shadow
Diocese de Dili > NOTÍCIAS > LETURA DIÁRIA > Terça-Feira, I Semana do Tempo Advento

Terça-Feira, I Semana do Tempo Advento

ANO B

 

Primeira Leitura                                                                                 Is. 11. 1-10

Lia housi livro Isaías nian

Iha loron hirak neba, housi Jessé nia lolon, sanak ida sei mosu; housi nia abut sira, tubun ida sei moris, na’i nia Espírito sei hamahan Nia; Espírito matenek no neon naroman; Espírito lia hanourin di’ak no biit-na’in; Espírito hatene no hamta’uk Maromak. Badinas nune’e tan hamta’uk Maromak, Nia sei tesi lia la tuir buat nia haré de’it housi liur, eh tuir lia nia rona ema hateten. Nia sei tesi lia ho justiça ba ema sira neon susar, Nia sei tesi lia ho lialós ba povo kiik sira. Nia liafuan hanesan we hodi ba ema laran áat; anin sai housi nia ibun sei halakon ema fiar laek.

Nia taka-an ho justiça, Nia kesi knotak ho laran mós; asu fuik sei moris hamutuk ho bibi-mala’e oan; pantera sei toba hamutuk ho bibi-timur oan; karau oan ho leão la’o hamutuk; labarik id abele dada sira; karau baka no ursa sei han du’ut hamutuk; sira nia oan sei toba hamutuk. Labarik sei halimar iha samea nia knu’uk; kosok oan sei sokar nia liman iha samodok nia kuak. Ema sei la halo tan áat; sei la sobu tan iha Ha’u nia foho santo tomak nia laran: Na’i matenek sei nakonu iha rai tomak hanesan we be nakonu iha tasi laran.

Iha lorn neba, Jessé nia abut sei mosu hanesan bandeira povo sira nian. Nação sira sei mai buka nia, nia uma sei hetan glória.

Maromak Futar Lia.

 

Salmo Responsorial                                                                                                                                            Sal. 71(72). 2, 7-8, 12-13, 17 (R. Cf. 7)

Refrão : Iha Na’i nia loron sei moris ba nafatin justiça no dame. Repete-se

 

Maromak, haraik ba liurai biit atu tesi lia,

Haraik Ita justiça ba liurai oan.

Nia sei ukun Ita nia povo ho justiça,

Nia ukun Ita nia ema kiak sira tuir lialós. Refrão

 

Justiça sei fó funan iha Nia loron,

Dame boot to’o tempo ikus nian.

Nia sei ukun housi tasi-feto to’o tasi-mane,

Housi mota boot to’o rai-ikun rai-ulun. Refrão

 

Liurai sira Tarsis nian sei selu rai-ten ba Nia,

Sabá no Arábia nia liurai sira

Sei mai ho sira nia buat karan.

Sei hakru’uk iha Nia futar oin liurai sira tomak,

Povo sira tomak sei sebi Nia. Refrão

 

Nia sei rona ema kiak sira lian,

Sei soi ema neon susar be la iha ema tulun sira,

Sei sadi’a ema biit laek no mea kiik sira,

Sei soi ema kiak sira nia moris. Refrão

 

Rahun di’ak ba Nia futar naran ba nafatin,

Ema hanoin Nia nafatin hanesan loron nia roman.

Iha Nia, povo tomak hetan bensa.

Nação sira hotu sei hateten di’ak Nia. Refrão

 

Aclamação

Refrão : Aleluia, Aleluia!!! Repete-se       

                   Na’i sei mai ho biit liurai.

                   Nia sei haraik roman ba Nia emar sira matan. Refrão

 

Evangelho                                                                                                                                                                                                            Lc. 10. 21-24

Na’i Jesus Cristo nia Evangelho nudar São Lucas haktuir

Iha tempo neba, Jesus haksolok wa’in tebes tanba Espírito Santo nia hahalok hodi dehan: “Ha’u agradece ba Ita, Aman, Lalehan no Rai nia Na’i, tanba Ita subar lialós hirak ne’e ba ema matenek no neon na’in sira hodi haklaken ba kiik oan sira.

Lós duni, Aman, tanba buat ne’e haksolok Ita. Buat hotu Ha’u simu housi Ha’u Aman. Ema ida la hatene Oan, Aman de’it mak hatene; ema ida la hatene Aman ne’e Sé, Oan de’it hatene no mós ida nebé Oan hakarak haklaken ba nia”.

Jesus fila oin ba escolante sira mesak hodi dehan tan: “Rahun di’ak ba matan sira be hare buat be imi haré dadaun, tanba Ha’u dehan ba imi: profeta no liurai sira barak hakarak rona buat nebé imi rona, maibé la rona; hakarak haré buat be imi haré, maibé la haré”.

Lia Maksoyn

Leave a Reply

Your email address will not be published. Required fields are marked *