shadow
Diocese de Dili > NOTÍCIAS > HOMILIA DO BISPO > SAIDA MAK OBRIGA SÃO SEBASTIÃO ATU SARAN NIA-AN BA MATE

SAIDA MAK OBRIGA SÃO SEBASTIÃO ATU SARAN NIA-AN BA MATE

Hau convida ita hotu-hotu atu hateke ba estátua São Sebastião nian, wainhira ita hateke ba estátua ida ne’e, imi hare saida? Hare isin tanan, kanek, nakonu ho rama oan nebe belit ba nia isin? Dala barak ita hare ida ne’e ita hanoin konaba saida? karik ita hanoin konaba ema áat nebe halo hahalok nebe diak, nebe tracheia ba cultura e nune’e mos dalaruma ita hare ita laran susar oinsá nia terus; rua ne’e hotu furak kapas, maibe buat nebe ita admira ba São Sebastião mos mak ida ne’e, nia hatene hili buat nebe fo folin ba ita nia moris, ita husu ba ita nia an saida mak obriga São Sebastião atu saran nia an  ba mate hanesan ne’e, nia defende lerek saida, nia moris ba saida, saida mak iha kotuk dudu São Sebastião atu saran nia an ba mate, tanba sá mak São Sebastião la tauk atu lakon nia vida.

São Sebastião hanorin foin sae ida tem que iha fiar ida, iha princípio ida, kaer ba doutrina ida, kaer ba valor ida iha moris. Jovem Sebastião nia capacidade atu hatene hili no atu halo decisão nebe ás masque nia risco boot to lakon nia moris rasik; nia decisão nebe nia halo la defende ba ema seluk, maibe nia hatene opta ba valor ida iha ninia moris.

Ita nia ksolok loraik nee nian sai boot liu tan tanba ohin mos iha foinsae 300 resin nebe enche Capela Bidau ne’e nakonu didiak atu simu sacramento crisma. Tan ne’e hau nia parabens ba imi tanba imi prepara duni ba momento ida ne’e imi rasik hatene saida imi atu halo, siada mak imi atu simu.

Ohin imi simu sacramento crisma ita hatene katak sacramento baptismo, eucaristia no crisma nebe ita simu daudauk ne’e ita hanaran sacramento iniciação. Sacramento baptismo halo ita hahu tama iha odamatan boot uma kreda ninian, tuir mai simu Cristo nia Futar isin liu husi Sacramento Eucaristia no Sacramento Crisma atu hametin liu tan ita nia fiar. Tan nee mak iha Crisma ita completa Sacramento datoluk nian no husi Sacramento ida nee ita simu graça Espírito Santo. Espírito Santo ida ne’e nia papel mak atu revela iha ita buat nebe dom verdade.

Hanesan ita rona iha Evangelho São João dehan; wainhira Espírito nee mai, Espírito ida nee mak sei leno dalan. Hanesan ita dehan hodi sacramento ida mak manifesta/hatudu katak ema nebe boot ona, maibe keta tauk, keta desanima; Maromak sei haraik Espírito ida ne’e ba imi, atu Espírito ida ne’e acompanha nafatin imi iha imi ida-idak nia moris nudar sarani.

Tan nee mak alin doben sira Espírito Santo nia presença iha imi halo imi nia conciênçia sai hanesan viveiro ka knuk foun ida nebe iha imi nia missão moris nian. Hori ohin ba oin ita dehan katak wainhira ita conciênte nafatin Espírito ida nee, Espírito ida nee sei tulun ita wainhira ita koko atu hanoin, precisa nafatin consulta ho Espírito ida ne’e, precisa harohan husu buat nebe hau atu halo ne’e diak kalae, buat nebe hau halo ne’e hahalok sarani nian ga gentio nian, tan ne’e ema dehan hanoin uluk mak halo, laos halo uluk mak hanoin.

Keta hakfodak katak depois de crisma nee sai ba nee ita sai kedas hanesan anju ida, sai kedas hanesan santo ida; maibe, Espirito ida nee ajuda hau atu bele conciente konaba hau nia fraquesa maibe hau la sente katak hau la mesak, baruk karik ba ema bele hare hau hanesan nee karik ba, maibe hau fiar katak Maromak nee hadomi hau. Importante hau loke hau nia vida atu Maromak lao hamutuk ho hau, lao nafatin ho graça Maromak nian. Ida nee mak razão lori ita hotu mai iha ne’e.

Ida ne’e mak São Sebastião ohin hakarak atu husik hela mai ita, ohin ita rona iha leituras sira rona iha evangelho koalia konaba testamunho ida nebe sei sai hanesan São Sebastião fo nia an ba ema atu baku, maibe ita nia capacidade atu hatene firme iha ita nia decisão.

Razão boot mai ita iha sorumutuk ohin iha ita nia festa mahein São Sebastião nian atu convida ita hotu atu acompanha ita nia alin hirak nebe atu simu sacramento crisma atu hamutuk ho sira ita mos bele renova ita nia comprimíssio sarani nian; dala barak ita mos la’o kleuk, dala barak ita mos tama iha situação ida nebe dilemático, iha dúvidas iha decisões hirak nebe dala ruma ita halo tuir deit isin nia hakarak, tuir gostu deit, maibe São Sebastião ohin convida ita fila fali hamutuk ho sacramento crisma nebe ita atu simu convida mos ita atu renova ita nia-an.

Leave a Reply

Your email address will not be published. Required fields are marked *