shadow
Diocese de Dili > NOTÍCIAS > REFLEXÃO > Leitura no Reflexão

Leitura no Reflexão

ANO B

 

Primeira Leitura                                                                                       Is. 60, 1-6

Lia housi Livro Profeta Isaías

Jerusalém, hamríik, nabilan ba! Ó nia Maromak to’o ona mai. Na’i nia naran boot mak haríi ba ó fohon, wainhira kalan taka rai-klaran, wainhira nakukun falun ema sira; maibé housi ó leten, Na’i mosu mai; Nia naran boot mahan ba ó fohon. Ema sira sei tuir ó nia nabilan; liurai sira sei hakat ba ó nia rai-hun mutin. Foti matan hateke lemo-lemo: ema hotu halibur to’o mai ó; ó nia oan mane sira sei to’o mai housi dook; ó nia oan feto sira ema sei lori to’o mai. Haré tiha ne’e, ó laran sei haksolok-mate, ó fuan sei tuku-tuku makáas. Basá, sei suli mai ó, murak di’ak rai-rai! To’o housi Madia no Efá, kuda camelo nahisi ó rain. Housi Sabá, ema tomak sei mai, lori osan-mean no ai-wén morin, hodi hahí hananu Na’i nia naran boot.

Maromak Futar Lia

 

Salmo Responsorial                                                                                                                                                           Sal. 71 (72); 2, 7-8, 10-11, 12-13

Refrão: Povo tomak rai-klaran sei mai hana’i Maromak!!! Repete-se

Maromak, haraik ba liurai kbiit atu tesi lia

haraik ba liurai oan Ita nia justiça.

Nia sei ukun Ita nia povo ho justiça,

nia sei tau matan didi’ak ba ki’ak oan sira. Refrão

 

Iha nia loron, justiça sei buras,

dame sei naruk to’o loron ikus.

Nia sei ukun tasi-mane tasi-feto,

housi mota boot to’o rai ikun rai ulun. Refrão

 

Liurai sira housi rai Tarsis no rai kiik,

mai selu rai-ten ba nia;

housi Sabá no Arábia liurai sira sei lori ho mai sira soin;

iha Nia futar oin, liurai sira hotu tuku-tur ba rai;

Povo hotu-hotu sei serbí Nia. Refrão

 

Nia sei rona ema kiik sira lian,

Nia sei sadia ema neon susar.

Nia sei hanoin ema kbiit laek, ema haraik-an

Nia sei soy ema ki’ak sira. Refrão

 

Segunda Leitura                                                                                                                                                                                            Ef. 3, 2-3a, 5-6

Lia housi São Paulo nia surat ba sarani sira iha Efeso

Maun-alin sira: Imi kala rona ko’alia ona kona ba Maromak nia graça, graça be Maromak haraik mai ha’u, ba imi nia di’ak: Tan Maromak hatudu, ha’u hatene Cristo nia mistério. Ba ema sira otas uluk nian, Maromak la fo hatene mistério ida ne’e, hanesan ohin loron, Nia fo hatene sai ona, hodi Espírito Santo, ba Nia Apóstolo santo no ba Nia Profeta sira: Ema gentio simu mos liman rohan, hanesan ema judeus. Gentio no judeu halo ema isin lolon ida de’it; sira hamutuk, simu hanesan, lia Maromak hakotu ona, hodi Cristo Jesus, housi Evangelho.

Maromak Futar Lia

 

Evangelho                                                                                                                                                                                                                  Mt. 2, 1-12

Nai Jesus Cristo nia Evangelho nu’udar São Mateus haktuir

Jesus moris iha Belém, rai Judeia, iha Liurai Herodes nia ukun. Iha tempo ne’e, to’o iha Jerusalém ema matenek balu, mai housi loro-sa’e. Sira husu: “Judeus sira nia liurai be foin moris ne’e, iha nebé lós? Ami haré nia fitun iha loro-sa’e; Ami mai tuku-tur hana’i ba Nia”. Rona tiha ne’e, Liurai Herodes no cidade tomak Jerusalém nian hakfodak teb-tebes. Halibur tiha sacerdote ulun sira no ema escrivao povo nian, Liurai Herodes husu ba sira, Messias sei moris lós iha nebé. Sira hatán ba nia: “lha Belém rai Judeia, basá. Profeta hakerek nanis ona dehan: ó Belém, rai Judá nian, iha cidade bo- boot sira leet Judá nian, laós ó mak kiik-oan liu: basá, housi ó mak sei mosu mai, ulun ida be sei tau matan ba Ha’u nia povo Israel”. Nune’e, Herodes haruka bolu sub-subar de’it ema matenek sira: Nia husu ba sira, sá loron fitun ne’e mosu. Hafoin nia haruka sira ba Belém, dehan: “Imi ba to’ok! Imi sei husu tuir didi’ak kona ba Kosok-oan ne’e. Hafoin, hetan tiha Nia, mai fo hatene ha’u, atu ha’u mos bele ba tuku-tur hana’i ba Nia”. Rona tiha, liurai sira la’o ona. Fitun nebé sira haré iha loro-sa’e, la’o uluk iha sira oin to’o fatin nebé Kosok-oan hela ba. Haré kona fitun, sira laran ksolok boot. Tama iha uma laran, sira haré Kosok-oan ho nia inan Maria. Hafoin, sira tuku-tur ba rai, hana’i ba Nia. Loke tiha sira nia ai- balun, sira hasa’e ba Nia, sira nia buat sólok: osan-mean, ai-wén morin, ho mina-morin. Maromak fo mehi ba sira, atu sira fila ba sira rain, housi dalan seluk.

Lia Maksoyn

 

Istória Epifánia nian mosu deit iha Mateus nia Evangélho.
Liurai housi parte loro sa’e nia visita ba Jesus hatudu mai ita katak Jesus mai ba ema iha mundo rai klaran tomak la’ós deit ba ema Judeo sira. Ema gentio sira ne’e hatene tiha ona sé mak Jesus no bá hodi hato’o sira nia respeito/hato’o sira nia omenagen. Mateus hanorin ita katak Maromak ba ema iha naçaon ho religiaon hotu-hotu. Iha Natal ita haree no hanoin kona ba Maromak hatudu-An hanesan labarik oan ba mundo tomak. Maromak hatudu-An mai ita ho maneira nebé ita la espera, Nia halo Nia An hanesan labarik ki’ak no kbiit laek ida.

Maromak bolu ita atu deskobre Nia presença iha ita nia moris laran, iha fatin nebé ita la espera – hosi ema sira nebé la hanesan ho ita. Rasa, nasionalidade ka religiaon la’ós importante liu duke besik ba Maromak wainhira Nia mai ita ita leet.

Iha istória ida ne’e Mateus haree ba Jezus hanesan “Judeo sira nia Liurai”. Frase ne’e sei usa fila fali deit iha Evangélho Paixaon nian. Ne’e hodi tutan Jesus nia moris, nia paixaon ho mate, fó hanoin ita katak Jesus moris, terus no mate ba ema tomak.

Presente (Osan mean, aibeen morin no na’an horun) tolu fó ba Jesus housi Liurai matenek sira símboliza fiar tolu kona ba Jesus:

  1. Osan mean mak besi murak – simboliza Jesus mak liurai.
  2. Aibeen morin usa hodi hatudu katak ita nia oraçaon ba Maromak – simboliza katak Jesus mak Maromak,
  3. Na’an horun usa wainhira hakoi ema mate – simboliza katak Jesus mós ema no Nia sei mate.

 

Homilia hosi Papa Francisco iha Solenidade Epifania Na’i nian iha tinan 2015.

Iha homilia, Amo-Papa ko’alia kona-ba Cristo nia naroman ne’ebé leno umanidade tomak no Creda iha niinia misaon evangelisasuaon nian ba povo sira.

Papa Francisco convida sarani sira atu sai husi an rasik atu reconhece Cristo nia naroman ne’ebé leno existénsia umana. Amo-Papa esplica katak Creda la nabilan ho nia naroman rasik, maibé ho Jesús nian, roman loos, ho capasidade atu leno ema nia moris.

Naroman ne’e nesesária atu ema ida-idak corresponde ho modo loos ba vocasaon ne’ebé nia simu. Haklaken Evangelho, Amo-Papa enfatiza, la’ós opsaon ida, la’ós mós profisaon ida: Creda misionária mak ida ne’ebé esprime ninia natureza rasik: simu roman husi Maromak no reflete Ninia naroman.

Husi Evangelho, Papa Francisco destaka Ema Matenek sira nia sasin katak fini lialoos nian hetan iha fatin hotu, sira representa ema sira, husi rai nia sikun haat, ne’ebé Maromak simu iha ninia uma.

“Iha Jesús nia presensa, la iha ona divizaon ida rasa nian, lian nian no cultura nian: iha Kosok-Oan ne’e umanidade tomak hetan ninia unidade. No Creda iha devér atu reconhese no hamosu, ho forma clara ba beibeik, desejo Maromak nian ne’ebé ema ida-idak lori iha ninia fuan”.

Husi fitun rihun ba rihun iha lalehan, Matenek-na’in sira tuir ida diferente, Papa Francisco esplika, fitun ida ne’ebé nabilan liu sira seluk. No fitun ne’e muda sira-nia moris no hatudu dalan atu tuir. Tuir Amo-Papa, ne’e mak lisaun boot ida ba tempo ohin nian.

“Ita simu bolun, liuliu iha tempo ida hanesan ita-nian, atu buka sinál sira ne’ebé Maromak oferece, consiente katak nia husu ita-nia esforso atu desifra no, nune’e, comprende Maromak nia vontade. Ita simu desafio atu bá Belém hasoru Kosok-Oan no nia Inan. Mai ita tuir roman ne’ebé Maromak oferece!”.

Amu-Papa Francisco hateten katak Liurai Matenek sira no bibi-atan sira diferente liu entre sira maibé iha buat ruma komún entre sira: lalehan. “Bibi-atan no Liurai Matenek sira hanorin ita katak atu hasoru Jezús presiza foti matan ba lalehan, la taka iha an rasik, maibé soi fuan no neon nakloke ba Maromak nia orizonte ne’ebé nafatin surpriende ita”.

Leave a Reply

Your email address will not be published. Required fields are marked *