shadow
Diocese de Dili > NOTÍCIAS > Notícias > FAMÍLIA HARI NO KESI METIN IHA UNIÃO MATRIMÓNIO

FAMÍLIA HARI NO KESI METIN IHA UNIÃO MATRIMÓNIO

DCDD (26/01/2018) Ba ita hanesan sarani molok atu hari uma kain, precisa liu husi sacramento. Família hari no kesi metin iha união matrimónio nebe hatur iha domin entre mane no feto. Atu manteim união iha matrimónio precisa tebes fidelidade entre fen ho laen iha matrimónio. Família dala barak hetan tentação makas husi liur. Tanba nee, tuir Igreja nia hanorin nebe maka ikus-ikus ne’e importante tebes amo Papa Francisco nebe maka sente problema boot família ninian hahu husi matrimónio nebe iha 2014 halo 3° Sínodo extraordinário kona ba família nian too iha 2015 halo Sínodo Bispo nian no kona ba mos família nian hodi fo sai Documento exortação Apostólica nian nebe naran Amore Laetitia, dehan Pe. Domingos da Silva Soares.

Pe. Domingos da Silva Soares reforsa tan; Então Igreja nia hanorin nee katak domin nee mai husi Maromak. Baut hotu be Maromak halo nee tanba domin atu ita bele koko domin nee no tanba domin nia hakiak mos família. Bainhira Maromak cria tiha Adão, Maromak hare katak mane nee mesak hela. Nee significa relação ho Maromak nee sei falta hela. Então Maromak cria tan Feto (Eva). Wainhira Maromak cria tiha Eva hodi entrega ba Adão no Adão simu ho ksolok hodi dehan “nia isin husi hau nia isin, nia ruin husi hau nia ruin” hirak nee hotu tanba domin. Nee katak buat ruma nebe mai hasoru hau e buat ruma nebe mak dada hela hau ba Nia. Nee duni Adão ho liafuan ida nee nia nia conhece Maromak liu husi domin e nia conhece Maromak hadomi nia atu oinsa mak nia mos bele fo fali resposta domin ba Maromak bainhira nia sai ida deit ho nia kaben Eva.

Papa Emérito Bento XVI iha ninia Encíclica DEUS CARITAS EST (Maromak mak domin, Maromak mak Caridade) atu ita comprende katak ema nain rua hadomi malu nee katak fo Maromak ba malu, hakiak Maromak iha sira nia moris. Tanba nee, sarani sira buka haraikan hodi rona Maromak nia Futar Liafuan, italaos moris mesa-mesak maibe ita tama iha plano domin Maromak nian e Maromak hakarak duni ita koko domin nee. Hanesan feto ho mane ida atu kaben mos nee plano domin Maromak nian, além nee mos ba hirak nebe consagra sira nia an atu sai Madre no nailulik mos nee plano Maromak nian.

Pe. Domingos da Silva Soares hateten; Família mak comunidade natural nebe ema hetan experiência ba dala uluk kona ba valores humanas no sociabilidade humana. Sinceridade ka honestidade nudar valores humanas ida precisa haburas iha família nia moris, liu husi nakloke-an, comunica no diálogo ba malu atu bele sai nudar escola ba dala uluk kona ba fiar, escola ba dala uluk kona ba valores humanas.

Pe. Domingos da Silva Soares salienta tan katak; koalia kona-ba família ba ita hanesan buat ida normal tiha ona, natural tiha ona, katak ita moris mai ita sente duni e ita tem que moris duni iha família ida. Bainhira ita laiha família ita sente hanesan kiak, laos kiak maibe hanesan todan boot ida nebe ita bele hetan iha ita nia moris. Nee duni, Maromak nebe halo ita moris, Nia hakarak duni atu ita moris iha ksolok nia laran. Moris mak graça Maromak nian nebe precisa ita ema quidado, tau matan no haburas atu nunee bele fo ksolok ba ita nia moris no ita nia família. Iha Igreja nebe mak mai hato’o Maromak nia Liafuan preucupa nafatin, buka nafatin dalan atu iha tempo hotu-hotu bele oinsa ajuda Uma Kain sira, kabenain sira, família sira atu bele moris duni iha plano Maromak nian ba ksolok nebe maka Maromak hakiak ona ba ita.

Pe. Domingos da Silva Soares haforça tan katak; Hare ba preucupação hirak nee iha ita nia Diocese Dili tinan ida ne’e hala’o tinan Bíblia maibe, tinan Bíblia iha família nia laran. Então aproveita mos oportunidade diak ida ne’e ita mos bele reflete hodi hare didiak oinsá Maromak koalia mai ita iha Bíblia nia laran, atu ita bele moris iha família nia laran nudar família sarani, nudar ema sarani hodi koko graça lalehan nian iha rai. (Jaja)

Leave a Reply

Your email address will not be published. Required fields are marked *