shadow
Diocese de Dili > NOTÍCIAS > LETURA DIÁRIA > Sábado, II Semana Iha Tempo Comum

Sábado, II Semana Iha Tempo Comum

ANO B

 

Primeira Leitura                                                                     2Sm. 1. 1-4, 11-12, 19, 23-27

Lia housi segundo livro Samuel nian

Iha loron hira neba, wainhira David hamonu tiha hotu ema Amalec sira, nia hela tiha loron rua iha Siclag. To’o ona loron tolu, mai housi acampamento mane ida nebé uluk hela ho Saul: nia hatais roupa naklés no nia ulun mesak rai-rahun mak taka. Molok to’o iha David nia oin, nia monu tiha ba rai hodi hakneak. David husu ba nia: “Ó mai housi nebé?” Nia hatan: “Housi acampamento Israel nian; ha’u halai housi neba!” David husu fali ba nia: “Buat sá mak mosu? Haktuir mai ha’u ba!” Ema ne’e hatan: “Ita nia emar sira, halai tiha ona housi fatin funu nian, housi povo nia leet ema wa’in. Saul rasik ho nia oan Jónatas mós mate”.

Tan ne’e, David káer nia faru hodi lés tiha, no sira hotu nebé hela hamutuk ho nia halo mós nune’e. Tuir mai, sira hotu hatudu sira nia laran susar, tanis, la han la hemu to’o loron-kraik, tan Saul ho nia oan Jónatas, Na’i nia povo be housi uma-laran Israel nian, nebé ema oho mós. David dehan: “Israel, sira nebé fó ksolok ba ó mate mohu tiha hotu ona iha ó nia foho áas sira leten. Oinsá ema funu-na’in sira mate? Saul no Jónatas, hadomi no di’ak malu teb-tebes iha sira moris no to’o mate sira la haketak malu. Sira lais liu fali leão sira! Oan feto sira Israel nian, tan Saul, imi tanis ba, basá, nia mak fó hatais imi ho be nabilan no furak, no hafutar imi hatais ho murak mean. Oinsá ema funu na’in sira mate mohu iha funu? Oh! Jónatas, be mate iha foho áas nia leten! Ha’u hela mesak-mesak tan de’it ó, ha’u maun Jónatas. Ó ba ha’u, nu’udar doben wa’in! Ha’u hakarak tebes ó nia laran di’ak liu fali domin feto ida nian. Oinsá mak funu-na’in sira mate no kilat sira funu nian hotu lakon?”

Maromak Futar Lia

 

Salmo Responsorial                                                                                                                                                                Sal. 79(80). 2-3, 5-7 (R. 4b)

Refrão: Na’i, hatudu Ita futar oin mai ami, Ami sei hetan maksoyn!!! Repete-se    

 

Bibi-atan Israel nian, rona mai,

Ita be lori José, nu’udar bibi sira.

Hatudu Ita kmanek iha Efraim,

Benjamim no Manassés nia oin,

Hafanun Ita kbiit hodi mai soi ami! Refrao

 

Na’i Leten-as ba, to’o wainhira Ita taka tilun,

Ba Ita povo nia harohan tan Ita ran nakali?

Ita habosu nia ho pão mata-wen nian,

Ita fó tiha ami mate ba sira be hela besik ami,

Funu baluk sira be laran áat. Refrao

 

Aclamação                                                                                                                                                                                                               Act. 16. 14b

Refrão: Aleluia, Aleluia !!! Repete-se

Loke, Na’i, ami fuan atu simu futar liafuan sira housi Ita Oan mane. Refrão

 

Evangelho                                                                                                                                                                                                               Mc. 3. 20-21

Na’i Jesus Cristo nia evangelho tuir são Marcos

Iha tempo neba, Jesus tama tiha iha uma ho Nia escolante sira. Ema lubun boot halibur-an fali iha Nia oin, haodi halo Nia la hetan tempo atu bele han. Jesus nia parenti sira hatene tiha ne’e, ba kedas atu hola Nia, basá, sira hateten katak: “Nia hanoin la lós ona”.

Lia maksoyn.

Leave a Reply

Your email address will not be published. Required fields are marked *