shadow
Diocese de Dili > NOTÍCIAS > LETURA DIÁRIA > Sexta-Feira, XXXIV Tempo Comum

Sexta-Feira, XXXIV Tempo Comum

ANO A

 

Primeira Leitura                                                                               Dan. 7. 2-14

Lia housi Profecia Daniel nian

Ha’u Daniel, haré hela iha ha’u nia mehi kalan, wainhira anin lalehan nian huu housi fatin háat, liki tasi boot ba mai; Haousi tasi laran mosu balada boot háat, nebé la hanesan. Ida uluk hanesan leão, ho liras makikit nian. Ha’u haré nafatin, to’o fokit sai hotu nia liras sira housi nia isin. Nia hamriik lós tiha housi rai hanesan ema hodi hakmatek iha fatin no fó ba nia fuan ida ema nian. Tuir mai, mosu tan balada seluk ida ba dala rua, hanesan urso, hamriik ho nia sorin de’it, ho knosen ruin tolu iha nia ibun, iha nehan sira leet. Lia ida tun ba nia dehan: “Hamriik ba hodi han naan barak”. Tuir fali, ha’u hahu haré tan, wainhira mosu balada seluk hanesan leopard, nebé iha liras háat manu nian iha kotuk. Balada ne’e iha ulun fatuk háat. Nia simu biit liurai nian. Iha kalan ne’e duni, iha mehi, ha’u haré tan balada seluk ida, nebé mosu ba dala háat, oin kroat, isin forte, ema ta’uk haré. Nia iha nehan mesak boot besi nian. Nia han, hafoin, ho ain, nia harahun no sama hanehan buat hotu nebé resin. Nia la hanesan balada sira seluk nebé mosu uluk liu, nia iha dikur sanulu. Wainhira ha’u fihir dikur hirak ne’e, iha sira leet mosu tan dikur ki’ik ida, no dikur tolu be uluk fokit sai tiha hodi fó fatin ba dikur foun. Iha dikur ne’e, iha matan hanesan ema nian, no ibun ida nebé ko’alia loko-an nian. Ha’u haré hela nafatin.

Trono balun hatur-an no Katuas lulik ida hatodan An tiha. Nia hatais mutin teb-tebes, hanesan kalohan mutin, Nia fúuk mós hanesan bibi malae nia fulun lolós. Ninia trono halo ho ahi lakan, ho roda ahi klaak moris. Mota ahi nian ida halai suli housi Nia futar oin. Rihun ba rihun serbi Nia, no tokon atus hamriik iha Nia futar oin. Tribunal hahu loke, no loke mós livro sira.

Nune’e, ha’u haré, ha’u sei rona liafuan sira loko-an nian, nebé sai housi dikur ne’e. Wainhira ha’u hateke hela, oho tiha balada ne’e, halo nia isin sai rahun hodi soe tama iha ahi be lakan maka’as. Housi balada sira seluk, hasai hotu sira biit, maibé, sira nia moris tahan to’o tempo ruma no loron ruma.

Ha’u hateke hela ba buat nebé mosu iha kalan, wainhira, iha kalohan lalehan nia laran, mai ida hanesan Oan Mane.  Nia la’o dadaun ba Katuas lulik, sira lori Nia ba Katuas ne’e nia oin, Nia simu biit liurai nian atu ukun povo tomak no nação hot-hotu. Ema tomak housi lian hot-hotu serbi Nia. Ninia biit ukun to’o rohan laek, Nia ukun sei la lakon; Ninia reino ema ida sei la sobu.

Maromak Futar Lia

 

Salmo Responsorial                                                                                                                                        Dan. 3. 75, 76, 77, 78, 79, 80, 81 (R.59b)

Refrão : Hahi no hawelok Na’i ba nafatin!!! Repete-se

 

Foho no foho kiik sira, hawelok Na’i ba,

Hahi no hawelok Na’i ba nafatin. Refrão

 

Buat hotu nebé tubun housi rai, hawelok Na’i ba,

Hahi no hawelok Na’i ba nafatin. Refrão

 

Tasi no mota boot sira, hawelok Na’i ba,

Hahi no hawelok Na’i ba nafatin. Refrão

 

We matan sira, hawelok Na’i ba,

Hahi no hawelok Na’i ba nafatin. Refrão

 

We kutun sira iha tasi, hawelok Na’i ba,

Hahi no hawelok Na’i ba nafatin. Refrão

 

Manu sira iha lalehan, hawelok Na’i ba,

Hahi no hawelok Na’i ba nafatin. Refrão

 

Balada sira fuik no maus, hawelok Na’i ba,

Hahi no hawelok Na’i ba nafatin. Refrão

 

Aclamação                                                                                                                                                                                                                Lc. 21. 28

Refrão : Aleluia, Aleluia!!! Repete-se

                 Hamriik ba hodi foti imi ulun basá,

                 Imi nia libertação besik ona. Refrão

 

Evangelho                                                                                                                                                                                                            Lc. 21. 29-33

Na’i Jesus Cristo nia Evangelho nudar São Lucas haktuir

Iha tempo neba, Jesus haktuir aiknanoik ida ne’e ba escolante sira: “Imi haré didi’ak ai figueira no ai sira seluk hotu. Wainhira sira hahu hatubun tahan nurak, imi hatene katak bailoron besik ona. Nune’e mós imi, wainhira imi haré buat hirak ne’e mosu, imi sei hatene katak Maromak nia reino besik ona. Tebes Ha’u dehan ba imi: otas ne’e sei la liu to’o buat ne’e hotu mosu. Lalehan no rai sei liu, maibé Ha’u nia liafuan sira sei la liu”.

Lia Maksoyn

Leave a Reply

Your email address will not be published. Required fields are marked *