shadow
Diocese de Dili > NOTÍCIAS > Notícias > BÍBLIA; FAMÍLIA NIA ABUT, WE MATAN, NAROMAN NO MORIS

BÍBLIA; FAMÍLIA NIA ABUT, WE MATAN, NAROMAN NO MORIS

DCDD-(26/11/2017) Comunidade sarani liu-liu paróquia sira iha Dili laran liburan nudar família ida iha festa Cristo Liurai nian nebe monu iha loron 26 fulan novembro tinan nee, hamutuk ho bispo diocese dili nian no nailulik sira hotu, religioso/religiosa, seminaristas proceição hahu husi paróquia Balide no mai too iha SE Catedral Dili. Iha proceição nee, sarani tomak lao iha ambiente oração, hananu tuir dalan too iha Catedral Dili hodi taka tinan Bíblia 2017 nian ho missa agradecimento be preside husi bispo de Dili d. Virgilio do Carmo da Silva. Biban nee mos hodi taka tinan Bíblia 2017 nian, comissão pastoral nian prepara hikas fila fali ona tema ba tinan oin 2018 nebe sei hahu iha primeira Domingo do Advento ho tema Bíblia mak família nia abut, we matan, naroman no moris.           

Iha D. Virgilio do Carmo da Silva nia homilia hateten; tinan ida nee ita koko tiha ona Maromak nia futar lia-fuan nia midar no ninia furak. Ohin ita mai laos atu termina, maibe ita hakarak atu tama klean liu tan hodi hatur Maromak nia lia-fuan mak sai nudar abut, we matan, naroman no moris iha ita ida-idak nia família.

Hau nia comvicção mak nee; se ita loke duni ita nia odamatan fuan nian, odamatan família ninian, comunidade no ita nia rai doben nee ba maromak nia futar lai-fuan, nia sei halibur, nia sei habosu, nia sei hametin, nia haburas ita nia unidade nudar sarani

Ida nee mak hau hanoin razão fundamental mai ita celebração ohin iha festa boot Cristo Liurai nian nee; Nia liurai duni, sai modelo ba liurai hotu nebe hatu’uran iha rai no mundo tomak.

Sorin seluk Vigário Episcopal ba Assunto Pastoral Diocese Dili Pe. Jovito do Rêgo de Jesus Araujo hateten; Ita taka tinan Bíblia ninian ho proceição husi Paróquia Balide mai too iha Catedral. Ita rona música ida nebe Cantóres sira canta: Moris husi Bíblia, moris iha Bíblia, moris ho Bíblia no moris ba Bíblia. Tema ida nee mak durante tinan ida nia laran (2017) ano liturgia ita celebra mas que dala ruma la atingi família hotu-hotu, la atinge comunidade hotu-hotu, maibe iha paróquia sira, balu começa bookan dau-dauk halo actividade hodi haklean fali ita sarani Diocese Dili ninia moriska abut ida nebe fo sentido ba vida cristã.

Pe. Jovito do Rêgo De Jesus Araujo hatutan tan katak; Ho ida nee hakarak atu promulga fial fali tinan foun, tinan pastoral ba tinan 2018 hahu husi Domingo oin primeiro Domingo Advento ita tama ona ho Ano Litúrgico B e iha tinan ida nee ita sei reflecte kona ba: Bíblia mak família nia abut, we matan, naroman no moris. Tema ida nee mak ita sei reflecte durante tinan ida nia laran iha tinan 2018 ninian. Hein katak família hotu-hotu bele colabora, coopera atu Bíblia sai tebes sira nia abut, sira nia we matan, sira nia roman no sira nia moris. Ho ida ne fo hela baita boot sira desafio ida nee, husi equipa sei prepara Guia oan balu nebe sei fo tuir iha paróquia sira no ba sarani sira nebe hakarak atu reflecte tinan ida mai oin ho tema Bíblia mak família nia abut, we matan, roman no moris bele hakbesik ba paróquia sira.

Vigário episcopal ba assunto Pastoral Diocese Dili Pe. Jovito do Rêgo de Jesus Araujo ho esperança husu atu família sira bele imvolve sira nia-an atu Maromak nia Futar Lia-fuan sai duni ita nia abut, we matan, roman no moris. (Ngl)

Leave a Reply

Your email address will not be published. Required fields are marked *