shadow
Diocese de Dili > NOTÍCIAS > Notícias > PARÓQUIA BECORA SAI HANESAN UNIVERSIDADE MAI HAU

PARÓQUIA BECORA SAI HANESAN UNIVERSIDADE MAI HAU

DCDD (18/01/2018) Pe. Guilhermino da Silva, Pároco Paróquia Sagrado Coração Becora relata lia hirak nee iha nia celebração vida Sacerdócio nian ba dala 16. Cerimónia hirak nee realiza iha Paróquia Becora nebe participa máxima husi Padres, madres no mos sarani husi paróquia Becora nian.

Pe. Guilhermino da Silva hateten; Hau hare hau nia moris, hau la hanoin kona katak hau bele too iha ponto ida ne’e sai padre no tem que celebra to tinan 16. Hirak ne’e hotu Maromak nia diak, hau sai padre mos tanba Maromak nia diak no Maromak nia graça mai hau, e ita sai sarani mos hanesan tanba Maromak nia diak. Se hau bele dehan hau deit mak hakarak atu sai padre, uluk kedas hau lakohi tanba dala barak ona hatudu mai hau labele, maibe tanba Maromak nia hakarak hau tem que haraik-an, hau tem que simu, tanba ne’e too tinan 16 hau sei bele hamriik iha ne’e hanesan padre. Hau nafatin hanesan Maromak nia atan, hau koko atu lao tuir Maromak nia hakarak ida ne’e too tempo moris iha rai ne’e hotu.

Relaciona ho tinan 13 nia laran nudar Pároco hodi servi sarani Paróquia Becora, Pe. Guilhermino da Silva declara katak; hau hela kleur iha ne’e laos questão diak ka ladiak, maibe questão Maromak hakarak hatudu nia laran diak, hatudu Nia vontade ne’e mai hau iha ne’e, tanba ne’e hau nafatin halo tuir deit buat nebe Maromak husu, mas que husi hau nia parte hanesan ema kleur ne’e hanesan buat ida nebe bosan tebes mai hau, maibe koko neneik atu hatama-an iha Maromak nia dalan no koko neneik atu simu Maromak nia plano  ba hau iha hau nia moris. Hau hanoin buat hotu nebe mak acontece iha hau nia moris no iha hau nia servisu para no continua ne’e hanesan buat nebe mak atu halo ita nia moris atu sai forte liu tan maduro liu tan. Ho acontecimento sira ne’e hotu Maromak fo ba ita ida-idak tempo atu reflecte moris ne’e ida liu tiha ona ne’e oinsa no mos ida atu ba oin ne’e halo nuasa? Ida ne’e hau sempre hanoin iha hau nia dalan ida ne’e.

Pe. Guilhermino da Silva dehan tan; Hau agradece liu tanba sarani, padre, madre imi sempre sai professor mai hau iha hau nia dalan moris nian hanesan padre. Hau sente Paróquia Becora sai hanesan  Universidade mai hau. Hau quando sai padre iha Maliana hau sente hanesan hau SD ida, hau ba turiscai hau hanesan SMP e hau mai iha Becora hau hanesan SMA too fali Universidade. Nebe hau hetan lisaun barak husi imi no tanba imi nia lisaun diak sira ne’e, imi nia mestre diak sira ne’e mak halo hau bele tahan too tinan 16 iha vida sacerdócio nian. (Lucio)

Leave a Reply

Your email address will not be published. Required fields are marked *