shadow
Diocese de Dili > NOTÍCIAS > LETURA DIÁRIA > Quarta-Feira, III Semana iha Tempo Comum

Quarta-Feira, III Semana iha Tempo Comum

ANO B

 

Primeira Leitura                                                                                     2Sm. 7. 4-17

Lia husi segundo livro samuel nian

Iha loron hirak neba, Na’i lia tun ba profeta Natã nune’e: “ Ó ba dehan, ba ha’u atan David: Na’i ko’alia nune’e: Ó mak atu halo kadunan ida mai Ha’u, atu Ha’u hôrik ba? Hori loron nebé Ha’u hasai Israel oan sira housi Egipto to’o ohin loron, Ha’u la dauk hela iha kadunan ida. Ha’u la’o hela iha tenda ida no tabernáculo ida nia laran. Iha tempo hotu nebé Ha’u la’o ho Israel oan sira hotu, dala ruma Ha’u husu ba lia na’in sira Israel nian, ba ida be simu ukun atu hei Ha’u Nia povo Israel: Tan sá imi la halo mai Ha’u kadunan ida be halo ho ai cedro?” Oras ne’e duni ó sei dehan ba Ha’u atas David buat ne’e: “Na’i Lalehan no Rai nian dehan nune’e: Ha’u hasai ó housi rai balada han fatin, housi balada atan, atu ó sai Ha’u povo Israel nia ulun. Ha’u hamutuk nafatin ho ó iha fatin hotu nebé ó la’o, hodi halakon housi ó nia oin ó nia funu baluk sira hotu. Ha’u sei halo ó naran sai naran boot ida hanesan rai nia boot sira naran. Ha’u sei fihir fatin ida atu Ha’u Nia povo Israel hôrik ba. Nia sei la hetan tan susar, ema áat sira sei la hanehan tan nia hanesan uluk, wainhira Ha’u tau juiz sira iha Ha’u Nia povo Israel nia oin. Ha’u sei halo ó moris hakmatek iha ó funu baluk sira hotu oin; Na’i dehan katak Nia sei halo uma ida ba ó. Wainhira ó nia loron sira to’o, hodi ba hôrik hamutuk ho ó nia aman sira, Ha’u sei tau  iha ó fatin, oan ida nebé sei moris housi ó. Ha’u sei hametin nia ukun. Nia mak sei harí kadunan iha hodi Ha’u naran. Ha’u sei hametin nia ukun liurai nian nafatin ba nafatin. Ha’u sei sai nu’udar aman ida ba nia, nia mai Ha’u nu’udar oan ida. Tuir mai nia halo sala karik, Ha’u sei halós  nia ho castigo tuir ema nian. Maibé, Ha’u laran di’ak sei la la’o dook housi nia, hanesan Ha’u halo ba Saul nebé Ha’u hadook housi Ha’u oin. Ó uman no ó ukun, iha nafatin Ha’u oin. Ó nia trono metin nafatin tinan-ba-tinan”.

Natã ho laran metin fó hatene lolós ba David, liafuan no hanoin hirak ne’e hotu.

Maromak Futar Lia.

 

Salmo Responsorial                                                                                                                                            Sal. 88(99). 4-5, 27-28, 29-30 (R. 29ª)

Refrão: Ha’u Nia aliança ho nia sei hela ba nafatin!!! Repete-se

 

Ha’u halo moruk ida ho Ha’u povo,

Ha’u jura ba David Ha’u atan:

Iha ó, sei hametin ó nia geração,

Sei hari ó nia trono ba nafatin. Refrão

 

Nia sei hasa’e lia mai Ha’u: “Ita mak ha’u Aman,

Ha’u Maromak no ha’u Mahein”.

Ha’u sei halo nia nu’udar Ha’u oan doben,

Boot no kmanek iha liurai sira

Rai-klaran nia leet. Refrão

 

Ha’u sei tulun nafatin nia ho Ha’u Nia graça,

Ami nia moruk sei rohan laek;

Nia oan sira no nia trono

Sei hela metin nafatin hanesan laleha. Refrão

 

Aclamação                                                                                                      

Refrão : Aleluia, Aleluia!!! Repete-se

Fini mak Maromak futar-liafuan sira, Cristo mak kari fini.

Sé mak buka hetan fini ne’e sei hela tinan-ba-tinan. Refrão

 

Evangelho                                                                                                                                                                                                              Mc. 4. 1-20

Na’i Jesus Cristo nia Evangelho tuir são Marcos

Iha tempo hirak neba, Jesus hahu hanourin fali iha tasi ibun. Ema lubun boot mai halibur hamutuk atu rona Nia. Tan ne’e, Nia tur iha ró ida iha tasi laran. Ema sira hela iha tasi ibun, iha rai maran. Nia hanourin sira buat barak ho aiknanoik. Nia hanourin dehan: “Rona didiak ba! Ema ida ba kari fini. Nia kari fini dadaun, fini balu monu iha dalan. Manu sira mai hodi han sira hotu. Balun monu iha fatuk leten. Iha neba iha rai uitoan de’it. Fini sira ne’e moris lalais, basá, rai la klean. Maibé, wainhira loron sa’e hamanas sira, sira namlaik, basá, sira ábut la iha. Fini balun monu iha ai-tarak laran. Ai-tarak moris maka’as hodi hanehan sira. Fini sira ne’e la fuan ida. Fini balun monu iha rai di’ak, hodi moris buras no maka’as, balun fó fulin ho musan tolu-nulu, balu ho musan neen-nulu no balun ho musan atus ida”. Jesus dehan tan: “Ema nebé iha tilun atu rona, rona ba!” Wainhira Nia mesak-mesak ona, sira na’in sanulu resin rua no mós sira seluk nebé tuir Nia, aiknanoik ne’e katak sá. Nia hatan ba sira: “Mistério Maromak Nia reino nian fó sai tiha ona ba imi, maibé, ba sira nebé hela iha liur, buat hotu mai de’it housi aiknanoik sira. Atu sira haré fila-fali  maibé, la haré mós; sira rona fila-fali maibé, la hatene lolós, atu keta sira fila ba di’ak hodi hetan perdua”.

Hafoin, Nia dehan ba sira: “Imi la hatene lolós aiknanoik ida ne’e? Oinsá imi bele hatene lós aiknanoik sira seluk? Fini nebé ema kari mak liafuan. Sira nebé monu iha dalan mak ema sira nebé rona tiha liafuan, Santanás mai kedas hodi hasai housi sira liafuan nebé foin  kari iha sira. Nune’e mós, sira nebé simu fini iha fatuk leten mak sira nebé, wainhira sira foin rona liafuan, simu nia haksolok, maibé, sira nia abut laiha. Sira la tahan. Susar ruma mosu karik, eh terus ruma tanba liafuan mai hasouru karik, sira monu lalais. Hafoin sira nebé simu fini iha ai-tarak laran, sira ne’e rona tiha liafuan, maibé, hanoin mundo ne’e nian no mós babeur housi riku-soin no babeur sira seluk hanehan liafuan ne’e. Nune’e, nia la fó fuan. Sira nebé simu liafuan iha rai di’ak, sira rona liafuan hodi simu nia no fó fuan barak; balun dala tolu-nulu, balun dala neen-nulu no balun dala atus ida”.

Lia Maksoyn.

Leave a Reply

Your email address will not be published. Required fields are marked *