judá, ho sasan balun templo Maromak nian. Nia haruka lori sasan hirak ne’e, ba rai Sinear, ba templo nia Maromak nian hodi rai hotu iha nebá.

Tuir mai, liurai haruka ba Aspenaz, ulun nalin sira palácio nian, atu hili Israel oan sira balun housi ran liurai eh housi família boot. Sei hili foin sa’e sira nebé isin di’ak, oin kmo’ok, badinan serbisu, matenek no ulun mamar atu bele serbi iha kadunan liurai. Aspenaz sei hanourin sira letra sira no lian Celdeu sira nian. Liurai haruka aihan lor-loron housi nia mesa ba sira no tua nebé nia hemu. Sira sei simu matenek iha tinan tolu nia laran; hafoin bele tama ba liurai nia serbisu. Iha sira leet, iha Judá nia oan mane balu: Daniel, Ananias, Misael no Azarias. Nune’e, Daniel hakotu lia atu hafo’er-an ho liurai nia hahan ho tua nebé nia hemu, hodi husu ba ulun nalin sira nian atu labele obriga nia hafo’er an; no Maromak halo duni Daniel manan ulun nalin sira nian. Nia laran di’ak, maibé, ulun ne’e dehan ba Daniel: “Ha’u ta’uk liurai, ha’u na’i; nia rasik mak haruka aihan no tua ba imi. Nia mai haré karik imi nia isin krekas liu fali foin sa’e sira be otas hanesan imi, imi sei hasusar ha’u iha liurai nia oin.” Maibé, Daniel dehan ba guarda nebé ulun nalin sira nian haruka hei Daniel, Ananias, Misael no Azarias: “Ha’u husu ba ó atu bele koko ó nia atan sira iha loron sanulu nia laran; ó fó han ami ho modo tahan no wé atu hemu. Hafoin, ó sei haré ami nia oin tanesan ho oin foin sa’e sira seluk nebé fó han ho aihan liurai nian. Nune’e, Ó sei halo buat hotu ba ó atan sira tuir buat nebé ó haré”. Guarda ne’e halo tuir duni hanesan nebé sira fó hanoin ba nia; hahu koko iha loron sanulu nia laran. Liu tiha loron sanulu, haré katak sira ne’e nia isin di’ak liu fali foin sa’e sira nebé han hemu liurai nia hahan. Hahu housi loron neba, guarda hasai tiha sira housi sira ai-han nebé liurai haruka ba sira no tua nebé sira atu hemu hodi fó nafatin modo tahan no wé atu hemu. Maromak iha buat hotu nebé kona ba hakerek no hanoin lós, no Daniel iha mós matenek ida atu si’ik lolós nia mehi.

To’o tiha tempo nebé liurai hakotu hela atu lori foin sa’e sira ba hatudu, ulun nalin sira nian lori sira ba Nabucodonosor nia oin. Liurai ko’alia ho sira hotu, laiha ema ida iha sira leet, nebé bele tanesan ho Daniel, Ananias, Misael no Azaras, Tan ne’e duni, sira na’in háat hela hodi halo serbisu liurai nian. Iha buat hotu nebé kona ba hatene no matenek, iha nebé liurai husu conselho, nia haré ba katak sira na’in háat nia matenek liu sira seluk nian dala sanulu nebé hôrik iha nia nação nia laran.

Maromak Futar Lia

 

Salmo Responsorial                                                                                                                                             Dan. 3. 52, 53 e 54, 55 e 56 (R.52b)

Refrão : Na’i so’I ba hahi no glória ba nafatin!!! Repete-se

 

Rahun di’ak ba Ita, Na’i, ami aman sira nia Maromak,

Hahí no glória ba Ita ba nafatin.

Rahun di’ak ba Ita naran Santo no Glorioso,

Hahí no glória ba Ita ba nafatin. Refrão

 

Rahun di’ak ba Ita iha templo Ita glória nian,

Hahí no glória ba Ita ba nafatin.

Rahun di’ak ba Ita iha trono Ita reino nian,

Hahí no glória ba Ita ba nafatin. Refrão

 

Rahun di’ak ba Ita bé haré borus kle’an nakukun,

Hahí no glória ba Ita ba nafatin.

Rahun di’ak ba Ita boot iha áas lalehan,

Hahí no glória ba Ita ba nafatin. Refrão

 

Aclamação                                                                                                                                                                                                   Mt. 24. 42a, 44

Refrão : Aleluia, Aleluia!!! Repete-se

Imi matan moris neon na’in ba,

basá iha oras  nebé imi ladun hanoin hetan mak

Mane Maksoyn sei mai. Refrão

 

Evangelho                                                                                                                                                                                                            Lc. 21. 1-4

Na’i Jesus Cristo nia Evangelho nudar São Lucas haktuir

Iha tempo neba, Jesus foti tiha matan, Nia haré ema riku sira tau esmola iha osan fatin templo nian. Nia haré mós feto faluk kiak ida nebé tau nia esmola osan kiik rua. Nia dehan: “Tebes, Ha’u dehan ba imi katak feto faluk kiak ne’e tau osan folin liu sira seluk hotu, basá housi buat nebé resin, sira fó buat karan, maibé ema kiak ne’e saran buat hotu nebé nia iha atu moris.”

Lia Maksoyn

Leave a Reply

Your email address will not be published. Required fields are marked *