shadow
Diocese de Dili > NOTÍCIAS > Notícias > Escola Laos Fatin Atu Forma Grupo Ka Atu Sadik Malu

Escola Laos Fatin Atu Forma Grupo Ka Atu Sadik Malu

DCDD (13/01/2018) Dom Virgilio do Carmo da Silva, Bispo de Dili apela lia hirak nee ba estudante hotu nebe hamahan an iha Diocese Dili nia laran. Dom Virgilio hateten lia hirak nee relaciona ho missa abertura ba Ano Letivo foun 2018 nebe monu iha loron 13 fulan Janeiro tinan nee iha SE Catedral Dili. Dom Virgilio hateten; Escola laos fatin atu forma grupo, atu sadik malu, escola laos fatin atu baku malu, maibe fatin atu hametin unidade hamutuk atu descobre diak liu tan kona ba buat nebe kakutak nian, Ciências nian, tan ne’e ita presica cria duni ambiente ida ne’e. wainhira iha grupo barak nebe cria deit comfrontação iha ita nia escola sira ida ne’e sai obstáculo boot ida, dificuldade boot ida atu bele facilita processo aprendizagem iha ita nia rai laran. Ne’e duni, se mak responsável ba ida ne’e? Laos amo Bispo, laos Ministro Educação no nia vice sira, maibe ita nian, ita ida-idak hahu husi alunos nebe kiik ba too ida nebe boot liu.

Dom Virgilio hatutan tan katak; Ita mos hahu daudaun tinan foun mas que ita hotu mai husi escola nebe la hanesan, escola barak iha facilidade nebe barak liu no escola balu nia facilidade menos, possibilidade la hanesan maibe ohin ita mai iha ne’e ho sentimento ida katak mas que ita nia escola iha força no ita nia professor sira iha capacidade nebe diak hotu, maibe ita mai iha ne’e hodi reconhece katak ita hotu mesak ema nebe iha limitação buat hotu nebe ita iha ne’e mesak temporário, buat hotu transitório, ita precisa nafatin Maromak nia tulun. Ita bele halo buat hotu, maibe iha buat ruma nebe ita ema labele halo nebe compete ba Maromak deit, tan nee ita hotu mai ne’e tanba ita hotu reconhece ita nia fraqueza humana ida ne’e, tanba nudar ema mas que hau husi família diak, aldeia nebe diak, escola nebe diak, maibe se laiha Maromak buat hotu sei la lao tuir buat nebe hakarak.

Dom Virgilio haktuir tan; Ohin ita mai tanba ita reconhece ita nia limitção sira, ita comfia duni iha Maromak Espírito Santo nia kbiit, Esp’irito nebe acompanha Apóstolo sira, ita mos iha missa ida ne’e atu harohan atuita nia processo aprendizagem ida ne’e mos bele lao diak. Wainhira ita haka’as an duni mak ita bele dehan katak ita nia escola ita bele atinge ita nia finalidade sira hodi transforma ita, lori ita hotu bele sai aluno nebe diak no matenek. Maibe matenek ida oinsa mak ita buka, oinsa mak hau bele sukat hau nia matenek ida ne’e?

Wainhira Espírito Santo presente duni iha ita nia le’et, sei halakon disconfiança iha ita nia le’et, disconfiança ida nebe dala ruma mos iha ita nia escola entre Directur da escola ho mestre sira, entre mestre ho aluno sira, entre mestre ho inan-aman sira. Buat ida disconfia malu, wainhira iha duni Espírito dame ita sei tau ba kotuk buat nebe hafuhu malu, disconfia malu tanba razão oin-oin. Wainhira iha ita nia escola laiha disconfia ba malu, ita bele nakfilak ita nia escola ne’e bele sai família boot ida. Inan-aman sira tanba confia escola sira mak haruka oan sira ba escola. Tanba nee iha iha escola ita precisa haburas Espírito família nian, Espírito diálogo nia, Espírito comunicação nian, Espírito atu bele hari no haburas buat nebe respeito no rona malu ninian. Hanesan wainhira ita hakiak diálogo, respeito malu, ita sei kuda, ita hakiak ita nia comfiança iha ita nia escola sira ita sei ku’u paz no harmonia, maibe iha escola mak ita hakiak ódio, discomfia malu, ita sei ku’u mak violência. Tan ne’e mak processo aprendizagem nebe atu lao diak wainhira ita hakmatek iha escola, wainhira ita respeito mútua, wainhira ita rona malu iha escola, wainhira escola bele sai fatin ida nebe familia ida bele haburas comfiança.. (Alin/ Ngl)

Leave a Reply

Your email address will not be published. Required fields are marked *