shadow
Diocese de Dili > NOTÍCIAS > LETURA DIÁRIA > Quinta-Feira, V Semana Iha Tempo Comum

Quinta-Feira, V Semana Iha Tempo Comum

ANO B

 

Primeira Leitura                                                                                     1Rs. 11. 4-13

Lia husi primeiro livro Liurai sira nian

Wainhira Salomão sai katuas tiha, nia féen sira muda nia fuan ba Maromak sira seluk, nia fuan la fó tomak ona ba Na’i, be nia maromak, hanesan nia aman David. Salomão hahu fiar iha Astarté, ema Sidónio sira nia maromak, no iha Milcom, amonita sira nia maromak. Nia hala’o buat nebé la fó ksolok ba Na’i, la tuir lolós Na’i Nia hakaran hanesan nia aman David. Iha tempo ne’e Salomão harí santuário ida iha foho nebé hela iha loron sa’e housi Jerusalém nian, ba Camos, maromak Moab nian, ba Moloc, maromak amonita sira nian. Nia halo mós nune’e atu haksolok nia féen sira rai seluk nian, be sunu ai-wen morin (incenso) no hasa’e sacrifício ba sira nia maromak. Na’i hirus teb-tebes hasouru Salomão tan nia fuan hadook tiha ona housi Na’i, Israel nia Maromak. Nune’e, Na’i mosu dala rua ba nia hodi fó ordem ba nia kona ba Nia hakarak, atu la bele hasa’e sacrifício ba maromak sira seluk. Maibé, liurai la tuir Na’i nia ordem. Nune’e, Na’i dehan ba Salomão: “Tan ó halo tiha ona nune’e, no ó la respeita Ha’u Nia moruk (aliança) no mós Ha’u Nia ukunfuan sira nebé Ha’u hato’o tiha ona ba ó, Ha’u ba hasai tiha reino housi ó, hodi fó reino ne’e ba ó atan ida. Maibé, Ha’u sei la halo iha ó nia moris, tan ó aman David; Ha’u sei hasai ó nia reino ne’e housi ó oan mane. Ha’u sei la hasai nia reino hotu: sei husik hela uma-kain ida ba ó oan mane, tan Ha’u atan David no tanba Jerusalém, nebé Ha’u hili tiha ona mai Ha’u”.

Maromak Futar Lia.

 

Salmo Responsorial                                                                                                                                           Sal. 105(106). 3-4, 35-36, 37, 40 (R. 4ª)

Refrão: Na’i, keta haluha ami, tan domin ba Ita povo!!! Repete-se      

 

Rahun di’ak ba sira nebé moris tuir ukunfuan,

no iha sira nia moris tomak halo tuir justiça.

Keta haluha ami, Na’i, tan domin ba Ita povo;

mai haré ami ho Ita Nia maksoyn. Refrao

 

Sira la’o ho gentio sira,

halo tuir sira nia lisan;

Sira adora sira nia maromak falso,

nebé nu’udar hani tau ba sira. Refrao

 

Hasa’e sacrifício ba demónio sira,

nia oan mane no oan feto sira.

Tan ne’e, Na’i hirus teb-tebes,

hakribi nia povo no nia liman-rohan. Refrão

 

Aclamação                                                                                                                                                                                                             Tg. 1. 21b, c

Refrão : Aleluia,aleluia!!! Repete-se

                  Simu ho laran midar liafuan nebé kuda ona iha imi:

                  Nia bele soi imi klamar. Refrão

 

Evangelho                                                                                                                                                                                                              Mc. 7. 24-30

Na’i Jesus Cristo nia Evangelho nudar são Marcos haktuir

Iha tempo neba, Jesus la’o ba rai Tiro no Sídon. Nia tama iha uma ida, la kohi atu ema ruma hatene katak Nia iha neba, maibé, ema sira hatene. Nune’e, feto ida nebé iha oan feto ida be iha diabo iha nia laran, wainhira rona tiha kona ba Nia, mai tuku-tur iha Nia ain. Nia ema gentio nebé moris iha rai siro-fenícia. Nia husu ba Jesus atu duni sai diabo ne’e housi nia oan feto. Maibé, Jesus hatan ba nia: “Husik uma-kain nia oan sira han didiak lai. Basá, hasai aihan housi labarik sira, hodi fó fali ba asu sira, ne’e la di’ak”. Maibé, feto ne’e hatan: “Lós duni, Na’i, maibé, asu sira mós, iha mesa okos han buat nebé sira soe tiha”. Jesus hatan ba feto: “Tan ó nia liafuan hirak ne’e, ó bele ba ona. Diabo sai tiha ona housi ó nia oan”. Wainhira feto ne’e to’o uma, nia hetan nia oan feto toba hela iha toba fatin. Diabo sai tiha ona!

Lia maksoyn

Leave a Reply

Your email address will not be published. Required fields are marked *