shadow
Diocese de Dili > NOTÍCIAS > LETURA DIÁRIA > Segunda-Feira, depois da Epifania

Segunda-Feira, depois da Epifania

ANO B

 

Primeira Leitura                                                                                  1Jo. 3. 22-4.6

Lia housi primeira surat São João  nian

Doben sira: Ita simu tulun tomak nebé ita husu ba Maromak, basá, ita halo tuir Nia ukunfuan, ita halo buat nebé mónu ba Nia laran. Ninia ukunfuan mak ida ne’e: Fiar Nia Oan Jesus Cristo Nia naran, hadomi malu nu’udar Nia haruka. Ema nebé moris tuir ukunfuan, nia hela iha Maromak, Maromak hela iha nia. Ita hatene katak Maromak hela iha ita, tan Espírito nebé haraik mai ita.

Doben sira: Imi keta fiar iha buat hotu no iha espírito seluk ruma. Maibe imi sei buka hatene, espírito hirak ne’e Maromak nian eh la’e, basá profeta falsu wa’in mai ona iha mundo. Iha ne’e imi sei hatene Maromak Nia Espírito; espírito hotu nebé dehan lolós katak Jesus Cristo halo-An ba ema mak Maromak nian; espírito hotu nebé la dehan lolós kona ba Jesus, la’os Maromak nian, espírito ne’e mak hasouru Cristo nebé imi rona tiha atu mai. Oras ne’e, nia iha ona mundo rai-klaran.

Maibe, ha’u oan sira, imi Maromak Nia oan. Imi manan ona profeta falso sira; basá ida nebé hôrik iha imi mak boot liu ida nebé iha mundo rai-klaran. Sira mundo nian; tan ne’e, sira rona housi mundo, no mundo rona sira. Ami Maromak Nian. Ema nebé hatene Maromak rona ami, ema nebé la’os Maromak nian, nia la rona ami. Housi ne’e mak ami hatene Espírito lialós no espírito falso nian.

Maromak Futar Lia.

 

Salmo Responsorial                                                                                                                                                                         Sal. 2.7-8, 10-11 (R. 8ª)

Refrão : Ha’u sei fó ba ó povo hotu nu’udar liman-rohan!!! Repete-se

 

Ha’u sei haklaken Na’i nia hakran. Nia dehan:

“Ó Ha’u Oan; ohin Ha’u hahoris Ó!”

Husu mai Ha’u, Ha’u sei fó nação hotu ba ó nu’udar liman-rohan.

Housi rai-klaran to’o rai-ulun, ó sei ukun. Refrão

 

Imi sira be liurai mundo nian, sée tilun mai,

ulun sira rai nian rona mai;

imi serbi Na’i, ita Maromak,

adora Nia hodi hamta’uk. Refrão

 

Aclamação                                                                                                                                                                                                                   Mt. 4. 23

Refrão : Aleluia, Aleluia!!! Repete-se       

Ema sira nebé moris iha nakukun laran, haré naromanboot ida;

naroman ida mosu ba sira nebé hela iha mahan mate nian. Refrão

 

Evangelho                                                                                                                                                                                                   Mt. 4. 12-17, 23-25

Na’i Jesus Cristo nia Evangelho nudar São Mateus haktuir

Iha tempo neba, Jesus rona katak ema dadur tiha ona João Baptista, Nia ba tiha Galileia. Husik tiha Nazaré, Nia ba hôrik iha Cafarnaúm besik tasi ibun, Rai Zabulão ho Neftali nian. Nune’e, halo tuir duni buat nebé profeta Isaías dehan sai, hodi hateten: “Rai Zabulão, rai Nestali, luro tasi ibun, Jordão sorin ba, Galileia gentio sira nian, ema sira nebé moris iha nakukun laran, haré naroman boot ida; naroman ida mosu ba sira nebé hela iha nakukun mate nian”. Hahu ba loron ida ne’e, Jesus hanourin hodi dehan: “Imi hakribi imi nia salan, basá Maromak nia reino besik ona”.

Liu housi tasi Galileia nia ibun, Nia haré maun-alin na’in rua; Simão nebé hanaran Pedro no nia alin André. Sira soe hela dai ba tasi, tan sira ema tihana’in. Jesus dehan ba sira: “Imi mai tuir Ha’u, Ha’u sei halo imi hakail-na’in ema”. Sira husik kedas dai, hodi tuir Nia. Tuir teni Nia dalan, haré maun-alin na’in rua, Tiago, Zebedeu nia oan, no alin João; sira iha hela ró laran hamutuk ho sira nia aman Zebedeu, hadi’a dai. Jesus bolu sira. Sira husik kedas ró no sira aman, hodi tuir Jesus.

Hafoin, Jesus liu housi Galileia tomak: hanourin ema sira iha Sinagoga; haklaken reino nia lia-foun, fó isin di’ak ba ema moras no moras áat tomak iha povo sira leet. Nia naran sai boot tiha iha Síria tomak. Ema sira lori ba Nia ema hotu nebé moras áat no terus tan moras oi-oin, diabo tama, bulak no liman ain-mate. Nia sadi’a sira hotu. Ema lubun wa’in tuir Nia nebé mai housi Galileia, housi Decápole, housi Jerusalém, housi Judeia no housi Jordão nia sorin balu ba.

Lia Maksoyn

Leave a Reply

Your email address will not be published. Required fields are marked *