shadow
Diocese de Dili > NOTÍCIAS > LETURA DIÁRIA > Quinta-Feira, III Semana Iha Tempo Comum

Quinta-Feira, III Semana Iha Tempo Comum

ANO B

 

Primeira Leitura                                                                               2Sm. 7. 18-19, 24-29

Lia husi segundo livro Samuel nian

Iha loron hirak neba, wainhira profeta Natã hato’o tiha ba David liafuan sira Na’i nian, liurai ba hamriik tiha iha Na’i nia oin hodi dehan: “Sé mak ha’u, Na’i Maromak, sé mak ha’u uma-kain, atu lori ha’u to’o iha ne’e? Na’i Maromak, buat ne’e la folin iha ita matan karik, ita haraik ita lia-moruk ba ita atan nia uma-kain ba tempo ikus nian! Ema ida bele iha direito ida hanesan ne’e, Na’i Maromak? Ita harí metin Isarael, ita atan, nu’udar ita povo ba nafatin, no ita, Na’i, hela nu’udar Na’i Maromak.”

Oras ne’e Na’i Maromak, ha’u tuir nafatin lia-moruk nebé ita hakotu ona ba ita atan no ba ita atan nia uma-kain; hala’o tuir nu’udar ita hateten. Itaboot naran sei sai boot ba nafatin ho liafuan hirak ne’e ˊNa’i, lalehan no rai tomak nian, mak Israel nia Maromak!’ No uma-kain ita atan David nian harí metin nafatin iha ita oin. Basá, Itaboot, lalehan no rai tomak nia Na’in, Israel nia Maromak, hato’o ba ita atan buat ida ne’e: ˊHa’u sei harí uma ida ba ó!’ Tan ne’e, ita atan la ta’uk hodi hasa’e harohan ne’e ba itaboot. Lós duni, Na’i Maromak lós, dehan lia sira be mesak lós, mak haraik ksolok di’ak ida ne’e ba ita atan. Haraik bensa ba ita atan nia uma-kain atu nia bele hela metin nafatin iha itaboot Nia futar oin. Tan itaboot, be Na’i maromak mak dehan: housi itaboot Nia bensa, ita atan nia uma-kain sei simu bensa ba nafatin.

Maromak Futar Lia.

 

Salmo Responsorial                                                                                                                                Sal. 131(132). 1-2, 11, 12, 13-14 (R. Lc. 1. 32b)

Refrão: Na’i Maromak sei haraik ba nia,

                 Nia aman David nia trono!!! Repete-se         

 

Na’i, keta haluha David;

Nia knaar sira be wa’in tebes;

Nia halo juramento ida ba Na’i,

Nia hakotu lia ne’e ba Jacob nia Maromak. Refrao

 

“Ha’u sei la tama iha ha’u uman,

Sei la sa’e ba ha’u toba fatin,

Ha’u sei la taka ha’u matan,

Sei la fó descansa ba ha’u matan-fukun

to’o hetan hôrik fatin ida ba Na’i,

kadunan ida ba Jacob nia Maromak. Refrao

 

Na’i jura ba David

Promesa ida nebé sei la halo hikas fali:

Ida housi ó ran mak sei tur iha

Ó nia trono leten! Refrão

 

Ó nia oan sira moris tuir karik Ha’u nia aliança,

No Ha’u nia hakarak be Ha’u hatudu ona ba sira;

Sira nia oan sira mós sei tur nafatin

Iha ó trono nia leten. Refrão

 

Na’i hili Sião,

Nia hakarak hôrik iha nia:

“Ida ne’e mak Ha’u uma ba nafatin,

Ha’u sei moris iha ne’e, tan Ha’u hili nia”! Refrão

 

Aclamação                                                                                                                                                                                                   Sal. 118(119). 105

Refrão : Aleluia,aleluia!!! Repete-se

                  Na’i, Itaboot nia liafuan mak ahi oan mai ha’u nia fatin,

                  Roman iha ha’u nia dalan. Refrão

 

Evangelho                                                                                                                                                                                                               Mc. 4. 21-25

Na’i Jesus Cristo nia Evangelho nudar são Marcos haktuir

Iha tempo neba, Jesus lia tun ba escolante sira: “Imi sunu lakan ahi oan ida hodi tau nia iha balde okos eh iha toba fatin okos? Lolós, imi sei tau nia iha nia fatin! La iha buat ida nebé subar; nebé ema sei la fó sai; la iha buat ida nebé subar metin nebé ema la fó hatene. Ema nebé iha tilun atu rona, rona ida ne’e ba” Nia dehan mós ba sira: “Rona didiak buat nebé imi rona dadaun: Sasukat nebé imi usa sei usa mós ba imi, no barak liu tan. Basá, ema nebé iha ona, sei simu tan; housi ema nebé la iha, buat nebé nia iha sei hasai tan housi nia”.

Lia maksoyn.

Leave a Reply

Your email address will not be published. Required fields are marked *