shadow
Diocese de Dili > NOTÍCIAS > LETURA DIÁRIA > Segunda-Feira, I Semana do Tempo Advento

Segunda-Feira, I Semana do Tempo Advento

ANO B

 

Primeira Leitura                                                                                    Is. 2. 1-5

Lia housi livro Isaías nian

Isaías, Amós nia oan, haré buat hirak ne’e tomak kona ba Judá no Jerusalém. Loron ida sei to’o; iha loron ne’e foho nebé Na’i nia Uma Lulik hela ba, sei foti-an áas liu foho sira, iha foho oan sira leten. Nação sira tomak sei halai hotu ba neba, povo wa’in be wa’in sei la’o hotu ba neba. Sira sei hateten: “Imi mai, ita sa’e ba Na’i nia foho, ba Jacob nia Maromak Nia uma lulik. Nia sei hanourin ita, Nia hanourin dalan mai ita, atu la’o tuir Nia dalan terik. Ukun sei mai housi Sião, Na’i futar lia sei mai housi Jerusalém”. Nia nu’udar Juíz ida iha nação sira leet, sei tesi lia hodi fó ordem ba povo wa’in. Hodi surik, sira sei tuku besi fila rai; hodi diman, sira sei halo tudik ko’a haré. Nação ida sei la kaer tan kro’at hasouru nação seluk; ema sei la buka halo tan funu. “Mai, uma kain Jacob nian, ita la’o iha Na’i Nia roman”.

Maromak Futar Lia.

 

Salmo Responsorial                                                                                                                         Sal. 121(122). 1-2, 3-4ª, 4b-5, 6-7, 8-9 (R. Cf. I)

Refrão : Ami sei ba Na’i Nia uma ho ksolok!!! Repete-se

Ha’u haksolok tebes wainhira ema dehan:

“Ita sa’e ba na’i Nia uma lulik”.

Ami ain sama ona ó rain;

Ami hamriik iha Ó Nia odamatan, Jerusalém. Refrão

 

Jerusalém, harí meti-metin,

Cidade kmook, kmook wa’in basu.

Povo sira sa’e ba neba,

Povo tomak Israel nian. Refrão

 

Tuir lisan Israel nian,

Atu haliban Na’i Nia naran;

Iha neba mak iha tribunal justiça nian,

Tribunal uma David nian. Refrão

 

Sei husu dame ba Jerusalém!

Moris hakmatek ba sira be hadomi ó.

Dame mak ukun iha ó nia fatuk-hada,

Ó kadunan laran hakmatek haksolok! Refrão

 

Tan hadomi ha’u maun no alin sira,

Ha’u se dehan: “Dame hela ho ó!”

Tan hadomi ita Na’i Maromak Nia Uma,

Ha’u sei husu kmenk tomak ba ó. Refrão

 

Aclamação                                                                                                                                                                                                                     Sal. 79. 4

Refrão : Aleluia, Aleluia!!! Repete-se       

Na’i, ami Maromak, hi’it-An mai soi ami;

hatudu Ita oin mai ami, amo hetan salvação. Refrão

 

Evangelho                                                                                                                                                                                                                   Mt. 8. 5-11

Na’i Jesus Cristo nia Evangelho nudar São Mateus haktuir

Iha tempo neba, Jesus tama iha Cafarnaúm, comandante centurião ida hakbesik ba Nia hodi harohan nune’e: “Na’i, ha’u nia atan moras iha uma, ain no liman tós, terus teb-tebes”. Jesus lia tun ba nia: “Ha’u sei ba halo nia di’ak fali”. Maibe centurião hatan ba Nia: “Na’i, ha’u la soi’i Itaboot hi’it-An ma’i ha’u uma laran; Ita nia liafuan ida de’it to’o ona atu ha’u nia atan hetan fali isin di’ak. Tan ha’u mós iha ema atu haruka; iha soldado halo tuir ha’u nia ordem. Ha’u dehan ba ida ‘ó ba’, nia ba; ba ida seluk ‘ó mai’, nia mai; no mós ba ha’u nia atan: ‘halo buat ne’e, nia halo”. Rona tiha nia, Jesus hakfodak hodi hateten ba sira nebé la’o hamutuk ho Nia: “Tebes duni, Ha’u dehan ba imi, Ha’u seida’uk hetan iha Israel nia ema sira, fiar ida boot hanesan ne’e. Ne’e duni, Ha’u dehan ba imi, housi loro-sa’e to’o loro-monu, ema barak sei mai tur iha mesa hamutuk ho Abraão, Isaac no jacob iha reino Lalehan”.

Lia Maksoyn

Leave a Reply

Your email address will not be published. Required fields are marked *