shadow
Diocese de Dili > NOTÍCIAS > HOMILIA DO BISPO > FESTA CRISTO LIURAI

FESTA CRISTO LIURAI

DCDD – Dili; (26/11/2017); Ohin ita comunidade sarani liu-liu paróquia sira iha Dili laran ita halibur nudar família ida atu agradeçe ba Maromak nia futar liafuan nebe iha tinan ida nee laos deit moris ho ita maibe ita halo percurso, caminhada ida iha ita nia moris sarani, hodi lori ita fila fali ba descobre beleza no profundidade Maromak nia futar lia-fuan iha ita nia moris. Nudar Maromak nia oan iha ita nia família, iha comunidade no ita nia rai.

Tinan ida nee ita koko tiha ona Maromak nia Futar Lia-Fuan nia midar no ninia fuarak. Ohin ita mai laos atu termina, maibe ita hakarak atu tama klean liu tan hodi hatur Maromak nia Lia-Fuan mak sai nudar abut, we matan, naroman no moris iha ita ida-idak nia família.

Hau nia comvicção mak nee; se ita loke duni ita nia odamatan fuan nian, odamatan família ninian, comunidade no ita nia rai doben nee ba Maromak nia Futar Lia-Fuan, nia sei halibur, nia sei habosu, nia sei hametin, nia haburas ita nia unidade nudar sarani.

Ida nee mak hau hanoin razão fundamental mai ita celebração ohin iha festa boot Cristo Liurai nian nee; Nia Liurai duni sai modelo ba liurai hotu nebe haturan iha rai no mundo tomak.

Ohin ita celebra Festa Cristo Liurai, festa ida nee laos festa bai-bain. Ita tinan-tinan nafatin celebra festa nee, mas que leitura hanesan, maibe iha circunstância ida nee saida mak ita bele foti husi leitura sira ohin ninian, saida mak festa ohin ninian hakarak hakiak no halo ninian abut tama klean liu tan iha ita nia fuan nudar sarani nebe los. Hau cita autor ida naran lukand iha nia lia-fuan dehan; ema ida nee mak ida nebe sasin verdade basá hatudu iha nia koalia. Ida be rona verdade husi ema seluk nia koalia. ida be buka verdade atu bele lao iha dalan moris ninian.

Domingo ikus ano litúrgico nian apresenta escatalógico focus liu iha intervenção Maromak, Nia mak ida nebe tesi lia nain. Iha Primeira Leitura Maromak fo sai mai ita katak, nia mak sei tesi lia ba nia povo laos deit ho ulun sira nação nian, maibe mos ho nia oan sira ida-idak, ho bibi sira ida-idak. Evangelho apresenta Jesus Liurai boot, juiz escatalógico ida nebe sei haketak bibi timur husi bibi malae, Nia sei tesi lia ba ema ida-idak tuir ninia sasukat.

Juizo mak elemento central fiar sarani nian. Anúncio kona ba juizo hakarak halo saida! Hamoris ka haboot responsabilidade fiar sira nian iha mundo, nunee sira buka duni atu enche sira nia moris lor-loron ho buat nebe misericórdia no justiça. Nee obriga duni ita ema atu buka duni saida mak essencial iha ita nia moris. Nee duni rona tiha Evangelho  laos atu hatauk ita, maibe atu fo hanoin nafatin mai ita folin moris ida nee atu lao tuir dalan nebe los. Juizo mak ação ida Maromak nian husi nee instaura Maromak nia justiça nunee mos sai nain ba história ba humanidade tomak. Juizo mak sasukat justiça Maromak nian ba hirak nebe iha história ema hanehan no abuja, laiha ema nebe atu defende, sira nebe lian ema hanehan la rona no sira nebe nia direito ema la atenção. Juizo hatudu mos omissão sala tanba la halo, la halo buat nebe tuir lolos tem que halo.

Los duni maluk doben sira; sala nebe buras los nebe mak fácil liu nebe halo ita monu fila-fila hodi la hanoin hetan mak hirak nebe dala barak ita buka nafatin atu taka hodi justifica, hodi defende, hodi husu desculpa tanba ita hatene hela ida nee sala, maibe dala barak ita defende ita nia-an iha maluk sira nia oin ita hakmatek, maibe hau la hatene ita nia conciência hakmatek kalae! Ida nee mak ita ema nudar sarani tem que halo maibe ita la halo.

Amo Papa Francisco iha semana kotuk iha nia homilia hau cita ninia lia-fuan ida nebe dehan; A omissão também é o grande pecado contra pobres, esta assume o nome preciso indiferência é dizer; não me diz respeito, não é problema meu, é culpa de sociadade, é indignar-se como o mal mas sem fazer nada Deus porém não nos perguntara se sertirmos justos indignação mas fizemos bem.

Lia-fuan nebe ita rona bebeik mak ida nee; (itu buka urusanku), – indiferente. Ida nebe ita hanaran la hadomi ida nee sala boot ida. Maromak julga ita tanba la visita sira nebe moras, sira nebe iha prisão, sira nebe mais necessitado la tau matan no sira nebe ita la hatudu ita nia domin.

Amo Papa continua ho lia-fuan ida tan; Estes irmãos mais pequeninos seus predilctos, são famintos e doentes. O coresteio  e o retuso, o pobre e o abandonado. o doente sem ajuda necessitado descartado nos seus rostos podemos imaginar impresto rosto dele.( katak Jesus nia oin rasik). nos seus lábios mesmo que fechar se pela dor, as a palavra dele é o me conto.

Maromak nia juizo mak hare liu iha buat nebe iha ema nia fuan. Ida nee mak buat nebe dala barak ita lakohi atu hare. Maromak nia hare nee julga mos oinsa ita nia hare ba hirak nebe kiak, hirak nebe precisa.

Maluk doben sira; iha ita nia sociadade ohin loron nian nee, ema se mak iha ninia naran! Ida nebe mak ideal! ida nebe mak sai modelo ba ema hotu! laos ida nebe iha poder? Laos ida nebe riku? Ida nebe halo tuir deit ninia caprisco sira? Ida nebe buka oin nafatin?

Iha sociólogo nain rua iha sira nia estudo sira halo decálogo ida  hanesan ukun-fuan 10 sucesso ninian. Iha sira nia decálogo ida ikus nian nee sira hakerek nunee; Keta haluha katak o nia carreira sira sei termina ho ema nebe o ajuda, laos tanba nia sei fo fila fali maibe tanba o nia laran luak ó halo hodi la hein atu simu buat ida husi nia. Ema hirak nebe iha mundo nia oin sira la folin buat ida, sira mak loke dalan ba lalehan, sira mak ita nia passaporte ba paraiso.

Maluk doben sira; Festa Cristo Liurai nian convida ita hotu atu tau ita nia-an iha Liurai Lalehan no rai nia liman. Nia ohin convida ita. Hau cita fila-fali lia-fuan ohin nebe dehan; Ida nebe sasin lia-los basá nia hatudu iha buat nebe nia koalia, nia rona lia-los husi ema seluk nia koalia, nia buka lia-los atu halos ninia moris. ida nee mak hanoin liurai ida ohin hakarak mos hanorin ita atu sai mos sarani ida nebe hadomi buat nebe liurai lalehan ho rai ohin ita hahi.

Moris hanesan ema matenek sira. Iha judeu ida hakerek hanesan nee; Mundo agora nian hanesan rai maran, mundo nebe sei mai hanesan tasi. Se ema ida la prepara ai-han wainhira sei iha rai maran, saida mak nia sei han wainhira iha tasi! Mundo agora nian hanesan rai nebe ita hakiak ai-hahoris barak nebe matak no buras no mundo futuro mak deserto. Se ema ida mak lakohi hakiak ai-horis saida mak sei han wainhira too iha deserto! Ohin ita mos bele husu ba ita nia-an; ba hau saida mak vale liu iha hau nia moris! Iha nebe mak hau investe hau nia força vontade, hau nia energia tomak. Iha riku soin nebe liu lalais nebe mundo nunca puas ka iha riku soin Maromak ninian nebe bele garante moris rohan laek! Iha opção ida nee, iha hau nia oin moris atu bele iha buat hotu nebe mundo ida nee fo ka manan reino lalehan nian? Oinsa mak ita aprende atu halo diak ba ema seluk, Jesus rasik hatan ba ida nee, wainhira koalia kona ba halo ba ema seluk buat nebe ó hakarak halo ba hau. Ita nia desejo mak atu bele simu domin, simu tulun husi maluk sira, nunee ema nebe halo diak ba hau, nia halo diak nia-an rasik nunee mos ida nebe hatene hadomi ema seluk, nia mos hadomi nia-an rasik.

Hau convida sarani sira atu badinas harohan nafatin atu ita bele aprende haraikan atu rona Maromak nia Futar Liafuan, husik Maromak nia Liafuan hanorin ita, husik Maromak nia Liafuan transforma ita nian-an no husik Maromak nia Liafuan lori ita ba dalan los.

Ho festa boot ida nee, hakasan haraikan hare ba Cristo Liurai sai modelo liurai ukunain iha mundo hotu iha mundo raiklaran. Ita harohan atu ukunain sira mos hatene atu ba nati tuir Cristo Liurai lalehan ho rai nian, iha Nia deit no ho Nia deit mak fiar katak bele lori prosperiadade ba ita hotu liu-liu ba ita nia rai. 

Leave a Reply

Your email address will not be published. Required fields are marked *