shadow
Diocese de Dili > NOTÍCIAS > LETURA DIÁRIA > Sábado, XXXIV Tempo Comum

Sábado, XXXIV Tempo Comum

ANO A

 

Primeira Leitura                                                                         Dan. 7. 15-27

Lia housi Profecia Daniel nian

Ha’u, Daniel, laran susar, tan buat nebé mosu liu ba no tan mehi nebé liu housi ha’u nia hanoin, halo ha’u laran ta’uk tebes. Ha’u hakbesik-an ba sira ne’e ida nebé iha neba, hodi husu tuir lolós kona ba buat hirak neba. Nia hateten lolós mai ha’u hodi dehan: “Balada boot háat neba, katak liurai na’in háat nebé sei hamriik housi rai. Sira nebé sei ba simu reino mak Santo sira Leten áas liu Nian; sira sei ukun reino ne’e ba nafatin”.

Hafoin, ha’u hakarak mós hatene lolós kona ba balada nebé mosu ba dala háat, la hanesan balada sira seluk, halo ta’uk liu ema, ho nehan besi no ain liman kukun riti, nebé han no harahun buat hotu no resto nia sama hanehan ba rai. Ha’u hakarak mós hatene lolós kona ba dikur sanulu housi nia ulun, no kona ba dikur ida seluk nebé moris, no iha dikur neba nia oin, dikur tolu monu; dikur ne’e iha matan no ibun nebé ko’alia foti-an, hanesan boot liu fali sira seluk. Ha’u haré dikur ne’e funu hasouru santo sira, nia manan sira, to’o katuas mai. To’o tiha mai, Nia halo justiça ba santo sira Leten áas liu nian, no to’o ona oras atu sira simu reino.

Ema nebé dehan lós, hatan mai ha’u nune’e: “Balada ba dala háat nebé mosu, ne’e katak reino ba dala háat nebé sei mosu iha rai; nia la hanesan sira seluk, nia sei mai tolan, sama hanehan ho ain, no harahun rai tomak. Dikur sanulu hatudu liurai sanulu nebé sei mosu housi reino ne’e. Dikur ida seluk sei mosu ikus, nia la hanesan sira seluk, nia sei hamonu liurai na’in tolu. Nia ko’alia liafuan hasouru Ida be Leten áas liu, hodi halo áat ba Nia santo sira. Nia buka atu muda festa sira nia loron no Lei; sei saran santo sira ba nia liman, iha tempo ida nia laran, iha tempo rua nia laran eh iha tempo baluk ida nia laran. Tuir mai, tribunal Na’i niansei hahu tesi lia, sira sei hasai ukun housi liurai ne’e, atu halakon no harahun nia ba nafatin. Nação hotu, ukun na’in sira hotu, no reino hotu, nebé hela iha lalehan okos, sei saran hotu ba povo santo sira Leten áas liu Nian. Ninia reino sei ida rohan laek, biit na’in sira hotu sei serbi Nia, hodi halo tuir Ninia hakaran”.

Maromak Futar Lia

 

Salmo Responsorial                                                                                                                                          Dan. 3. 82, 83, 84, 85, 86, 87 (R.59b)

Refrão : Hahi no hawelok Na’i ba nafatin!!! Repete-se

 

Emar hotu, hawelok Na’i ba,

Hahi no hawelok Na’i ba nafatin. Refrão

 

Israel, hawelok Na’i ba,

Hahi no hawelok Na’i ba nafatin. Refrão

 

Na’ilulik sira Na’i Nian, hawelok Na’i ba,

Hahi no hawelok Na’i ba nafatin. Refrão

 

Na’i nia atan sira, hawelok Na’i ba,

Hahi no hawelok Na’i ba nafatin. Refrão

 

Espírito no klamar justo sira, hawelok Na’i ba,

Hahi no hawelok Na’i ba nafatin. Refrão

 

Santo sira no ema sira be fuan haraik-an, hawelok Na’i ba,

Hahi no hawelok Na’i ba nafatin. Refrão

 

Aclamação                                                                                                                                                                                                                Lc. 21. 36

Refrão : Aleluia, Aleluia!!! Repete-se

                  Imi matan moris hodi hamulak nafatin atu imi bele

                  Hamriik ho laran metin iha Mane Maksoyn Nia futar oin. Refrão

 

Evangelho                                                                                                                                                                                                            Lc. 21. 34-36

Na’i Jesus Cristo nia Evangelho nudar São Lucas haktuir

Iha tempo neba, Jesus lia tun ba escolante sira hodi dehan: “Imi matan moris neon na’in ba, keta laran todan tan hahalok áat sira, tan lanu, tan fó neon resin ba moris ne’e atu loron ne’e keta to’o teki-tekir de’it  hanesan hani; basá nia sei monu hanesan hani ida ba ema hotu nebé tur iha raiklaran tomak. Ne’e duni, matan moris hodi hamulak nafatin ba, atu imi bele hetan biit hodi hadook-an housi buat hotu nebé sei mosu no bele hamriik metin iha Oan Mane nia oin”.

Lia Maksoyn

Leave a Reply

Your email address will not be published. Required fields are marked *